നാഗ്പൂര്‍: ‘ഇന്ത്യയിൽ ഭരണമാറ്റം സംഭവിക്കില്ലെന്ന് ആർ.എസ്.എസ്. മേധാവി മോഹൻ ഭാഗവത്. ഫ്രാൻസ്, അൽബേനിയ, ബംഗ്ലാദേശ്, നേപ്പാൾ എന്നിവിടങ്ങളിലെ അക്രമസംഭവങ്ങൾ ചൂണ്ടിക്കാട്ടി, ഇത്തരം പ്രവണതകൾ ഇന്ത്യയെയും ബാധിക്കുന്നുണ്ടെന്ന് അദ്ദേഹം പറഞ്ഞു.
നാഗ്പൂരിൽ നടന്ന ആർ.എസ്.എസ്. വാർഷിക വിജയദശമി പരിപാടിയിൽ സംസാരിക്കവെയാണ്, ഇന്ത്യയിൽ ഇപ്പോൾ ചർച്ചാവിഷയമായിരിക്കുന്ന ‘ഭരണമാറ്റം’ (regime change) എന്ന വിഷയത്തെക്കുറിച്ച് സംഘടനയുടെ മേധാവി മോഹൻ ഭാഗവത് പരാമർശിച്ചത്. ഇന്ത്യയിൽ അത്തരമൊരു മാറ്റം സംഭവിക്കില്ലെന്ന് അദ്ദേഹം വ്യക്തമാക്കി.
ഭരണമാറ്റം ലക്ഷ്യമിട്ടുള്ള പ്രക്ഷോഭങ്ങൾ അടിസ്ഥാനപരമായ പ്രശ്നങ്ങൾക്ക് പരിഹാരം കാണുന്നില്ലെന്ന് ഭാഗവത് പറഞ്ഞു. ഇത്തരം പ്രതിഷേധങ്ങൾ പലപ്പോഴും രാഷ്‌ട്രീയ താൽപ്പര്യങ്ങൾ നേടിയെടുക്കാനുള്ള ഉപാധികളായി മാറുകയും, പരിഹാരങ്ങൾ നൽകുന്നതിന് പകരം സമൂഹത്തിൽ ഭിന്നതകൾ വളർത്തുകയുമാണ് ചെയ്യുന്നതെന്ന് അദ്ദേഹം മുന്നറിയിപ്പ് നൽകി. ബംഗ്ലാദേശ്, നേപ്പാൾ, ഫ്രാൻസ്, അൽബേനിയ എന്നിവിടങ്ങളിലെ സമീപകാല സംഭവവികാസങ്ങൾ ചൂണ്ടിക്കാട്ടിയ അദ്ദേഹം, സ്വന്തം താൽപ്പര്യങ്ങൾ സംരക്ഷിക്കാൻ ശ്രമിക്കുന്ന ശക്തികൾ രാഷ്‌ട്രീയ സാഹചര്യങ്ങൾ മാറ്റിയെടുക്കാൻ ‘ഭരണമാറ്റം’ എന്ന മാർഗ്ഗം ഉപയോഗിക്കുന്നുണ്ടെന്നും, എന്നാൽ ഇതിലൂടെ ഉദ്ദേശിച്ച ഫലങ്ങൾ ലഭിക്കാറില്ലെന്നും പറഞ്ഞു. സംസ്കാരത്തെയും വ്യവസ്ഥിതിയെയും സുരക്ഷയെയും വെറുക്കുന്ന, ‘പാശ്ചാത്യദേശത്തുനിന്നുവരുന്ന ഒരു കൊടുങ്കാറ്റ്’ എന്നാണ് അദ്ദേഹം ഇതിനെ വിശേഷിപ്പിച്ചത്.
“ക്രമം, ഔചിത്യം, മംഗളകരമായ കാര്യങ്ങൾ, സംസ്കാരം, മാനുഷിക മൂല്യങ്ങൾ എന്നിവയെ എതിർക്കുന്ന, അവയെ നശിപ്പിക്കാനും വികൃതമാക്കാനും തകർക്കാനും ശ്രമിക്കുന്ന ഒരു കൊടുങ്കാറ്റ് പാശ്ചാത്യദേശത്തുനിന്ന് വീശിയടിക്കുന്നുണ്ട്. വികസിത രാജ്യങ്ങൾ പോലും ഇതിന്റെ പ്രത്യാഘാതങ്ങൾ നേരിടുന്നു. സമീപദിവസങ്ങളിലെ വാർത്തകൾ പരിശോധിച്ചാൽ മതി; ഫ്രാൻസ്, അൽബേനിയ, ബംഗ്ലാദേശ്, നേപ്പാൾ എന്നിവിടങ്ങളിൽ എന്താണ് സംഭവിക്കുന്നതെന്ന് കാണാം… നമ്മുടെ സമൂഹം വളരെ വലുതാണ്, രാജ്യം വികസനപാതയിലുമാണ്; അതിനാൽ വെല്ലുവിളികൾ നിലനിൽക്കുന്നുണ്ട്…” – നിലവിൽ നടക്കുന്ന പ്രതിഷേധങ്ങളെ പരോക്ഷമായി സൂചിപ്പിച്ചുകൊണ്ട് അദ്ദേഹം പറഞ്ഞു.
