കണ്ണൂര്‍: എല്ലാവര്‍ക്കും അന്നം, വെള്ളം, മണ്ണ്, തൊഴില്‍, തുല്യനീതി എന്നീ മുദ്രാവാക്യമുയര്‍ത്തി ബിജെപി സംസ്ഥാന പ്രസിഡണ്ട് കുമ്മനം രാജശേഖരന്‍ നയിക്കുന്ന വിമോചന യാത്ര കണ്ണൂര്‍ ജില്ലയിലെ 11 സ്വീകരണ കേന്ദ്രങ്ങളിലെ ആവേശ്വോജ്ജല സ്വീകരണങ്ങള്‍ ഏറ്റുവാങ്ങി ഇന്നലെ വൈകുന്നേരം 4 മണിയോടെ വയനാട്ടിലേക്ക് യാത്രയായി. 20 ന് ഉപ്പളയില്‍ നിന്നും ആരംഭിച്ച യാത്രയ്‌ക്ക് അന്ന് രാത്രിയോടെ ജില്ലയിലെ ആദ്യ സ്വീകരണ സ്ഥലമായ പയ്യന്നൂര്‍ മുതല്‍ കഴിഞ്ഞ രണ്ടു ദിവസങ്ങളായ ജില്ലയിലെ വിവിധ മണ്ഡലങ്ങളില്‍ നടന്ന സ്വീകരണ പരിപാടികളിലെല്ലാം അഭൂതപൂര്‍വ്വമായ ജനസഞ്ചയമാണ് സമരനായകനെ ഒരു നോക്കു കാണാനും പ്രസംഗം ശ്രവിക്കാനും സമരനായകന്റെ അനുഗ്രഹ വര്‍ഷം ചൊരിയാനും എത്തിച്ചേര്‍ന്നത്. കമ്മ്യൂണിസ്റ്റുകള്‍ തങ്ങളുടെ കോട്ടയെന്ന് അവകാശപ്പെടുന്ന ചില മണ്ഡലങ്ങളിലടക്കം യാത്രയ്‌ക്ക് ലഭിച്ച സ്വീകരണം അക്ഷരാര്‍ത്ഥത്തില്‍ കണ്ണൂരിന്റെ മണ്ണില്‍ ഉണ്ടായിക്കൊണ്ടിരിക്കുന്ന മാറ്റങ്ങളുടെ നേര്‍ചിത്രമായി മാറി.
കഴിഞ്ഞ ഏതാനും മാസങ്ങളായി കണ്ണൂരിന്റെ ചുവപ്പ് കോട്ടകളില്‍നിന്നും ആയിരക്കണക്കിന് പാര്‍ട്ടിപ്രവര്‍ത്തകരും അനുഭാവികളും സിപിഎം ബന്ധം ഉപേക്ഷിച്ച് സംഘപരിവാര്‍ സംഘടനകളിലേക്ക് ചേക്കേറിക്കൊണ്ടിരിക്കുകയാണ്. ഇതനെ പ്രതിരോധിക്കാന്‍ ജില്ലയിലെ വിവിധ മേഖലകളില്‍ വ്യാപകമായി സംഘപരിവാര്‍ സംഘടനകള്‍ക്കും സ്ഥാപനങ്ങള്‍ക്കും നേരെ അക്രമം അഴിച്ച്‌വിട്ട് സംഘ പ്രസ്ഥാനങ്ങളുടെ വളര്‍ച്ചയെ തടയിടാന്‍ ശ്രമിച്ച സിപിഎം നേതൃത്വത്തിന് ശക്തമായ മുന്നറിയിപ്പു നല്‍കുന്നതായി കൂടി വിമോചനയാത്ര സ്വീകരണ പരിപാടികള്‍ മാറി.
കാലഹരണപ്പെട്ട കമ്മ്യൂണിസ്റ്റ് പ്രത്യയശാസ്ത്രത്തിന്റെ അന്ത്യത്തിന് കണ്ണൂര്‍ ജില്ലയില്‍ തുടക്കമായിക്കഴിഞ്ഞു എന്ന് വിളിച്ചോതുന്നതായിരുന്നു യാത്രക്ക് ജില്ലയില്‍ ലഭിച്ചസ്വീകാര്യത. മാര്‍ക്‌സിസ്റ്റ് കേന്ദ്രങ്ങളില്‍നിന്നുപോലും നൂറുകണക്കിന് ആളുകളാണ് യാത്രയുടെ വിവിധ സ്വീകരണ കേന്ദ്രങ്ങളില്‍ കഴിഞ്ഞ രണ്ട് ദിവസങ്ങളില്‍ ഒഴുകിയെത്തിയത്. സ്വാമി ആനന്ദ തീര്‍ത്ഥന്റെ സ്മൃതിമണ്ഡപത്തില്‍ വണങ്ങി പയ്യന്നൂരില്‍ നിന്ന് ആരംഭിച്ച യാത്രാനായകന്‍ അവശതയും ദുരിതവുമനുഭവിക്കുന്ന ജില്ലയിലെ വിവിധ ആനാഥാലയങ്ങളിലും പിന്നോക്ക വിഭാഗങ്ങള്‍ തിങ്ങിപ്പാര്‍ക്കുന്ന കോളനികളിലും സന്ദര്‍ശനം നടത്തി ഇവര്‍ക്കെല്ലാം സാന്ത്വന സ്പര്‍ശം നല്‍കി. കൂടാതെ കമ്മ്യൂണിസ്റ്റ് ക്രൂരതയില്‍ ദേശീയ പ്രസ്ഥാനങ്ങള്‍ക്കുവേണ്ടി ജീവന്‍ ബലികൊടുക്കേണ്ടിവന്ന ബലിദാനി കുടുംബങ്ങളെ സമാശ്വസിപ്പിച്ചും സ്‌നേഹവര്‍ഷം ചൊരിഞ്ഞും യാത്രാ നായകന്‍ കണ്ണൂരിലൂടെ കടന്നുപോയപ്പോള്‍ കണ്ണൂരിലെ ദേശീയ പ്രസ്ഥാനങ്ങളുടെ ചരിത്രത്തില്‍ മാറ്റത്തിന്റെ പുതിയൊരധ്യായം കുറിക്കുകയായിരുന്നു.
