കൊളംബോ: ഭാരത ടെസ്റ്റ് ക്രിക്കറ്റ് ടീം തേടുന്നത് പുതിയൊരു യുഗപ്പിറവിയാണ്. അതിനായുള്ള ശ്രമങ്ങളാണ് ശുഭ്മാന് ഗില് നായകനായ ടീം ചെയ്തുകൊണ്ടിരിക്കുന്നത്. ഇപ്പോഴത്തെ ടീമില് അവശേഷിക്കുന്ന ഒരേയൊരു മുന്നിര താരം രവീന്ദ്ര ജഡേജ മാത്രമാണ്. മുന്പ് ഇതുപോലൊരു സാഹചര്യത്തിലാണ് വിരാട് കോഹ്ലി ഭാരതത്തിന്റെ ക്യാപ്റ്റന്സിയിലേക്ക് ഉയര്ത്തപ്പെട്ടത്. 2014-15 ഓസ്ട്രേലിയന് പര്യടനത്തിന്റെ പാതിക്കുവച്ച് ക്യാപ്റ്റന് എം.എസ്. ധോണി പെട്ടെന്ന് വിരമിക്കല് പ്രഖ്യാപിക്കുകയായിരുന്നു. സച്ചിന്, ദ്രാവിഡ്, ലക്ഷ്മണ് തുടങ്ങിയ നിരയിലെ ഏറ്റവും അവസാനത്തെ ആളായാണ് ധോണിയും കൊഴിഞ്ഞുപോയത്. പുതിയൊരു തലമുറയെ നയിക്കാനുള്ള നിയോഗം ലഭിച്ച കോഹ്ലിക്ക് കാര്യങ്ങള് ഒട്ടും എളുപ്പമായിരുന്നില്ല. 2015ശ്രീലങ്കന് പര്യനടത്തില് കൊളംബോ ടെസ്റ്റിലൂടെയാണ് കോഹ്ലി ക്യാപ്റ്റന് എന്ന നിലയില് വ്യക്തിമുദ്ര പതിപ്പിച്ചുതുടങ്ങിയത്.
അന്ന് കൊളംബോയിലെ സിംഹളീസ് സ്പോര്ട്സ് ക്ലബ്ബ് ഗ്രൗണ്ടില് പേസ് ബൗളര്മാരെ മുന്നില് നിര്ത്തി വിരാട് കോഹ്ലി ഭാരതത്തിന്റെ പുതിയൊരു ടെസ്റ്റ് യുഗത്തിന് തുടക്കമിട്ടതുപോലെ, ഒരു പതിറ്റാണ്ടിനുശേഷം അതേ വേദിയില് ക്യാപ്റ്റന്സിയില് സ്വന്തം വ്യക്തിമുദ്ര പതിപ്പിക്കാനുള്ള സുവര്ണാവസരമാണ് ശുഭ്മന് ഗില്ലിന് മുന്നിലുള്ളത്. ശ്രീലങ്കയ്ക്കെതിരായ രണ്ടാം ടെസ്റ്റില് പരമ്പര തൂത്തുവാരി വിദേശ മണ്ണിലെ ആദ്യ പ്രധാന ടെസ്റ്റ് പരമ്പര വിജയം സ്വന്തം പേരിലാക്കാനാണ് യുവ നായകന് ലക്ഷ്യമിടുന്നത്. 2015ല് ഇഷാന്ത് ശര്മ, ഉമേഷ് യാദവ് എന്നിവരെ കൃത്യമായി പിന്തുണച്ച് കോഹ്ലി വിജയം കൊയ്തതുപോലെ, പ്രസിദ്ധ് കൃഷ്ണയേയും മാനവ് സുത്താറിനെയും പോലെയുള്ള യുവതാരങ്ങളില് പൂര്ണ വിശ്വാസമര്പ്പിച്ച് മികച്ച പ്രകടനം പുറത്തെടുക്കാന് ഗില്ലിന് സാധിക്കുമെന്ന് ഗാള് ടെസ്റ്റിലൂടെ തെളിയിച്ചു. ഗാളിലെ അനുകൂലമായി തിരിഞ്ഞ ബൗളിങ് മാറ്റങ്ങളും ഫീല്ഡ് ക്രമീകരണങ്ങളും ഗില്ലിന്റെ ക്യാപ്റ്റന്സി പക്വത പ്രാപിക്കുന്നതിന്റെ വ്യക്തമായ സൂചന നല്കി. ഇംഗ്ലണ്ട് പര്യടനത്തിലെ പോരാട്ടവീര്യത്തിന് ശേഷം ഒരു വിദേശ പരമ്പര പൂര്ണമായി സ്വന്തമാക്കാനുള്ള ഏറ്റവും മികച്ച അവസരമാണ് കൊളംബോയില് ഗില്ലിനെ കാത്തിരിക്കുന്നത്.
ഗാളില് നടന്ന ഒന്നാം ടെസ്റ്റില് ആതിഥേയരായ ശ്രീലങ്കയെ 165 റണ്സിന് പരാജയപ്പെടുത്തി ഭാരതം രണ്ട് മത്സരങ്ങളടങ്ങിയ പരമ്പരയില് 1-0 ന് മുന്നിലെത്തി. വിദേശ മണ്ണിലെ ആദ്യ ടെസ്റ്റില് തന്നെ മത്സരത്തില് ആകെ 10 വിക്കറ്റുകള് വീഴ്ത്തി (രണ്ടാം ഇന്നിങ്സില് 6/55) യുവ ഇടങ്കയ്യന് സ്പിന്നര് മാനവ് സുത്താര് ഭാരത വിജയത്തില് നിര്ണായക പങ്കുവഹിച്ചു. ക്യാപ്റ്റന്റെ പൂര്ണ പിന്തുണയോടെ പന്തെറിഞ്ഞ പേസര് പ്രസിദ്ധ് കൃഷ്ണ രണ്ട് ഇന്നിങ്സുകളിലുമായി മികച്ച ഫോമില് പന്തെറിയുകയും എതിരാളികളെ പ്രതിരോധത്തിലാക്കുകയും ചെയ്തു. കൊളംബോയില് നടക്കുന്ന രണ്ടാം ടെസ്റ്റില് വിജയം നേടി 2-0ന് പരമ്പര സ്വന്തമാക്കി ലോക ടെസ്റ്റ് ചാമ്പ്യന്ഷിപ്പ് ഫൈനല് ബെര്ത്ത് പ്രതീക്ഷ നിലനിര്ത്തല് കൂടി ഭാരതത്തിന്റെ ലക്ഷ്യമാണ്.
