ന്യൂദല്‍ഹി : ഇന്ത്യയും ന്യൂസിലാന്‍ഡും തമ്മിലുള്ള സ്വതന്ത്ര വ്യാപാര കരാര്‍ പ്രാബല്യത്തില്‍ ന്നു.വിജയദശമിയോടനുബന്ധിച്ച ആഘോഷവേളയിലാണ് കരാര്‍ പ്രാബല്യത്തില്‍ വരുന്നതെന്ന പ്രത്യേകതയുമുണ്ട്.കരാര്‍ പ്രകാരം, ഇന്ത്യയില്‍ നിന്ന് ന്യൂസിലാന്‍ഡിലേക്കുള്ള എല്ലാ കയറ്റുമതി ഉല്‍പ്പന്നങ്ങള്‍ക്കും (100 ശതമാനം) തീരുവ രഹിത പ്രവേശനം ലഭിക്കും.
ന്യൂദല്‍ഹിയില്‍ നടന്ന ചടങ്ങില്‍ സംസാരിക്കവെ, ‘വികസിത് ഭാരത് 2047’ എന്ന പ്രധാനമന്ത്രി നരേന്ദ്ര മോദിയുടെ കാഴ്ചപ്പാടിന് അനുസൃതമാണ് ഈ കരാര്‍ എന്ന് വാണിജ്യ-വ്യവസായ മന്ത്രി പിയൂഷ് ഗോയല്‍ പറഞ്ഞു. ഇന്ത്യയിലെ കയറ്റുമതിക്കാര്‍ക്ക്, പ്രത്യേകിച്ച് ചെറുകിട-ഇടത്തരം സംരംഭങ്ങള്‍ കരകൗശല വിദഗ്ധര്‍, കര്‍ഷകര്‍, ഫാര്‍മസ്യൂട്ടിക്കല്‍ മേഖലയിലുള്ളവര്‍ എന്നിവര്‍ക്ക് ഈ കരാര്‍ പുതിയ അവസരങ്ങള്‍ തുറന്നുനല്‍കുന്നു. 2030-ഓടെ ന്യൂസിലാന്‍ഡുമായുള്ള ഉഭയകക്ഷി വ്യാപാരം (ചരക്കുകളും സേവനങ്ങളും ഉള്‍പ്പെടെ) ഏകദേശം 35,000 കോടി രൂപയായി ഇരട്ടിയാക്കാന്‍ ഇരുരാജ്യങ്ങളും ധാരണയിലെത്തിയതായി അദ്ദേഹം ചൂണ്ടിക്കാട്ടി.
പഴങ്ങള്‍, പച്ചക്കറികള്‍, സുഗന്ധവ്യഞ്ജനങ്ങള്‍, മറ്റ് കാര്‍ഷിക ഉല്‍പ്പന്നങ്ങള്‍ എന്നിവയ്‌ക്ക് ന്യൂസിലാന്‍ഡ് വിപണിയില്‍ ഇന്ത്യന്‍ കര്‍ഷകര്‍ക്ക് കൂടുതല്‍ അവസരങ്ങള്‍ ലഭിക്കുമെന്ന് പിയൂഷ് ഗോയല്‍ പറഞ്ഞു. ഉല്‍പ്പാദനക്ഷമത വര്‍ദ്ധിപ്പിക്കാനും വരുമാനം ഉയര്‍ത്താനും ഉപജീവനമാര്‍ഗങ്ങള്‍ ശക്തിപ്പെടുത്താനും ഈ കരാര്‍ സഹായിക്കും. കര്‍ഷകരുടെ ക്ഷേമത്തിന് സര്‍ക്കാര്‍ മുന്‍ഗണന നല്‍കുന്നതിനാല്‍, ക്ഷീരമേഖല പോലുള്ള സെന്‍സിറ്റീവ് മേഖലകള്‍ക്ക് സംരക്ഷണം ഉറപ്പാക്കിയിട്ടുണ്ടെന്നും അദ്ദേഹം വ്യക്തമാക്കി.
ഇന്ത്യയില്‍ 20 ബില്യണ്‍ യുഎസ് ഡോളര്‍ നിക്ഷേപം കൊണ്ടുവരാനുള്ള ന്യൂസിലാന്‍ഡിന്റെ തീരുമാനം, ഉല്‍പ്പാദനം, അടിസ്ഥാന സൗകര്യങ്ങള്‍, സേവനങ്ങള്‍, നവീകരണം എന്നീ മേഖലകളെ ശക്തിപ്പെടുത്താന്‍ വലിയ സാധ്യതകളാണ് തുറന്നുതരുന്നത്. ഈ കരാര്‍ തൊഴിലവസരങ്ങള്‍ സൃഷ്ടിക്കുമെന്നും അദ്ദേഹം പറഞ്ഞു. വളര്‍ച്ചയെക്കുറിച്ചും പരസ്പര സമൃദ്ധിയെക്കുറിച്ചുമുള്ള ഇരുരാജ്യങ്ങളുടെയും പൊതുവായ കാഴ്ചപ്പാടിലൂടെ, ഇരുവിഭാഗത്തിനും ഗുണകരമായ ഈ പങ്കാളിത്തം വരുംകാലങ്ങളില്‍ കൂടുതല്‍ നേട്ടങ്ങള്‍ കൈവരിക്കുമെന്ന് അദ്ദേഹം പ്രത്യാശ പ്രകടിപ്പിച്ചു.
ഈ വര്‍ഷം ഏപ്രിലില്‍ ന്യൂദല്‍ഹിയിലെ ഭാരത് മണ്ഡപത്തില്‍ വച്ചാണ് ഇന്ത്യയും ന്യൂസിലാന്‍ഡും തമ്മിലുള്ള സ്വതന്ത്ര വ്യാപാര കരാറില്‍ ഒപ്പുവെച്ചത്. സേവനങ്ങള്‍, നിക്ഷേപം, പ്രൊഫഷണലുകളുടെയും വിദ്യാര്‍ത്ഥികളുടെയും യുവാക്കളുടെയും സഞ്ചാരം തുടങ്ങിയ മേഖലകളില്‍ ഈ കരാര്‍ പുതിയ അവസരങ്ങള്‍ സൃഷ്ടിക്കും. പ്രത്യേകിച്ച് ഇന്ത്യന്‍ പ്രൊഫഷണലുകള്‍ക്കും വിദ്യാര്‍ത്ഥികള്‍ക്കും കൂടുതല്‍ വഴികള്‍ തുറന്നുകിട്ടും. ഇന്ത്യയും ന്യൂസിലാന്‍ഡും തമ്മില്‍ ദീര്‍ഘകാലമായി അടുത്ത ബന്ധമാണുള്ളത്. ജനങ്ങള്‍ തമ്മിലുള്ള ശക്തമായ ബന്ധവും, വ്യാപാരം, നിക്ഷേപം, കൃഷി, വിദ്യാഭ്യാസം, കായികം, സാങ്കേതികവിദ്യ തുടങ്ങിയ മേഖലകളിലെ വിപുലമായ സഹകരണവുമാണ് ഈ ബന്ധത്തിന് അടിത്തറയേകുന്നത്. 2025-26 കാലയളവില്‍ ഇന്ത്യയും ന്യൂസിലാന്‍ഡും തമ്മിലുള്ള ചരക്ക് വ്യാപാരം ഏകദേശം 1.1 ബില്യണ്‍ യുഎസ് ഡോളറായിരുന്നു. ഈ ബന്ധങ്ങള്‍ കൂടുതല്‍ ശക്തിപ്പെടുത്തുന്നതിനും ഇരുരാജ്യങ്ങളിലെയും ബിസിനസുകള്‍ക്കും സമൂഹങ്ങള്‍ക്കും പുതിയ അവസരങ്ങള്‍ സൃഷ്ടിക്കുന്നതിനുമുള്ള സുപ്രധാന ചുവടുവെപ്പാണ് ഈ സ്വതന്ത്ര വ്യാപാര കരാര്‍
ഇന്ത്യയില്‍ നിന്ന് ന്യൂസിലാന്‍ഡിലേക്കുള്ള ആദ്യത്തെ ജെസിബി യന്ത്രത്തിന്റെ കയറ്റുമതിക്ക് ഗോയല്‍ ഫ്‌ലാഗ് ഓഫ് ചെയ്തു. കൃഷി, രത്‌ന-ആഭരണങ്ങള്‍, എന്‍ജിനീയറിംഗ്, കായിക സാമഗ്രികള്‍, പാദരക്ഷകള്‍, തുകല്‍ ഉല്‍പ്പന്നങ്ങള്‍ തുടങ്ങിയ മേഖലകളിലെ വിവിധ ഉല്‍പ്പന്നങ്ങളുടെ കയറ്റുമതിക്കും ഇന്ന് തുടക്കം കുറിച്ചു.
