ന്യൂഡൽഹി : പ്രതിപക്ഷം പാറ്റാ പാർട്ടിയും നടത്തിയ കലാപശ്രമം ഭരണമാറ്റത്തിനായുള്ള ഗൂഢനീക്കമായിരുന്നുവെന്ന് തെളിയിക്കുന്ന കൂടുതൽ വിവരങ്ങൾ പുറത്ത് . വാർത്ത റിപ്പോർട്ട് ചെയ്യാനെത്തിയ സ്വതന്ത്ര മാധ്യമപ്രവർത്തകർ’ ഉൾപ്പെടെ ഏകദേശം 5000-ത്തോളം കണ്ടന്റ് ക്രിയേറ്റർമാരുടെ ശൃംഖലയെ ഉപയോഗിച്ച്, സർക്കാർ വിരുദ്ധ ആശയങ്ങൾ പ്രചരിപ്പിക്കാനും പൊതുജനാഭിപ്രായത്തെ സ്വാധീനിക്കാനും പ്രതിപക്ഷം ശ്രമിച്ചതായാണ് റിപ്പോർട്ടുകൾ.
സമീപകാല പ്രതിഷേധങ്ങളിൽ, മാധ്യമപ്രവർത്തകരായി വേഷം കെട്ടിയ നിരവധി ആളുകൾ പങ്കെടുത്തതായി ‘ഇന്ത്യാ ടുഡേ’ റിപ്പോർട്ട് ചെയ്തു. മാധ്യമപ്രവർത്തകരെപ്പോലെ തോന്നിപ്പിക്കുന്നതിനായി ഇവർ പ്രസ് ഐഡി കാർഡുകളും മൈക്കുകളും കൈവശം വെച്ചിരുന്നു. കൂടാതെ സംശയാസ്പദമായ ചില സംഘടനകളുടെ ലോഗോകളും ഇവർ ഉപയോഗിച്ചിരുന്നു. ‘ഇന്ത്യാ ടുഡേ’ നടത്തിയ കൂടുതൽ അന്വേഷണത്തിൽ, ഇവരിലേറെയും അടുത്ത കാലത്ത് മാത്രം നിലവിൽ വന്ന വാർത്താ വെബ്‌സൈറ്റുകളുമായി ബന്ധമുള്ളവരാണെന്ന് കണ്ടെത്തി. ഇതിൽ ചില വെബ്‌സൈറ്റുകൾ ഈ വർഷം ഫെബ്രുവരി-മാർച്ച് മാസങ്ങൾക്കിടയിലാണ് സൃഷ്ടിക്കപ്പെട്ടത്.
‘ഇന്ത്യൻ പ്രസ് യൂണിയൻ’ (IPU), ‘NEED24’, ‘FNF’ എന്നിങ്ങനെ ചില സംഘടനകളുടെ പേരുകൾ റിപ്പോർട്ടിൽ പരാമർശിക്കുന്നുണ്ട്. ‘NEED24’ 2022-ലും, ‘FNF’ 2024-ലും, ‘ഇന്ത്യൻ പ്രസ് യൂണിയൻ’ (IPU) 2025-ലുമാണ് രൂപീകരിക്കപ്പെട്ടതെന്ന് റിപ്പോർട്ടിൽ പറയുന്നു. 2016 മുതൽ പ്രവർത്തിക്കുന്നുണ്ടെന്നാണ് IPU അവകാശപ്പെടുന്നതെങ്കിലും, ഈ അവകാശവാദത്തെ സാധൂകരിക്കുന്ന യാതൊരു തെളിവും കണ്ടെത്താനായില്ല.
മാത്രമല്ല ഇത്തരം ‘വാർത്താ വെബ്‌സൈറ്റുകൾ’ എന്ന് അവകാശപ്പെടുന്ന ചില സൈറ്റുകൾ, പ്രസ് ഐഡി കാർഡുകളും മൈക്രോഫോണുകളും ഉൾപ്പെടെയുള്ള മാധ്യമപ്രവർത്തക തിരിച്ചറിയൽ രേഖകൾ വെറും 599 രൂപയ്ക്ക് വിൽക്കുന്നതായി കണ്ടെത്തി. തങ്ങൾ ഒരു യഥാർത്ഥ, സുസ്ഥിരമായ സ്ഥാപനമാണെന്ന് വരുത്തിത്തീർക്കാൻ, അഭിമുഖങ്ങളുടെയും വാർത്താ സമ്മേളനങ്ങളുടെയും പരിപാടികളുടെയും വീഡിയോകൾ ഇവരുടെ വെബ്‌സൈറ്റുകളിൽ നൽകിയിരുന്നു; എന്നാൽ ഇവ എ ഐ ഉപയോഗിച്ച് നിർമ്മിച്ചവയാണെന്ന് കണ്ടെത്തിയിട്ടുണ്ട്.
വിവിധ സംഘടനകളുടെ ആറ് വെബ്‌സൈറ്റുകളിൽ നാലെണ്ണവും, ആരെയും ഒരു മാധ്യമപ്രവർത്തകനായി തോന്നിപ്പിക്കാൻ കഴിയുന്ന ‘പ്രസ് ക്രെഡൻഷ്യലുകൾ’ (മാധ്യമപ്രവർത്തകനാണെന്ന് തെളിയിക്കുന്ന രേഖകൾ) വിൽക്കുന്നതായി കണ്ടെത്തി. യഥാർത്ഥ മാധ്യമപ്രവർത്തകരാണെന്ന പ്രതീതി ജനിപ്പിക്കുന്നതിനായി പ്രസ് ഐഡി കാർഡുകൾ, മൈക്രോഫോണുകൾ, വാഹനങ്ങളിൽ പതിക്കാവുന്ന സ്റ്റിക്കറുകൾ, ഓൺലൈൻ പ്രൊഫൈലുകൾ എന്നിവയാണ് ഈ വെബ്‌സൈറ്റുകൾ വാഗ്ദാനം ചെയ്തത്.
‘ഹിന്ദ് മീഡിയ നെറ്റ്‌വർക്ക്’ എന്ന സംഘടനയുടെ വെബ്‌സൈറ്റിൽ, 599 രൂപയ്ക്ക് പ്രസ് ഐഡി കാർഡും സർട്ടിഫിക്കറ്റും ഓൺലൈൻ റിപ്പോർട്ടർ പ്രൊഫൈലും, 3,500 രൂപയ്ക്ക് മൈക്രോഫോൺ കിറ്റും നൽകുന്നതായി പരസ്യം ചെയ്തിരുന്നു. ‘നീഡ്24 ന്യൂസ്’ (NEED24 News) 999 രൂപയ്ക്ക് ഐഡി കാർഡും റിപ്പോർട്ടർ പ്രൊഫൈൽ പേജും നൽകുന്നുണ്ട്. കൂടാതെ, പ്രതിവർഷം 25,000 രൂപ നൽകിയാൽ, തങ്ങളുടെ പ്രസ് കാർഡിൽ ‘സ്റ്റേറ്റ് ബ്യൂറോ ചീഫ് എന്ന പദവി കൂടി ഇവർ വാഗ്ദാനം ചെയ്യുന്നു
‘ഏഷ്യൻ യൂണിയൻ പ്രസ്’ എന്ന മറ്റൊരു സംഘടന 999 രൂപയ്ക്ക് പ്രസ് ഐഡി കാർഡും അംഗത്വ സർട്ടിഫിക്കറ്റും നൽകുന്നതിനൊപ്പം, വാർത്തകൾ പ്രസിദ്ധീകരിച്ചു നൽകാനും തയ്യാറാണ്. സമാനമായി, ‘ഇന്ത്യൻ പ്രസ് യൂണിയൻ’ 1,799 രൂപയ്ക്ക് പ്രസ് ഐഡി കാർഡും വാഹന സ്റ്റിക്കറും നൽകുന്നു. എന്നാൽ ഇതൊക്കെ ആര് സ്പോൺസർ ചെയ്തിട്ട് ആരാണ് ചെയ്യുന്നത് എന്ന് മാത്രം വ്യക്തമായിട്ടില്ല.
