പാലാ: പാതവികസനത്തിന്റെ ഭാഗമായി റോഡില്‍ റെഡിമെയ്ഡ് കലുങ്ക് സ്ഥാപിക്കുന്നതിനിടെ നാലു തൊഴിലാളികള്‍ക്ക് വൈദ്യുതാഘാതമേറ്റു. മലയാളികളായ അനന്ദന്‍(28), മഹേഷ് (29) തമിഴ്‌നാട് സ്വദേശി ഗണേശ് (28) ബംഗാള്‍ സ്വദേശി ഗാമേശ്വര്‍ (45) എന്നിവര്‍ക്കാണ് പരിക്കേറ്റത്. ഇവരെ പാലായിലെ സ്വകാര്യ ആശുത്രിയില്‍ പ്രവേശിപ്പിച്ചു. ആരുടെയും നില ഗുരുതരമല്ലെന്ന് ആശുപത്രി അധികൃതര്‍ അറിയിച്ചു. ഇന്നലെ വൈകിട്ട് 5 മണിയോടെയാണ് സംഭവം.
പാലാ പൊന്‍കുന്നം റോഡില്‍ പന്ത്രണ്ടാം മൈല്‍ ഭാഗത്താണ് അപകടം സംഭവിച്ചത്. ക്രയിന്‍ ഉപയോഗിച്ച് കലുങ്ക് സ്ഥാപിക്കുന്നതിനിടെ ക്രയിനിന്റെ കൈ 11 കെ.വി. വൈദ്യുത ലൈനില്‍ തട്ടിയതാണ് അപകടത്തിനിടയാക്കിയത്. ക്രയിനില്‍ ഇറക്കിയ റഡിമൈയ്ഡ് കലുങ്ക് യഥാസ്ഥാനത്ത് വയ്‌ക്കുന്ന ജോലിയിലേര്‍പ്പെട്ടിരുന്നവര്‍ക്കാണ് വൈദ്യാതാഘാതമേറ്റത്.
വൈദ്യുതിബോര്‍ഡ് ഉദ്യോഗസ്ഥരുടെ അനാസ്ഥയാണ് അപകടത്തിനിടയാക്കിയതെന്ന് പറയുന്നു. പണി നടക്കുന്നിടത്ത് 33 കെ.വി. ലൈനും 11 കെ.വി. ലൈനും കടന്നു പോകുന്നുണ്ട്. ലൈന്‍ ഓഫാക്കിയെന്ന് അറിയിച്ചതിനെത്തുടര്‍ന്നാണ് പണി ആരംഭിച്ചതെന്ന് കരാറുകാരുടെ വക്താവ് കൃഷ്ണകുമാര്‍ പറഞ്ഞു. എന്നാല്‍ 33 കെ.വി. ലൈന്‍ മാത്രമാണ് ഓഫാക്കാന്‍ ആവശ്യപ്പെട്ടിരുന്നതെന്നും 11 കെ.വി.യുടെ കാര്യം പറഞ്ഞിരുന്നില്ലെന്നും കെ.എസ്.ഇ.ബി. അധികൃതര്‍ പറഞ്ഞു. കരാറുകാരുടെ വര്‍ക്ക് കോര്‍ഡിനേറ്ററുടെ അലംഭാവമാണ് സംഭവത്തിനിടയാക്കിയതെന്നും ആക്ഷേപമുണ്ട്. ഏതായാലും വന്‍ ദുരന്തം ഒഴിവായതിന്റെ ആശ്വാസത്തിലാണ് ഒരു നാടു മുഴുവന്‍.
