ന്യൂദല്ഹി: ഏഷ്യന് ഗെയിംസിന് തയ്യാറെടുക്കുന്നതിനിടെ ഭാരത ഗുസ്തി താരം ദീപാന്ഷുവിന് സസ്പെന്ഷന്. ദേശീയ ഉത്തേജക വിരുദ്ധ ഏജന്സി (നാഡാ) നടത്തിയ പരിശോധനയില് നിരോധിത അനാബോളിക് സ്റ്റീറോയിഡായ ‘സ്റ്റാനോസൊലോള്’ കണ്ടെത്തിയതിനെ തുടര്ന്നാണ് നടപടി.
130 കിലോഗ്രാം വിഭാഗത്തില് ഏഷ്യന് ഗെയിംസിനായി ലഖ്നൗവില് നടന്ന സെലക്ഷന് ട്രയല്സില് വിജയിച്ച് ദേശീയ ടീമില് ഇടം നേടിയ താരമായിരുന്നു ദീപാന്ഷു. സസ്പെന്ഷനെ തുടര്ന്ന് താരത്തെ ദേശീയ ക്യാമ്പില് നിന്നും ടീമില് നിന്നും ഒഴിവാക്കി. ട്രയല്സില് രണ്ടാം സ്ഥാനത്തെത്തി റിസര്വ് താരമായിരുന്ന റോണക് ദാഹിയയെ 130 കിലോഗ്രാം വിഭാഗത്തില് ഉള്പ്പെടുത്തി. ദീപാന്ഷു രണ്ടാമതാണ് ഉത്തേജക പരിശോധനയില് പരാജയപ്പെടുന്നത്. മുന്പും ഇതേ നിരോധിത മരുന്ന് ഉപയോഗിച്ചതിന് താരം മൂന്ന് വര്ഷത്തെ വിലക്ക് നേരിട്ടിരുന്നു. തുടര്ച്ചയായ രണ്ടാം വീഴ്ചയായതിനാല് എട്ട് വര്ഷം വരെ നീളുന്ന കടുത്ത വിലക്ക് നേരിടേണ്ടി വന്നേക്കും. ലഖ്നൗവിലെ ക്യാമ്പില് വെച്ച് ശേഖരിച്ച സാംപിളുകള് നാഷണല് ഡോപ് ടെസ്റ്റിംഗ് ലബോറട്ടറിയില് പരിശോധിച്ചപ്പോഴാണ് നിരോധിത മരുന്നിന്റെ സാന്നിധ്യം സ്ഥിരീകരിച്ചത്.
