ഗുരുവായൂര്‍: കുറച്ചുനാളായി ഗുരുവായൂര്‍ ക്ഷേത്രത്തിന്റെ പവിത്രതയും ഭക്തിയും കാറ്റില്‍ പറത്തി ചില ലോഡ്ജ് ഉടമകള്‍ നടത്തുന്ന പ്രവര്‍ത്തനങ്ങളെ ചോദ്യം ചെയ്ത് ബജ്രംഗ് ദള്‍ പ്രവര്‍ത്തകര്‍ അവരെക്കൊണ്ട് മാപ്പ് പറയിക്കുന്നതില്‍ വിജയിച്ചു. ഇത് ഒരു മാറ്റത്തിന്റെ തുടക്കമാണെന്നും ബജ്രംഗ് ദള്‍ പ്രവര്‍ത്തകര്‍ പറയുന്നു.
ഗുരുവായൂരിലെ ഒരു ലോഡ്ജ് എടുത്തു നടത്തുന്ന പുതിയ ഉടമകള്‍ ഒരു വനിതാ ബ്ലോഗറെ ഉപയോഗിച്ച് ലോഡ്ജിന്റെ പരസ്യം നല്‍കിയതാണ് പുതിയ വിവാദം. സമൂഹമാധ്യമങ്ങള്‍ ഉപയോഗിച്ച് നടത്തിയ ഈ പരസ്യം ഗുരുവായൂര്‍ ക്ഷേത്രത്തിന്റെ പവിത്രത കാറ്റില്‍ പറത്തുന്ന നിലയ്‌ക്കുള്ളതായിരുന്നു. ഇതിനെതിരെ പുതിയ ഉടമകള്‍ക്കെതിരെ ശക്തമായി ബജ്രംഗ് ദള്‍ പ്രവര്‍ത്തകര്‍ രംഗത്ത് വന്നു.
ഇത്തരം അശ്ലീലതയിലേക്ക് നീളുന്ന ഒരു പരസ്യം ലോഡ്ജിലേക്ക് ആളുകളെ ആകര്‍ഷിക്കുന്നതിന് വേണ്ടി നടത്തിയതിന് ലോഡ്ജ് ഉടമകള്‍ ഹിന്ദു ഭക്തരോട്, ഗുരുവായൂരപ്പ ഭക്തരോട് പരസ്യമായി മാപ്പ് പറയണം എന്നതായിരുന്നു ബജ്രംഗ് ദള്‍ പ്രവര്‍ത്തകരുടെ ആവശ്യം. ആദ്യമൊക്കെ ലോഡ്ജ് ഉടമകള്‍ വിസമ്മതിച്ചു. വനിതാ ബ്ലോഗറെ വിളിച്ച് ഈ പരസ്യം മറ്റൊരു രീതിയില്‍ ചെയ്യിക്കാം എന്നായിരുന്നു അവരുടെ വാദം. എന്നാല്‍ ബജ്രംഗ് ദള്‍ പ്രവര്‍ത്തകര്‍ അവരുടെ ആവശ്യത്തില്‍ ഉറച്ചുനിന്നു. ഒടുവില്‍ ലോഡ്ജ് ഉടമകള്‍ പരസ്യമായി മാപ്പ് പറഞ്ഞു. ഇതിന്റെ വീഡിയോയും സമൂഹമാധ്യമങ്ങളില്‍ ലഭ്യമാണ്.
