മട്ടാഞ്ചേരി: കരിങ്കല് അധിഷ്ഠിത സാമഗ്രികള് ഇതര സംസ്ഥാനങ്ങളിലേക്ക് കൊണ്ടുപോകുന്നതില് തമിഴ്നാട് സര്ക്കാരിന്റെ വിലക്ക് കേരളത്തിലെ നിര്മാണ – വികസന മേഖലകളെ സ്തംഭനത്തിലാക്കും.
കരിങ്കല് ചീളുകള്, എം സാന്ഡ്, മെറ്റല് തുടങ്ങി ക്വാറി ഇനങ്ങള് ഇതര സംസ്ഥാനങ്ങളിലേക്ക് കടത്തുന്നതിനാണ് തമിഴ്നാട് സര്ക്കാര് വിലക്കേര്പ്പെടുത്തിയത്. മൂന്ന് മാസത്തെ വിലക്ക് കര്ശനമാക്കിയതോടെ സംസ്ഥാനത്തേക്കുള്ള നിര്മാണ സാമഗ്രികളുടെ നീക്കം തടസപ്പെട്ടു. നിര്മാണ സാമഗ്രികളുടെ ലഭ്യതയില്ലായ്മ സംസ്ഥാനത്തെ ദേശീയപാത വികസനം, കെട്ടിട നിര്മാണം, അറ്റകുറ്റപ്പണികള് തുടങ്ങിയ മേഖലകളെ സ്തംഭനത്തിലാക്കും.
ഇതരസംസ്ഥാനത്തൊഴിലാളികളുടെ ലഭ്യതക്കുറവില്പ്പെട്ട് ആശങ്കയിലായ നിര്മാണമേഖലയ്ക്ക് കനത്ത തിരിച്ചടിയാണിത്. സംസ്ഥാനത്തെ സാമ്പത്തിക മേഖലയ്ക്കും എട്ട് ലക്ഷത്തിലേറെ തൊഴിലാളികളെയും അനുബന്ധമേഖലയിലും നിര്മാണമേഖല സ്തംഭനം വന് പ്രഹരമേല്പിക്കുമെന്നാണ് ബന്ധപ്പെട്ടവര് ചൂണ്ടിക്കാട്ടുന്നത.് പ്രതിദിനം കരിങ്കല് അനുബന്ധമായ 600-800 ലോഡ് നിര്മാണ സാമഗ്രികള് സംസ്ഥാനത്ത് എത്താറുണ്ടെന്നാണ് പ്രാഥമിക കണക്ക്. കന്യാകുമാരി, തെങ്കാശി, തേനി, കോയമ്പത്തൂര്, തിരുപ്പൂര്, കൃഷ്ണഗിരി ജില്ലകളില് നിന്നാണ് ഏറെയും എത്തുന്നത്. തമിഴ്നാട്ടിലേക്ക് ആവശ്യമായ കരിങ്കല് അധിഷ്ഠിത ഉത്പന്നങ്ങള് ലഭിക്കുന്നതിനും, ക്വാറികളുടെ സംരക്ഷണം, പരിസ്ഥിതി സന്തുലനം, സാമഗ്രികളുമായുള്ള വന് ട്രെയ്ലറുകള് മൂലമുള്ള റോഡ് തകര്ച്ച തുടങ്ങി വിവിധകാരണങ്ങള് ഉയര്ത്തിയാണ് നിരോധനം.
തമിഴ്നാട് ജിയോളജിക്കല് വകുപ്പാണ് കരിങ്കല്, എം സാന്ഡ്, പൊടി മെറ്റല്, ജെല്ലി തുടങ്ങിയവക്ക് അതിര്ത്തി കടന്നുള്ള വിലക്ക് ഏര്പ്പെടുത്തിയത്.
2011ലെ മുന്കാല ഉത്തരവിന്റെ തുടര്ച്ചയായി ജൂലൈ 9ന് ജിയോളജി ആന്ഡ് മൈനിങ് ഡയറക്ടര് ടി. പ്രഭു ശങ്കറാണ് ഉത്തരവിറക്കിയത്. തമിഴ്നാടിന്റെ അയല്സംസ്ഥാനങ്ങളായ കേരളം, കര്ണാടക, ആന്ധ്ര എന്നിവിടങ്ങളിലേക്കുള്ള കടത്ത് കര്ശനമായി തടഞ്ഞാണ് നടപടികള്. പോണ്ടിച്ചേരിയെ ഒഴിവാക്കി. 27 മുതല് ചരക്ക് നീക്കം പൂര്ണമായും സ്തംഭിച്ചു. നിലവിലെ സ്ഥിതിയില് ഒരാഴ്ചത്തേക്കുള്ള നിര്മാണ സാമഗ്രികളുടെ സ്റ്റോക്കുണ്ടാകുമെന്നും തുടര്ന്ന് തൊഴില് സ്തംഭനമുണ്ടാകുമെന്നുമാണ് കോണ്ട്രാക്റ്റേഴ്സ് സംഘടനാ വക്താക്കള് പറയുന്നത്. സംസ്ഥാനത്ത് ചരല് ലഭ്യതക്കുറവും ക്വാറികളുടെ പ്രവര്ത്തന നിയന്ത്രണവും മൂലം കരിങ്കല് സാമഗ്രികള്ക്ക് അന്യസംസ്ഥാന മേഖലയെ ആശ്രയിക്കുകയാണ്. വിഷയത്തില് മുഖ്യമന്ത്രി ഇടപെട്ടതായും ദേശീയപാത വികസന തടസം ഒഴിവാക്കാന് നടപടികള് കൈക്കൊള്ളാമെന്നും അറിയിച്ചിട്ടുണ്ട്.
