തിരുവനന്തപുരം: ജനജീവിതം ദുസഹമാക്കുന്ന വൈദ്യുതി നിയന്ത്രണത്തിനും പവര്‍കട്ടിനുമെതിരെ ബിജെപിയുടെ നേതൃത്വത്തില്‍ ടോര്‍ച്ച് തെളിയിച്ചും പന്തം കത്തിച്ചും രാത്രിയില്‍ വ്യാപക പ്രതിഷേധം നടത്തി.
പട്ടത്ത് വൈദ്യുതി ഭവനു മുന്നില്‍ ഇരുണ്ടകാലത്തെ ഓര്‍മിപ്പിച്ചുകൊണ്ട് മൊബൈല്‍ ഫോണിലെ ടോര്‍ച്ച് തെളിയിച്ചാണ് പ്രവര്‍ത്തകര്‍ പ്രതിഷേധിച്ചത്. സാധാരണക്കാരായ ജനങ്ങളെയും കച്ചവടക്കാരെയും വിദ്യാര്‍ത്ഥികളെയും ഒരുപോലെ ദുരിതത്തിലാക്കുന്ന സര്‍ക്കാരിന്റെയും കെഎസ്ഇബിയുടെയും അനാസ്ഥയ്‌ക്കെതിരെ ശക്തമായ മുന്നറിയിപ്പ് നല്‍കി.
സംസ്ഥാന കൗണ്‍സില്‍ അംഗം കരിക്കകം മണികണ്ഠന്‍ ചടങ്ങില്‍ മുഖ്യപ്രഭാഷണം നടത്തി. വൈദ്യുതി വിതരണത്തിലെ അനിശ്ചിതത്വം ഉടന്‍ പരിഹരിച്ചില്ലെങ്കില്‍ സമരം കൂടുതല്‍ ശക്തമാക്കുമെന്ന് കരിക്കകം മണികണ്ഠന്‍ പറഞ്ഞു. ബിജെപിയുടെ വിവിധ മണ്ഡലങ്ങളില്‍ നിന്നുള്ള നിരവധി പ്രവര്‍ത്തകരും സമരത്തില്‍ പങ്കെടുത്തു.
സിറ്റി ജില്ലാ വൈസ് പ്രസിഡന്റ് ജയശ്രീ ഗോപാലകൃഷ്ണന്‍, മണ്ഡലം പ്രസിഡന്റ് ജി. മഹാദേവന്‍, ജനറല്‍ സെക്രട്ടറി രാജേഷ് കുമാര്‍, കിസാന്‍ മോര്‍ച്ച ജില്ലാ ജനറല്‍ സെക്രട്ടറി വിഷ്ണു ജെ, മഹിളാ മോര്‍ച്ച മണ്ഡലം പ്രസിഡന്റ് സംഗീത, കേശവദാസപുരം ഏരിയ പ്രസിഡന്റ് സൂര്യദേവന്‍ തമ്പി എന്നിവര്‍ സംസാരിച്ചു.
