ന്യൂദല്ഹി: 2022ലെ ദേശീയ ഉത്തേജക വിരുദ്ധ നിയമവും 2025ലെ ദേശീയ ഉത്തേജക വിരുദ്ധ ഭേദഗതി നിയമവും നിലവില് വന്നു. ഇത് സംബന്ധിച്ച് കേന്ദ്രസര്ക്കാര് വിജ്ഞാപനമിറക്കി.
ആഗോള ആന്റിഡോപ്പിങ് മാനദണ്ഡങ്ങള്ക്കനുസരിച്ചാണ് രാജ്യത്തെ നിയമത്തില് ഭേദഗതി വരുത്തിയത്. ഇതിലൂടെ കായികരംഗത്ത് ഉത്തേജക മരുന്ന് ഉപയോഗിക്കുന്നത് തടയുന്നതിനൊപ്പം അത്ലറ്റുകളുടെ അവകാശങ്ങള് സംരക്ഷിക്കുന്നതിനും അന്താരാഷ്ട്രതലത്തില് അംഗീകരിക്കപ്പെട്ട ഉത്തേജക വിരുദ്ധ മാനദണ്ഡങ്ങള്ക്കനുസൃതമായി കായിക മത്സരത്തിന് നിയമപരമായ പ്രാബല്യം നല്കുന്നതിനും സാധിക്കും.
നാഷണല് ആന്റി-ഡോപ്പിങ് ഏജന്സി (നാഡ) ഡയറക്ടര് ജനറലിനും അതിലെ അംഗങ്ങള്ക്കും ഇടപെടലുകളില്ലാതെ സ്വതന്ത്രമായി പ്രവര്ത്തിക്കാനുള്ള നിയമപരമായ പരിരക്ഷ നിയമത്തിലൂടെ ഉറപ്പാക്കിയിട്ടുണ്ട്. നാഷണല് ബോര്ഡിന് ഡിസിപ്ലിനറി പാനല്, അപ്പീല് പാനല് എന്നിവരില് നിന്ന് വിവരങ്ങള് തേടാനും അവര്ക്ക് നിര്ദേശങ്ങള് നല്കാനുമുള്ള അധികാരം ഈ ഭേദഗതിയിലൂടെ ഒഴിവാക്കി. മുന്പ് അപ്പീല് പാനല് രൂപീകരിക്കാനുള്ള അധികാരം നാഷണല് ബോര്ഡിനായിരുന്നുവെങ്കില് പുതിയ ഭേദഗതി പ്രകാരം അത് കേന്ദ്ര സര്ക്കാരിന് കൈമാറി.
അപ്പീലുകള് ഫയല് ചെയ്യുന്നതിനും കേള്ക്കുന്നതിനുമുള്ള ചട്ടങ്ങള് നിശ്ചയിക്കുന്നതും കേന്ദ്രസര്ക്കാരായിരിക്കും. ആഗോള കായിക നിയമങ്ങള്ക്കനുസൃതമായി, നാഡയുടെ അന്തിമ തീരുമാനങ്ങള്ക്കെതിരെ സ്വിറ്റ്സര്ലന്ഡ് ആസ്ഥാനമായുള്ള കോര്ട്ട് ഓഫ് ആര്ബിട്രേഷന് ഫോര് സ്പോര്ട്സില് അപ്പീല് നല്കാനും ആഭ്യന്തരമായി അപ്പീലുകള് ഫയല് ചെയ്തിട്ടില്ലെങ്കില് വേള്ഡ് ആന്റി ഡോപ്പിങ് ഏജന്സിക്ക് നേരിട്ട് കാര്ട്ട് ഓഫ് ആര്ബിട്രേഷന് ഫോര് സ്പോര്ട്സിനെ സമീപിക്കാനും സാധിക്കും. അന്തര്ദേശീയ നിലവാരം ഉറപ്പാക്കാന് ഉത്തേജക പരിശോധനാ ലാബുകള്ക്ക് വേള്ഡ് ആന്റി ഡോപ്പിങ് ഏജന്സിയുടെ നിര്ബന്ധിത അക്രഡിറ്റേഷനും നിയമത്തിലൂടെ നിര്ബന്ധമാക്കിയിട്ടുണ്ട്.
