തിരുവനന്തപുരം: സര്ക്കാര് ആശുപത്രികളില് സംഘടനകളുടെ കൊടിയും ബാനറും കെട്ടി ഭക്ഷണവിതരണം അനുവദിക്കില്ലെന്ന നിലപാടില് ആരോഗ്യമന്ത്രി കെ മുരളീധരന് മലക്കം മറിഞ്ഞു. ആശുപത്രികളില് രോഗികള്ക്ക് ആഹാരം കൊടുക്കുന്നതിന് സര്ക്കാര് എതിരല്ലെന്നാണ് പുതിയ നിലപാട്.
നിലവിലെ വിവാദം ആലപ്പുഴ മെഡിക്കല് കോളേജുമായി ബന്ധപ്പെട്ടതാണ്. അതിനെ പൊതുവായി വ്യാഖ്യാനിക്കേണ്ടതില്ല.ആശുപത്രികളിലെ ഭക്ഷണം വിതരണം സംബന്ധിച്ച് മന്ത്രിയുടെ നേരത്തേയുളള പ്രതികരണത്തില് വലിയ പ്രതിഷേധം ഉയര്ന്നിരുന്നു.
ആലപ്പുഴ മെഡിക്കല് കോളേജിലെ സാഹചര്യത്തിന് അനുസരിച്ചുള്ള തീരുമാനമാണ് കഴിഞ്ഞ ദിവസം പറഞ്ഞത്. ആലപ്പുഴയില് ചില സംഘടനകള് ഭക്ഷണം നല്കുന്നതിന്റെ പേരില് സംഘടിതമായി സ്ഥലം കൈയേറിയത് അംഗീകരിക്കാനാകില്ല. സ്ഥലം കൈയ്യേറിയതിലാണ് എതിര്പ്പെന്നും ആഹാരം കൊടുക്കുന്നതിനല്ലെന്നും മന്ത്രി പറഞ്ഞു. ആശുപത്രിയുടെ വികസന പ്രവര്ത്തനങ്ങളെ തടയുന്ന നടപടിയാണിതെന്നതിനാലാണ് ഇത്തരം സംഭവങ്ങള് ആവര്ത്തിക്കാതിരിക്കാന് ഈ മേഖലയില് സര്ക്കാര് ഇടപെടല് നടത്തുന്നതെന്ന് കെ മുരളീധരന് വ്യക്തമാക്കി.
ആശുപത്രിയില് മുഴുവന് രോഗികള്ക്കും കൂട്ടിരിപ്പുകാര്ക്കും ഭക്ഷണം ലഭ്യമാക്കാനുള്ള ശ്രമത്തിന്റെ ഭാഗമാണ് ആലപ്പുഴ മെഡിക്കല് കോളേജില് കമ്മ്യൂണിറ്റി കിച്ചണ് ആരംഭിക്കുന്നതെന്ന് മന്ത്രി വാര്ത്താകുറിപ്പില് അറിയിച്ചു.കമ്മ്യൂണിറ്റി കിച്ചണുമായി എല്ലാവരുടെയും സഹകരണം വേണമെന്നും ആഹാരത്തിന് രാഷ്ട്രീയവും മതവും ജാതിയുമില്ലെന്നും പാവങ്ങള്ക്ക് ആഹാരം കിട്ടണമെന്നാണ് സര്ക്കാരിന്റെ താത്പര്യമെന്നും കെ മുരളീധരന് പറഞ്ഞു. അത് ആര് കൊടുക്കുന്നു എന്നത് വിഷയമല്ല.
