തിരുവനന്തപുരം:പ്രതിപക്ഷത്തായിരുന്നപ്പോള്‍ ഇന്ധനവില വര്‍ദ്ധനവിനെതിരെ ‘സംസ്ഥാനം നികുതി കുറയ്ക്കണം’ എന്ന് ആവശ്യപ്പെട്ട് സമരം ചെയ്ത യു ഡി എഫ് സഖ്യമാണ് ഇന്ന് കേരളത്തില്‍ അധികാരത്തിലെത്തിയിരിക്കുന്നതെന്ന് പ്രതിപക്ഷ നേതാവ് പിണറായി വിജയന്‍.തങ്ങള്‍ പ്രതിപക്ഷത്തിരുന്നപ്പോള്‍ ഉന്നയിച്ച സ്വന്തം വാദം പുതിയ സര്‍ക്കാര്‍ പ്രാവര്‍ത്തികമാക്കുമോയെന്ന് മുന്‍ മുഖ്യമന്ത്രി വെല്ലുവിളിച്ചു.
വി ഡി സതീശന്‍ സര്‍ക്കാരിനോടുള്ള പ്രതിപക്ഷ നേതാവിന്റെ ആദ്യ വെല്ലുവിളി കൂടിയാണ് ഇത്.കേന്ദ്ര സര്‍ക്കാരിനെതിരെ ശബ്ദമുയര്‍ത്താനും പുതിയ യു ഡി എഫ് സര്‍ക്കാര്‍ തയാറാകണമെന്നും അദ്ദേഹം ആവശ്യപ്പെട്ടു. ജനങ്ങള്‍ക്ക് ആശ്വാസമേകാന്‍ സംസ്ഥാന നികുതി കുറയ്‌ക്കാന്‍ യു ഡി എഫ് സര്‍ക്കാര്‍ എന്തൊക്കെ നടപടികളാണ് സ്വീകരിക്കുകയെന്ന് അറിയാന്‍ കേരളത്തിലെ ജനങ്ങള്‍ ഇപ്പോള്‍ ആകാംക്ഷാഭരിതരാണെന്നും പിണറായി വിജയന്‍ പ്രസ്താവനയില്‍ പറഞ്ഞു.
ഇന്ധനവില വര്‍ധിക്കുന്നതിനെ തുടര്‍ന്ന് കേരളത്തില്‍ സെസ് കുറയ്‌ക്കുന്ന കാര്യം പരിശോധിക്കുകയാണെന്ന് രാവിലെ മുഖ്യമന്ത്രി വി ഡി സതീശന്‍ വാര്‍ത്താ സമ്മേളനത്തില്‍ പറഞ്ഞിരുന്നു.അതേസമയം, ഇറാനും യു എസും തമ്മിലുളള സംഘര്‍ഷം മൂലം രാജ്യാന്തര വിപണിയില്‍ അസംസ്‌കൃത എണ്ണ വില കുതിച്ചുയരുകയാണ്. മറ്റ് രാജ്യങ്ങളെ അപേക്ഷിച്ച് പെട്രോള്‍,ഡീസല്‍ വില വര്‍ദ്ധന ഭാരതത്തില്‍ കുറവാണ്.
