തിരുവനന്തപുരം: തൃക്കണ്ണാപുരത്ത് സ്ഥലം വാങ്ങിയ ആളോട് കൗൺസിലർ 10 ലക്ഷം രൂപ കൈക്കൂലി ആവശ്യപ്പെട്ടു എന്ന് പരാതി. സിപിഎം കൗൺസിലർ അജിനെതിരെയാണ് ആരോപണം. പണം നൽകിയില്ലെങ്കിൽ ഡിവൈഎഫ്ഐക്കാരെക്കൊണ്ട് ഭൂമിയിൽ കൊടി കുത്തിക്കും എന്നും സിപിഎം കൗൺസിലറുടെ ഭീഷണി. പണം ആവശ്യപ്പെടുന്ന വീഡിയോയും ഓഡിയോയും പരാതിക്കാരൻ പുറത്ത് വിട്ടു.
തൃക്കണ്ണാപുരം വാർഡിലെ എംഎൽഎ റോഡിനോട് ചേർന്ന് വാങ്ങിയ 19 സെന്റ് ഭൂമി പ്ലോട്ടുകളാക്കി തിരിച്ച് വിൽപ്പന നടത്തുകയായിരുന്നു സഞ്ജു. ആദ്യത്തെ രണ്ട് പ്ലോട്ട് വിറ്റതിന് പിന്നാലെ കൗൺസിലർ അജിൻ ഇക്കാര്യത്തിൽ ഇടപെടുകയായിരുന്നുവെന്ന് സഞ്ജു പറഞ്ഞു. ഭൂമിയിൽ പുറമ്പോക്ക് ഉണ്ടെന്നും അത് തരംമാറ്റി വിൽക്കാൻ സഹായിക്കാമെന്നും പറഞ്ഞ് കൗൺസിലർ 10 ലക്ഷം രൂപ കൈക്കൂലി ആവശ്യപ്പെട്ടെന്നാണ് പരാതി.
ചില പ്രദേശിക നേതാക്കൾ വീട്ടിലെത്തി അജിനെ പിണക്കുന്നത് ദോഷം ചെയ്യുമെന്നും അഞ്ചുലക്ഷം രൂപ നൽകി പ്രശ്നം ഒഴിവാക്കണമെന്നും ആവശ്യപ്പെട്ടതായും സഞ്ജു ആരോപിച്ചു. തുടർന്ന് രാത്രി വരാൻ പറഞ്ഞതുപ്രകാരം അജിനെ കാണാൻ പോയി. ഈ സമയത്താണ് മൊബൈൽ ഫോണിൽ വീഡിയോ പകർത്തിയതെന്നും സഞ്ജു വ്യക്തമാക്കി.
ഭൂമി വിൽക്കുമ്പോൾ വലിയ തുക ലഭിക്കുമെന്നും അതിൽ നിന്ന് ഒരു വിഹിതം തനിക്ക് നൽകണമെന്നും അജിൻ ആവശ്യപ്പെട്ടു. ഇല്ലാത്തപക്ഷം ഡിവൈഎഫ്ഐക്കാരെകൊണ്ട് വസ്തുവിൽ കൊടികുത്തിക്കുമെന്ന് കൗൺസിലർ ഭീഷണിപ്പെടുത്തിയതായും സഞ്ജു പറഞ്ഞു. തർക്കിക്കാൻ നിന്നാൽ പ്രശ്നം രൂക്ഷമാകുമെന്നും റോഡിന്റെ രേഖകളിലെ പുറമ്പോക്ക് ഭൂമിയിലൂടെയുള്ള തോടും ഓടയും ചൂണ്ടിക്കാട്ടി നിർമാണ പ്രവർത്തനങ്ങൾ തടയുമെന്നും അജിൻ ഭീഷണിപ്പെടുത്തുന്ന ഫോൺസംഭാഷണവും പുറത്തുവന്നു. സംഭവത്തിൽ സഞ്ജു ആഭ്യന്തരമന്ത്രിക്ക് പരാതി നൽകി.
അതേസമയം ആരുടെയെങ്കിലും കയ്യിൽ നിന്ന് ഒരു രൂപ കൈക്കൂലി വാങ്ങിയെന്ന് തെളിയിച്ചാൽ താൻ ഈ സമയം രാജിവെക്കാൻ തയ്യാറെന്ന് സിപിഎം കൗൺസിലർ അജിൻ പ്രതികരിച്ചു.
