ഭീകര ശൃംഖലകൾക്കെതിരെ ആക്രമണം നടത്താനുള്ള ഇന്ത്യയുടെ കഴിവ് ഓപ്പറേഷൻ സിന്ദൂർ തെളിയിച്ചു: പ്രസിഡന്റ് മുർമു

ന്യൂദൽഹി: 80-ാമത് സ്വാതന്ത്ര്യദിനത്തോടനുബന്ധിച്ച് വെള്ളിയാഴ്ച രാജ്യത്തെ അഭിസംബോധന ചെയ്യവെ ഭീകര ശൃംഖലകൾക്കെതിരെ കൃത്യമായ ആക്രമണങ്ങൾ നടത്താനുള്ള ഇന്ത്യൻ സായുധ സേനയുടെ കഴിവ് ഓപ്പറേഷൻ സിന്ദൂർ തെളിയിച്ചതായി പ്രസിഡൻ്റ് ദ്രൗപതി മുർമു. സിന്ധു നദീജല ഉടമ്പടിയെക്കുറിച്ച് സംസാരിക്കുമ്പോൾ തീവ്രവാദത്തെ സംരക്ഷിക്കുന്ന രാജ്യവുമായുള്ള സിന്ധു നദീജല കരാർ താൽക്കാലികമായി നിർത്തിവച്ചത് ദേശീയ താൽപ്പര്യത്തിലെ നിർണായക നടപടിയാണെന്ന് അവർ പറഞ്ഞു.

വിഭജനവുമായി ബന്ധപ്പെട്ട അക്രമങ്ങളിൽ കൊല്ലപ്പെട്ടവരെ  ഓർക്കുന്നു

“ഇന്ന്, ഓഗസ്റ്റ് 14 ന്, നാം വിഭജന ഭീകരത ഓർമ്മ ദിനം ആചരിക്കുന്നു. വിഭജനവുമായി ബന്ധപ്പെട്ട അക്രമത്തിൽ കൊല്ലപ്പെട്ടവരോ കുടിയിറക്കത്തിന്റെ ദുരന്തം സഹിക്കാൻ നിർബന്ധിതരായവരോ ആയ ദശലക്ഷക്കണക്കിന് പൗരന്മാരെ നാം ഓർക്കുന്നു. വർഗീയ അക്രമം ദശലക്ഷക്കണക്കിന് ആളുകളെ അഭയാർത്ഥികളാകാനും വിഭജനത്തിന്റെ ഭീകരത അനുഭവിക്കാനും നിർബന്ധിതരാക്കി. എന്നിട്ടും, അവർ തങ്ങളുടെ സ്വത്വം ഉപേക്ഷിച്ചില്ല. നമ്മുടെ രാജ്യം സ്വതന്ത്രമായപ്പോൾ, വിഭജനത്തിന്റെ ഗുരുതരമായ പ്രത്യാഘാതങ്ങൾക്കൊപ്പം, 550-ലധികം നാട്ടുരാജ്യങ്ങൾ പുതുതായി സ്വതന്ത്രമായ ഇന്ത്യയിലേക്ക് സംയോജിപ്പിക്കുന്നതും അസാധാരണമായ ഒരു വെല്ലുവിളിയായിരുന്നു.” – പ്രസിഡന്റ് മുർമു പറഞ്ഞു.

സമൂഹത്തിലെ പിന്നാക്ക വിഭാഗങ്ങൾക്ക് നീതി യഥാസമയം ലഭിക്കണം

“എല്ലാ പൗരന്മാർക്കും, പ്രത്യേകിച്ച് സമൂഹത്തിലെ പിന്നാക്കം നിൽക്കുന്ന വിഭാഗങ്ങളിൽ നിന്നുള്ളവർക്ക്, തുല്യതയുടെയും അന്തസ്സിന്റെയും അടിസ്ഥാനത്തിൽ സമയബന്ധിതമായി നീതി ലഭിക്കണം. കഴിഞ്ഞ ദശകത്തിലും അതിനുമപ്പുറവും, നമ്മുടെ രാജ്യം ദ്രുതവും സമഗ്രവുമായ വികസനം കൈവരിച്ചു. പൈതൃകത്തിന്റെയും വികസനത്തിന്റെയും യോജിപ്പുള്ള സംയോജനത്തിന് ഞങ്ങൾ മുൻഗണന നൽകി, പുരോഗതിക്ക് തടസ്സമായി നിന്നിരുന്ന നിരവധി പതിറ്റാണ്ടുകൾ പഴക്കമുള്ള തടസ്സങ്ങൾ നീക്കം ചെയ്തു,”- രാഷ്‌ട്രത്തെ അഭിസംബോധന ചെയ്തുകൊണ്ട് പ്രസിഡന്റ് മുർമു പറഞ്ഞു.

ദാരിദ്ര്യത്തിൽ നിന്ന് മോചിപ്പിച്ചു

കഴിഞ്ഞ ദശകത്തിൽ 25 കോടി ആളുകളെ ദാരിദ്ര്യത്തിൽ നിന്ന് മോചിപ്പിച്ചതായി പ്രസിഡന്റ് മുർമു പറഞ്ഞു. കഴിഞ്ഞ ദശകത്തിൽ സമഗ്ര വികസന സംരംഭങ്ങളിലൂടെ 25 കോടിയിലധികം ആളുകളെ ദാരിദ്ര്യത്തിൽ നിന്ന് മോചിപ്പിച്ചുവെന്ന് പറഞ്ഞ പ്രസിഡന്റ് മുർമു, 80 കോടിയിലധികം ഗുണഭോക്താക്കൾക്ക് ഭക്ഷ്യസുരക്ഷ ഉറപ്പാക്കുന്ന സൗജന്യ റേഷൻ പദ്ധതി കൈവരിക്കാൻ കഴിഞ്ഞുവെന്ന് രാജ്യത്തെ അഭിസംബോധന ചെയ്തുകൊണ്ട് പറഞ്ഞു.

സായുധ സേനകളെ അഭിനന്ദിക്കുന്നു

“മൂന്ന് സായുധ സേനകളിലെയും എല്ലാ സായുധ പോലീസ് സേനകളിലെയും പോലീസ് ഉദ്യോഗസ്ഥരെയും അവരുടെ കർത്തവ്യസനത്തിന് ഞാൻ അഭിനന്ദിക്കുന്നു. ആഗോളതലത്തിൽ രാജ്യത്തിന്റെ ബഹുമാനവും അന്തസ്സും വർദ്ധിപ്പിക്കുന്ന ഇന്ത്യക്കാരെയും വിദേശത്തുള്ള ഇന്ത്യൻ എംബസികളിൽ ജോലി ചെയ്യുന്ന പൗരന്മാരെയും ഞാൻ അഭിനന്ദിക്കുന്നു,” – പ്രസിഡന്റ് മുർമു പറഞ്ഞു.

സമ്പദ്‌വ്യവസ്ഥ വളർച്ച കൈവരിച്ചു

ലോകത്തിലെ റിയൽ-ടൈം ഡിജിറ്റൽ ഇടപാടുകളുടെ പകുതിയിലധികവും ഇന്ത്യയിലാണെന്നും ആഗോള യുദ്ധം, അസ്ഥിരത എന്നിവ ഉണ്ടായിരുന്നിട്ടും ഇന്ത്യൻ സമ്പദ്‌വ്യവസ്ഥ ആഗോള ശരാശരിയുടെ ഇരട്ടിയിലധികം വളർച്ച കൈവരിക്കുമെന്ന് പ്രതീക്ഷിക്കുന്നുണ്ടെന്നും പ്രസിഡൻ്റ് കൂട്ടിച്ചേർത്തു. കൂടാതെ ഇന്ത്യയെ നക്സൽ വിമുക്തമാക്കുന്നത് പ്രധാന ദേശീയ നേട്ടമാണെന്ന് പ്രസിഡന്റ് മുർമു പറഞ്ഞു, കൂടാതെ ബസ്തറിലെ ദ്രുത വികസനം, സാംസ്കാരിക പങ്കാളിത്തം എന്നിവയെക്കുറിച്ചും അവർ പരാമർശിച്ചു.

യുവശക്തിയെ ഒഴിവാക്കാനാകില്ല

പൊതു പരീക്ഷകൾ പരിഷ്കരിക്കുന്നതിനും, അന്യായമായ മാർഗങ്ങൾ തടയുന്നതിനും, യുവാക്കൾക്ക് സുതാര്യത ഉറപ്പാക്കുന്നതിനും സർക്കാർ സമഗ്രമായ നടപടികൾ സ്വീകരിക്കുന്നുണ്ടെന്ന് പ്രസിഡന്റ് മുർമു കൂട്ടിച്ചേർത്തു. ശരാശരി 28 വയസ്സ് പ്രായമുള്ള യുവ സംഘം നയിച്ച വിജയകരമായ ബഹിരാകാശ റോക്കറ്റ് വിക്ഷേപണം യുവശക്തിയെ എടുത്തുകാണിക്കുന്നുവെന്ന് അവർ പറഞ്ഞു.