കൊച്ചി: ഷാജി കൈലാസ് സംവിധാനം ചെയ്ത ‘വരവ്’ എന്ന സിനിമയുടെ സെറ്റിൽ പതിനാറോളം മൊബൈൽ ഫോണുകളാണ് ജോജു ജോര്‍ജ്ജ് എറിഞ്ഞു തകർത്തുവെന്ന് ശാന്തിവിള ദിനേശ്. ആ സെറ്റില്‍ അഭിനയിത്തിലുപരി എല്ലാ കാര്യങ്ങളിലും ഇടപെട്ട് തലവേദന ഉണ്ടാക്കുന്ന വ്യക്തിയായി ജോജു മാറിയെന്നും ശാന്തിവിള ദിനേശ്. ജൂനിയർ ആർട്ടിസ്റ്റായി വന്ന് പിന്നീട് സംവിധായകനും നിർമ്മാതാവുമൊക്കെയായ താരം തന്റെ പഴയ കാലം മറന്നതിന്റെ ലക്ഷണമാണ് ഇപ്പോൾ ചോദിക്കുന്ന അഞ്ച് കോടി രൂപ പ്രതിഫലമെന്നും ശാന്തിവിള ദിനേശ് കുറ്റപ്പെടുത്തി. തന്റെ യുട്യൂബ് ചാനലില്‍ സംസാരിക്കുകയായിരുന്നു ശാന്തിവിള ദിനേശ്.
മലയാളത്തില്‍ കഴിഞ്ഞ മാസം വന്ന 26 സിനിമകളും നഷ്ടത്തില്‍
മലയാള സിനിമയിൽ കൃത്യമായ യാതൊരുവിധ കണക്കുകൂട്ടലുകളും ഇല്ലാതെയാണ് പലരും ഇപ്പോൾ സിനിമകൾ പിടിക്കുന്നത്. മലയാള സിനിമയിലെ വമ്പൻ റിലീസുകളെല്ലാം പരാജയങ്ങളാണ്. നിർമ്മാതാക്കൾ നേരിടുന്നത് ഭീമമായ നഷ്ടങ്ങളാണ്. മലയാളത്തില്‍ ഒരു മാസം കൊണ്ട് മാത്രം ഇരുപത്തിയാറോളം ചിത്രങ്ങളാണ് തിയേറ്ററുകളിൽ എത്തിയത് എന്നും എന്നാൽ ഇതിൽ ഭൂരിഭാഗം സിനിമകളും വന്ന വിവരം പോലും പ്രേക്ഷകർ അറിഞ്ഞിട്ടില്ല. – ശാന്തിവിള ദിനേശ് വിമര്‍ശിക്കുന്നു.
ആദ്യദിനം കളക്ഷന്‍ പോലും നേടാതെ പൃഥ്വിരാജിന്റെ ഐ നോബഡി
പൃഥ്വിരാജിനെ നായകനാക്കി വലിയ പ്രതീക്ഷയോടെ എത്തിയ ഐ നോബഡി എന്ന ചിത്രം ആദ്യദിനം കളക്ഷൻ പോലും നേടാനാവാതെ വലിയ പരാജയമാണ് നേരിട്ടത്. നടന്റെ ശമ്പളം ഒഴിവാക്കി തന്നെ ഈ ചിത്രത്തിന് ഇരുപത്തിയാറ് കോടിയോളം രൂപയാണ് ചിലവായത്. പൃഥ്വിരാജ് തൻറെ പ്രതിഫലം പാർട്നർഷിപ്പ് രീതിയിലാണ് നിക്ഷേപിച്ചതെന്നും അതുകൊണ്ടുതന്നെ ചിത്രത്തിന്റെ ആകെ ചിലവ് മുപ്പത്തിഎട്ട് കോടിയോളം വരുമെന്നും അദ്ദേഹം വെളിപ്പെടുത്തുന്നു.
ഹിറ്റ് സംവിധായകരെ കൂടെ നിര്‍ത്താന്‍ മാത്രം സിനിമ എടുക്കുന്ന ഗോകുലം ഗോപാലന്
സിനിമയുടെ കഥ പോലും കേൾക്കാതെ വെറും ഫോട്ടോ എടുക്കാനും ഹിറ്റ് സംവിധായകരെ കൂടെ നിർത്താനും വേണ്ടി മാത്രം പണം മുടക്കുന്ന നിർമ്മാതാവാണ് ഗോകുലം ഗോപാലൻ എന്നും ശാന്തിവിള ദിനേശ് ആരോപിക്കുന്നു. കഴിഞ്ഞ അഞ്ച് വർഷമായി കത്തനാർ എന്ന സിനിമയ്‌ക്ക് വേണ്ടി മാത്രം നൂറ് കോടിയിലധികം രൂപയാണ് ഇവർ ചിലവിട്ടിരിക്കുന്നത്.
എമ്പുരാനില്‍ ആന്‍റണി പെരുമ്പാവൂര്‍ ഗോകുലം ഗോപാലനെ പറ്റിച്ചു
എമ്പുരാൻ സിനിമയുടെ വിതരണാവകാശം ലഭിക്കുമെന്ന വ്യാമോഹത്തിൽ മോഹൻലാലിന്റെ ഡേറ്റുകൾ വാഗ്ദാനം ചെയ്ത് ആന്‍റണി പെരുമ്പാവൂർ ഗോകുലം ഗോപാലനെ പറ്റിക്കുകയായിരുന്നു എന്നും ഇതിലൂടെ മാത്രം ഗോകുലം ഗോപാലന് അറുപത് കോടിയോളം രൂപയുടെ വലിയ നഷ്ടമാണ് സംഭവിച്ചതെന്നും അദ്ദേഹം തുറന്നു പറഞ്ഞു.
