ദുബായ്: ശ്രീലങ്കന് പര്യടനത്തിലെ മിന്നും പ്രകടനത്തിന് പിന്നാലെ അന്താരാഷ്ട്ര ക്രിക്കറ്റ് കൗണ്സിലിന്റെ (ഐസിസി) ഏറ്റവും പുതിയ പുരുഷ ടെസ്റ്റ് ബാറ്റിങ് റാങ്കിങ്ങില് ഭാരത താരം ദേവ്ദത്ത് പടിക്കലിന് വന് മുന്നേറ്റം. ശ്രീലങ്കയ്ക്കെതിരായ ടെസ്റ്റ് പരമ്പരയില് തുടര്ച്ചയായ രണ്ട് മത്സരങ്ങളിലും സെഞ്ചുറി നേടിയ മലയാളി താരം അഞ്ച് സ്ഥാനങ്ങള് മെച്ചപ്പെടുത്തി 54-ാം സ്ഥാനത്തെത്തി. അതേസമയം, ഭാരതത്തിനെതിരായ പരമ്പരയില് തകര്പ്പന് ചെറുത്തുനില്പ്പ് നടത്തിയ ശ്രീലങ്കയുടെ യുവതാരം സോണാല് ദിനുഷ 29 സ്ഥാനങ്ങള് ഒറ്റയടിക്ക് മുന്നേറി 25-ാം സ്ഥാനത്തേക്ക് കുതിച്ചു.
ഭാരത ടെസ്റ്റ് ടീമിലേക്കുള്ള തിരിച്ചുവരവ് അവിസ്മരണീയമാക്കിയ പ്രകടനമാണ് 26കാരനായ ഇടംകൈയന് ബാറ്റര് ദേവ്ദത്ത് പടിക്കല് ലങ്കന് പര്യടനത്തില് കാഴ്ചവെച്ചത്. ശ്രീലങ്കയ്ക്കെതിരായ രണ്ട് ടെസ്റ്റുകളുടെ പരമ്പരയില് 109.33 ശരാശരിയില് 328 റണ്സാണ് പടിക്കല് അടിച്ചുകൂട്ടിയത്. ഗാളില് നടന്ന ആദ്യ ടെസ്റ്റിലും തുടര്ന്ന് കൊളംബോയില് നടന്ന രണ്ടാം ടെസ്റ്റിലും പടിക്കല് മൂന്നക്കം കടന്നു. കൊളംബോ ടെസ്റ്റിലെ ഒന്നാം ഇന്നിങ്സില് നേടിയ 117 റണ്സ് മത്സരത്തില് നിര്ണായകമായി. ഭാരതം 1-0ന് സ്വന്തമാക്കിയ ഈ പരമ്പരയിലെ ഏറ്റവും വലിയ കണ്ടെത്തലുകളില് ഒന്നായി പടിക്കല് മാറി.
ഭാരത ബൗളര്മാര്ക്കെതിരെ അവിശ്വസനീയമായ പോരാട്ടവീര്യം പുറത്തെടുത്ത ശ്രീലങ്കന് യുവതാരം സോണാല് ദിനുഷയാണ് പരിഷ്കരിച്ച റാങ്കിങ് പട്ടികയില് ഇത്വണത്തെ പ്രധാന താരം. കൊളംബോ ടെസ്റ്റില് ഭാരതം ഫോളോഓണ് ചെയ്യിച്ചിട്ടും പൊരുതിനിന്ന ദിനുഷ, ആദ്യ ഇന്നിങ്സില് 103 റണ്സും രണ്ടാം ഇന്നിങ്സില് പുറത്താകാതെ 133 റണ്സും നേടി. ഭാരതത്തിന്റെ സമ്പൂര്ണ പരമ്പര വിജയം തടഞ്ഞ് മത്സരം സമനിലയിലാക്കാന് ദിനുഷയുടെ ഈ ഇന്നിങ്സുകള് സഹായിച്ചു. ഈ പ്രകടനത്തോടെ ഐസിസി ടെസ്റ്റ് ബാറ്റിങ് റാങ്കിങ്ങില് 29 സ്ഥാനങ്ങള് മെച്ചപ്പെടുത്തി 25-ാമതെത്തി. ശ്രീലങ്കയുടെ കമിന്ദു മെന്ഡിസ് രണ്ട് സ്ഥാനങ്ങള് മെച്ചപ്പെടുത്തി പത്താം സ്ഥാനത്തെത്തി. പാകിസ്താന്റെ സൗദ് ഷക്കീല് 15 സ്ഥാനങ്ങള് ഉയര്ന്ന് 18-ാം സ്ഥാനത്തെത്തി. ഇംഗ്ലണ്ടിന്റെ ഹാരി ബ്രൂക്ക് ഒന്നാം സ്ഥാനത്ത് തുടരുമ്പോള് സ്റ്റീവ് സ്മിത്ത് രണ്ടാമതും ജോ റൂട്ട് മൂന്നാമതുമുണ്ട്. ലോര്ഡ്സ് ടെസ്റ്റില് തിളങ്ങിയ ഇംഗ്ലണ്ട് പേസര് ഒല്ലി റോബിന്സണ് അഞ്ചാം സ്ഥാനത്തേക്ക് തിരിച്ചെത്തി. ഓസ്ട്രേലിയയുടെ മിച്ചല് സ്റ്റാര്ക്കാണ് ഒന്നാം സ്ഥാനത്ത്. കൊളംബോയില് മികച്ച പ്രകടനം നടത്തിയ ശ്രീലങ്കയുടെ അസിത ഫെര്ണാണ്ടോ 11-ാം സ്ഥാനത്തേക്ക് ഉയര്ന്നു. ബാറ്റിങ് റാങ്കിങ്ങില് ഭാരതത്തിന്റെ ഇഷാന് കിഷന് ഒന്നാം സ്ഥാനത്തും അഭിഷേക് ശര്മ മൂന്നാം സ്ഥാനത്തും തുടരുന്നു. റാഷിദ് ഖാനാണ് ടി20 ബൗളിങ്ങില് ഒന്നാമത്.
