ആലപ്പുഴ: കെഎസ്ആര്‍ടിസി മിന്നല്‍ ബസില്‍ യുവതിയെ കയറിപ്പിടിച്ച യുവാവിനെ പൊലീസ് അറസ്റ്റ് ചെയ്തു. കണ്ണൂര്‍ തലശേരി തിരുവങ്ങാട്ട് ചേരക്കര സുഹാറ മന്‍സിലില്‍ ഷെബീറിനെയാണ് (41) ഹരിപ്പാട് പൊലീസ് അറസ്റ്റ് ചെയ്തത്.ചൊവ്വാഴ്ച പുലര്‍ച്ചെ 4.30 ഓടെ ബസ് ഹരിപ്പാട് എത്തുന്നതിന് തൊട്ടുമുമ്പാണ് സംഭവം.
പാലക്കാടുനിന്ന് തിരുവനന്തപുരത്തേക്ക് മിന്നല്‍ ബസില്‍ യാത്ര ചെയ്യുകയായിരുന്നു പാലക്കാട് സ്വദേശിനി. കൊച്ചിയില്‍നിന്നും ബസില്‍ കയറിയ പ്രതി യുവതിയുടെ തൊട്ടുപിന്നിലെ സീറ്റിലായിരുന്നു ഇരുന്നത്. ബസ് ഹരിപ്പാട് എത്താറായപ്പോള്‍ പ്രതി സീറ്റിന് പിന്നിലൂടെ കൈകടത്തി യുവതിയുടെ ശരീരത്തില്‍ കയറിപ്പിടിക്കുകയായിരുന്നു.
ഭയന്ന യുവതി ബഹളം വച്ചതോടെ പ്രതി മാപ്പുപറഞ്ഞ് രക്ഷപ്പെടാന്‍ ശ്രമിച്ചു. എന്നാല്‍ മറ്റ് യാത്രക്കാരും ബസ് ജീവനക്കാരും ചേര്‍ന്ന് ഇയാളെ തടഞ്ഞുവച്ചു. തുടര്‍ന്ന് ബസ് നേരിട്ട് ഹരിപ്പാട് പൊലീസ് സ്റ്റേഷനിലെത്തിച്ചു. യുവതിയുടെ പരാതി പ്രകാരം ലൈംഗികാതിക്രമം ഉള്‍പ്പെടെയുള്ള വകുപ്പുകള്‍ ചുമത്തി കേസ് രജിസ്റ്റര്‍ ചെയ്തു. പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.
