ന്യൂദൽഹി: 2027 ആകുമ്പോഴേക്കും ജപ്പാനെയും ബ്രിട്ടനെയും മറികടന്ന് ഇന്ത്യ ലോകത്തിലെ നാലാമത്തെ വലിയ സമ്പദ്‌വ്യവസ്ഥയായി മാറിയേക്കാം. എന്നിരുന്നാലും അഞ്ച് ട്രില്യൺ ഡോളർ സമ്പദ്‌വ്യവസ്ഥയാകുക എന്ന ഇന്ത്യയുടെ ലക്ഷ്യം ഒരു വർഷം കൂടി മുന്നോട്ട് പോയേക്കാം. രൂപയുടെ മൂല്യം ഇടിഞ്ഞതാണ് കാരണം.
അന്താരാഷ്‌ട്ര നാണയ നിധിയുടെ (IMF) ഏറ്റവും പുതിയ വേൾഡ് ഇക്കണോമിക് ഔട്ട്‌ലുക്ക് (WEO) ഡാറ്റാബേസ് വിശകലനം ചെയ്യുന്ന വേളയിലാണ് ഇത് തെളിഞ്ഞ് വരുന്നത്. 2028 ഏപ്രിലിലെ പ്രവചനവുമായി താരതമ്യപ്പെടുത്തുമ്പോൾ, 2029 ൽ ഇന്ത്യയുടെ സമ്പദ്‌വ്യവസ്ഥ 5 ട്രില്യൺ ഡോളർ കടക്കുമെന്ന് ഇപ്പോൾ പ്രവചിക്കപ്പെടുന്നു.
2027 ആകുമ്പോഴേക്കും ആഗോള സാമ്പത്തിക റാങ്കിംഗിൽ ഇന്ത്യ യുഎസ്, ചൈന, ജർമ്മനി എന്നിവയ്‌ക്ക് പിന്നിൽ നാലാം സ്ഥാനത്തെത്തുമെന്ന് പ്രതീക്ഷിക്കുന്നു. IMF ന്റെ ഒക്ടോബർ മാസത്തെ പ്രവചനങ്ങൾ പ്രകാരം, ഇന്ത്യയുടെ ജിഡിപി 2027 ൽ 4.52 ട്രില്യൺ ഡോളറിലെത്തുമെന്ന് പ്രതീക്ഷിക്കുന്നു. ബ്രിട്ടന്റെ ജിഡിപിയായ 4.49 ട്രില്യൺ ഡോളറിനേക്കാളും ജപ്പാന്റെ ജിഡിപി 4.47 ട്രില്യൺ ഡോളറിനേക്കാളും ഇത് അല്പം കൂടുതലാണ്.
ഈ മാറ്റം ആഗോള സാമ്പത്തിക റാങ്കിംഗിൽ ഒരു പ്രധാന മാറ്റമായിരിക്കും. എന്നിരുന്നാലും ഈ മൂന്ന് സമ്പദ്‌വ്യവസ്ഥകളും തമ്മിലുള്ള വ്യത്യാസം വളരെ ചെറുതാണ്. അതായത്, വിനിമയ നിരക്കിലെ ഏറ്റക്കുറച്ചിലുകൾ അന്തിമ ഫലങ്ങളെ മാറ്റിമറിച്ചേക്കാം. IMF ന്റെ ഏറ്റവും പുതിയ പ്രവചനങ്ങൾ അനുസരിച്ച് ഇന്ത്യയുടെ സമ്പദ്‌വ്യവസ്ഥ 2030 ൽ 6.13 ട്രില്യൺ ഡോളറായും 2031 ൽ 6.74 ട്രില്യൺ ഡോളറായും വളരുമെന്ന് പ്രതീക്ഷിക്കുന്നു. അപ്പോൾ ഇന്ത്യ ജർമ്മനിയെ മറികടന്ന് ലോകത്തിലെ മൂന്നാമത്തെ വലിയ സമ്പദ്‌വ്യവസ്ഥയായി മാറും.
