തിരുവനന്തപുരം: മുഖ്യമന്ത്രി വി.ഡി.സതീശന്റെ സെക്രട്ടറിയായി ഡോ.രത്തന്‍ ഖേല്‍ക്കറിനെ നിയമിച്ച നടപടി കോണ്‍ഗ്രസ് പാര്‍ട്ടിയുടെ ഇരട്ടത്താപ്പിന്റെ നേര്‍സാക്ഷ്യമെന്ന് ബിജെപി നേതാവ് വി.മുരളീധരന്‍ എംഎല്‍എ. കോണ്‍ഗ്രസ് പാര്‍ട്ടിയുടെ അവസരവാദ രാഷ്‌ട്രീയത്തിന്റെ ഏറ്റവും ഒടുവിലത്തെ ഉദാഹരണമാണിതെന്നും അദ്ദേഹം പറഞ്ഞു.
ബംഗാളില്‍ മുന്‍ കമ്മിഷണറെ മുഖ്യമന്ത്രിയുടെ സെക്രട്ടറിയാക്കിയപ്പോള്‍ തിരഞ്ഞെടുപ്പ് തിരിമറിയുടെ പ്രതിഫലം എന്ന് വിമര്‍ശിച്ച രാഹുല്‍ ഗാന്ധി എവിടെപ്പോയെന്ന് വി.മുരളീധരന്‍ പരിഹസിച്ചു. കേരളത്തിന്‍ മുന്‍ കമ്മീഷണറായിട്ടുള്ള രത്തന്‍ഖേല്‍ക്കറെ നിയമിക്കാനെടുത്ത തീരുമാനം തെരഞ്ഞെടുപ്പ് തിരിമറി നടത്താന്‍ കോണ്‍ഗ്രസിനെ സഹായികമായിട്ടുള്ള നിലപാട് എടുത്തതിനുള്ള പാരിതോഷികമാണോയെന്ന് രാഹുല്‍ ഗാന്ധി മറുപടി പറയണം . വി. ഡി. സതീശന്‍ തെരഞ്ഞെടുപ്പിന് മുന്‍പ് പ്രഖ്യാപിച്ചിരുന്നു നൂറ് സീറ്റ് യുഡിഎഫിന് ലഭിക്കുമെന്ന് സതീശന്‍ ഉറപ്പിച്ച് പറഞ്ഞത് തെരഞ്ഞെടുപ്പ് കമ്മിഷനുമായുള്ള ഡീലിന്റെ ഭാഗമായിരുന്നോ എന്നും അദ്ദേഹം ചോദിച്ചു.
രത്തന്‍ ഖേല്‍ക്കറുടെ നിയമനം സംശയാസ്പദമല്ലെങ്കില്‍ രാഹുല്‍ ഗാന്ധിയും കോണ്‍ഗ്രസും ബംഗാളിലെ ബിജെപി സര്‍ക്കാരിനോട് മാപ്പ് പറയണമെന്നും വി.മുരളീധരന്‍ ആവശ്യപ്പെട്ടു. മുഖ്യമന്ത്രിയുടെ ഓഫീസിലെ പല നിയമനങ്ങളും വ്യക്തിപരമായി കിട്ടിയ സഹായങ്ങളുടെ പ്രത്യുപകാരമെന്ന അടക്കംപറച്ചില്‍ തലസ്ഥാനത്ത് ഉണ്ടെന്നും ബിജെപി കാര്യാലയത്തില്‍ മാധ്യമങ്ങളെ കണ്ട വി.മുരളീധരന്‍ പറഞ്ഞു.
