കോഴിക്കോട്:ഓണ്‍ലൈന്‍ ജോലി വാഗ്ദാനം ചെയ്ത് നരിക്കുനി സ്വദേശിയില്‍ നിന്ന് ലക്ഷങ്ങള്‍ തട്ടിയ കേസില്‍ 12ാം പ്രതിയെ കൂടി അറസ്റ്റ് ചെയ്തു.കൊടുവള്ളി കിഴക്കോത്ത് സ്വദേശി അഷ്മിലാണ് കോഴിക്കോട് റൂറല്‍ ക്രൈംബ്രാഞ്ച് സംഘത്തിന്റെ പിടിയിലായത്.
ബംഗളൂരു വിമാനത്താവളത്തില്‍ വച്ചാണ് അഷ്മിലിനെ പിടികൂടിയത്.ബിഗ് ബോസ് മുന്‍ താരം ബ്ലെസി ഉള്‍പ്പെടെയുള്ളവര്‍ ഈ കേസില്‍ നേരത്തെ പിടിയിലായിട്ടുണ്ട്.സമൂഹമാധ്യമമായ ടെലഗ്രാം വഴി ബന്ധം സ്ഥാപിച്ചാണ് സംഘം തട്ടിപ്പ് നടത്തിയത്. ഓണ്‍ലൈന്‍ ജോലി വാഗ്ദാനം ചെയ്ത് നരിക്കുനി സ്വദേശിയായ യുവാവില്‍ നിന്നും സുഹൃത്തില്‍ നിന്നുമായി പല തവണകളിലായി 23 ലക്ഷം രൂപയാണ് ഇവര്‍ തട്ടിയെടുത്തത്.
തട്ടിപ്പിലൂടെ ലഭിക്കുന്ന പണം ക്രിപ്റ്റോ കറന്‍സിയാക്കി വിദേശത്തേക്ക് കടത്തുന്നതാണ് ഇവരുടെ രീതി.കേസുമായി ബന്ധപ്പെട്ട് കൂടുതല്‍ പ്രതികള്‍ക്കായി പൊലിസ് അന്വേഷണം ഊര്‍ജിതമാക്കി.
