തിരുവനന്തപുരം : തെരഞ്ഞെടുപ്പ് കാലത്ത് മുഴുവന് കെഎസ്ആര്ടിസി ബസുകളിലും സ്ത്രീകള്ക്ക് സൗജന്യ യാത്ര ഉറപ്പാക്കുമെന്ന് കോണ്ഗ്രസ് നല്കിയ വാഗ്ദാനം നടപ്പിലാക്കാത്തതില് പ്രതിഷേധിച്ച് ബിജെപി സംസ്ഥാനവ്യാപകമായി പ്രതിഷേധ മാര്ച്ചുകളും സമരപരിപാടികളും സംഘടിപ്പിച്ചു.
എല്ലാ കെഎസ്ആര്ടിസി ബസുകളിലും സ്ത്രീകള്ക്ക് സൗജന്യ യാത്ര എന്ന വാഗ്ദാനം നല്കി അധികാരത്തിലെത്തിയ ശേഷം, സൗജന്യ യാത്രാ പദ്ധതി ഓര്ഡിനറി ബസുകളില് മാത്രമായി പരിമിതപ്പെടുത്തുകയും, 3000-ത്തിലധികം ബസുകള് സിറ്റി ഫാസ്റ്റ്, ഫാസ്റ്റ്പാസഞ്ചര് വിഭാഗത്തിലേക്ക് മാറ്റുകയും ചെയ്തതോടെ, സൗജന്യ യാത്ര ലഭിക്കുമെന്ന പ്രതീക്ഷയില് ഉണ്ടായിരുന്ന ആയിരക്കണക്കിന് സ്ത്രീകള്ക്ക് ആ ആനുകൂല്യം നിഷേധിക്കപ്പെട്ടതായി ബിജെപി ആരോപിച്ചു. ബസുകളെ തരം തിരിക്കാതെ എല്ലാ സ്ത്രീകള്ക്കും എല്ലാ കെഎസ്ആര്ടിസി ബസുകളിലും സൗജന്യ യാത്ര ഉറപ്പാക്കണമെന്നാണ് ബിജെപിയുടെ ആവശ്യം.
തിരുവനന്തപുരം ഉള്പ്പെടെ സംസ്ഥാനത്തിന്റെ വിവിധ ജില്ലകളില് നടന്ന പ്രതിഷേധ പരിപാടികള്ക്ക് ബിജെപി നേതാക്കള് നേതൃത്വം നല്കി. തിരുവനന്തപുരത്ത് നടന്ന പ്രതിഷേധ മാര്ച്ച് ബിജെപി സംസ്ഥാന ജനറല് സെക്രട്ടറി അഡ്വ. എസ്. സുരേഷ് ഉദ്ഘാടനം ചെയ്തു. സംസ്ഥാന സെക്രട്ടറി പൂന്തുറ ശ്രീകുമാര്, തിരുവനന്തപുരം സിറ്റി ജില്ലാ അധ്യക്ഷന് കരമന ജയന് എന്നിവര് ഉള്പ്പെടെയുള്ള നേതാക്കള് പങ്കെടുത്തു. കോട്ടയം ഈസ്റ്റ് മഹിളാമോര്ച്ചയുടെ നേതൃത്വത്തില് പൊന്കുന്നം കെഎസ്ആര്ടിസി സ്റ്റാന്ഡില് പ്രതിഷേധ സമരം സംഘടിപ്പിച്ചു.കോഴിക്കോട് സിറ്റി ജില്ലാ കമ്മിറ്റിയുടെ നേതൃത്വത്തില് കോഴിക്കോട് കെഎസ്ആര്ടിസി ബസ് സ്റ്റാന്ഡിലേക്ക് നടത്തിയ പ്രതിഷേധ മാര്ച്ച് മഹിളാമോര്ച്ച സംസ്ഥാന അധ്യക്ഷ നവ്യ ഹരിദാസ് ഉദ്ഘാടനം ചെയ്തു. കണ്ണൂര് നോര്ത്ത് ജില്ലാ കമ്മിറ്റിയുടെ നേതൃത്വത്തില് കണ്ണൂര് കെഎസ്ആര്ടിസി ബസ് സ്റ്റാന്ഡിലേക്ക് പ്രതിഷേധ മാര്ച്ച് സംഘടിപ്പിച്ചു. കോഴിക്കോട് റൂറല് ജില്ലാ കമ്മിറ്റിയുടെ നേതൃത്വത്തില് താംരശേരി കെഎസ്ആര്ടിസി ബസ് സ്റ്റാന്ഡിലേക്ക് നടത്തിയ പ്രതിഷേധ മാര്ച്ച് സംസ്ഥാന വക്താവ് അഡ്വ. വി.പി. ശ്രീപത്മനാഭന് ഉദ്ഘാടനം ചെയ്തു. ജില്ലാ പ്രസിഡന്റ് ടി. ദേവദാസ്, സംസ്ഥാന മുഖ്യ വക്താവ് ടി.പി. ജയചന്ദ്രന്, സംസ്ഥാന സമിതി അംഗങ്ങളായ വി.വി. രാജന്, കെ. ശശീന്ദ്രന്, ജില്ലാ ജനറല് സെക്രട്ടറിമാരായ ഗിരീഷ് തേവള്ളി, എന്.പി. രാമദാസ്, മഹിളാമോര്ച്ച ജില്ലാ പ്രസിഡന്റ് ബിന്ദു പ്രഭാകരന് എന്നിവര് പങ്കെടുത്തു.
സ്ത്രീകള്ക്ക് സൗജന്യ യാത്ര ഉറപ്പാക്കുമെന്ന തെരഞ്ഞെടുപ്പ് വാഗ്ദാനം പൂര്ണമായും നടപ്പാക്കണമെന്നും, വാക്കുപാലിക്കാത്ത യുഡിഎഫ് സര്ക്കാര് സ്ത്രീകളെ വഞ്ചിക്കുന്നത് അവസാനിപ്പിക്കണമെന്നും ബിജെപി ആവശ്യപ്പെട്ടു. സ്ത്രീകള്ക്ക് എല്ലാ വിഭാഗം കെഎസ്ആര്ടിസി ബസുകളിലും സൗജന്യ യാത്ര അനുവദിക്കുന്നതുവരെ ശക്തമായ ജനകീയ പ്രതിഷേധം തുടരുമെന്നും നേതാക്കള് വ്യക്തമാക്കി.
