തൃശൂര്: വടക്കാഞ്ചേരിയില് കൈകൂപ്പി യാചിച്ചിട്ടും വിദ്യാര്ഥികളെ ബസില് കയറ്റാതിരുന്ന കണ്ടക്ടറെ വിളിച്ചുവരുത്തി മോട്ടോര് വാഹന വകുപ്പ്.വടക്കാഞ്ചേരി- കുന്നംകുളം റൂട്ടില് ഓടുന്ന മെജോമോന് ബസിലെ കണ്ടക്ടറെയാണ് വിളിച്ചുവരുത്തിയത്.
ഇയാള്ക്കെതിരെ നടപടി ഉണ്ടായേക്കും. ഇയാളുടെ ലൈസന്സ് അടക്കം സസ്പെന്ഡ് ചെയ്യാനാണ് മോട്ടോര് വാഹന വകുപ്പിന്റെ ആലോചന. പ്രത്യേക പരിശീലനം നല്കാനും നീക്കമുണ്ട്.
ബസില് കയറ്റാതിരുന്ന കണ്ടക്ടറോട് കൈകൂപ്പി വിദ്യാര്ഥികളില് ഒരാള് അപേക്ഷിക്കുന്ന വീഡിയോ സമൂഹമാധ്യമങ്ങളില് പ്രചരിക്കുന്നുണ്ട്.വടക്കാഞ്ചേരി ക്ലേ ലിയാസ് സ്കൂളിലെ പത്താം ക്ലാസ് വിദ്യാര്ഥികളെയാണ് ബസില് കയറ്റാതിരുന്നത്. സൗജന്യ നിരക്കിലുളള യാത്ര ആയതിനാല് കൂടുതല് വിദ്യാര്ത്ഥികളെ ബസില് കയറ്റാനാവില്ലെന്ന നിലപാടാണ് കണ്ടക്ടര് സ്വീകരിച്ചത്.
