ചേര്ത്തല: നഗരസഭ നേതൃത്വത്തിന്റെ ഭരണപരിഷ്ക്കാരങ്ങള് പ്രഖ്യാപനങ്ങളില് ഒതുങ്ങുകയാണെന്ന് ബിജെപി ദക്ഷിണമേഖലാ പ്രസിഡന്റ് വെള്ളിയാകുളം പരമേശ്വരന്. ഗവ. താലൂക്ക് ആശുപത്രിയുടെ ദേശീയ അംഗീകാരം നിലനിര്ത്താന് നടപടി സ്വീകരിക്കാത്തതിനെതിരെ 13-ാം വാര്ഡ് കൗണ്സിലര് ഡി. ജ്യോതിഷ് ആശുപത്രിക്ക് മുന്നില് നടത്തിയ കുത്തിയിരിപ്പ് സമരം ഉദ്ഘാടനം ചെയ്യുകയായിരുന്നു അദ്ദേഹം.
ആയിരക്കണക്കിന് പേര് പ്രതിദിനം ചികിത്സക്കെത്തുന്ന ആശുപത്രി റഫറല് കേന്ദ്രമായി മാറിയിട്ടും ഇതിനെതിരെ ചെറുവിരലനക്കാന് അധികാരികള് തയ്യാറായിട്ടില്ല. ആശുപത്രി അധികൃതരും നഗരസഭ നേതൃത്വവും തമ്മിലുള്ള ശീതസമരമാണ് ആശുപത്രിയുടെ ദുരവസ്ഥയ്ക്ക് കാരണമെന്നും അദ്ദേഹം പറഞ്ഞു. കെ.പി. ശശികുമാര് അദ്ധ്യക്ഷനായി.
അരൂര്നിയോജകമണ്ഡലം പ്രസിഡന്റ് പെരുമ്പളം ജയകുമാര് മുഖ്യപ്രഭാഷണം നടത്തി. സംസ്ഥാന കൗണ്സില് അംഗം അഡ്വ. പി.കെ. ബിനോയ്, ജില്ലാ സെക്രട്ടറി സുമി ഷിബു, നിയോജക മണ്ഡലം പ്രസിഡന്റ് സാനു സുധീന്ദ്രന്, ജനറല് സെക്രട്ടറിമാരായ അരുണ് കെ. പണിക്കര്, എം.എസ്. ഗോപാലകൃഷ്ണന്, കേരള കോണ്ഗ്രസ് നിയോജകമണ്ഡലം പ്രസിഡന്റ് എബി, മഹിളാ മോര്ച്ച മണ്ഡലം പ്രസിഡന്റ് ഗോപിക, അഡ്വ. കെ.ആര്. അജിത്ത്, അഡ്വ. ബി. ബാലാനന്ദ് എന്നിവര് പ്രസംഗിച്ചു.
ആശുപത്രിയില് ചികിത്സതേടിയെത്തിയവരുള്പ്പെടെ നിരവധിയാളുകള് ജ്യോതിഷ് നടത്തിയ സമരത്തിന് പിന്തുണ അറിയിച്ചെത്തി.
