ചെന്നൈ: തമിഴ്‌നാട് മുഖ്യമന്ത്രി സി ജോസഫ് വിജയ്‌യുടെ ജ്യോത്സ്യനായ റിക്കി രാധൻ പണ്ഡിറ്റ് വെട്രിവേലിനെ മുഖ്യമന്ത്രിയുടെ സ്‌പെഷ്യൽ ഡ്യൂട്ടി ഓഫീസറായി നിയമിച്ചു. മുഖ്യമന്ത്രിയുടെ (രാഷ്‌ട്രീയ) ഓഫീസർ ഓൺ സ്‌പെഷ്യൽ ഡ്യൂട്ടി (ഒഎസ്ഡി) ആയി റിക്കി രാധൻ പണ്ഡിറ്റ് വെട്രിവേലിനെ നിയമിച്ചുകൊണ്ട് തമിഴ്‌നാട് പൊതു വകുപ്പ് ഉത്തരവ് പുറപ്പെടുവിച്ചു.
വിജയ്‌യുടെ തമിഴക വെട്രി കഴകം (ടിവികെ) നിയമസഭാ തെരഞ്ഞെടുപ്പിൽ വൻ മുന്നേറ്റം നടത്തിയപ്പോൾ, രാഷ്‌ട്രീയ നിരീക്ഷകർക്കൊപ്പം തന്നെ ചർച്ചകളിൽ നിറഞ്ഞ വ്യക്തിയാണ് പ്രശസ്ത ജ്യോതിഷിയും സംഖ്യാശാസ്ത്രജ്ഞനുമായ രാധൻ പണ്ഡിറ്റ്. ദ്രാവിഡ രാഷ്‌ട്രീയത്തിലെ അതികായരായ ഡിഎംകെയെയും എഐഎഡിഎംകെയെയും പിന്നിലാക്കി വിജയ് നേടിയ ഈ വിജയം മാസങ്ങൾക്ക് മുൻപേ ഇദ്ദേഹം പ്രവചിച്ചിരുന്നു.
രാഷ്‌ട്രീയ പ്രവേശനം പ്രഖ്യാപിച്ച സമയത്ത് വിജയ് യുടെ രാഷ്‌ട്രീയ ഭാവിയിൽ പലരും സംശയം പ്രകടിപ്പിച്ചിരുന്നു. എന്നാൽ, വിജയ്‌യുടെ ജാതകവും ജന്മനക്ഷത്രവും പരിശോധിച്ച രാധൻ പണ്ഡിറ്റ്, തമിഴ് രാഷ്‌ട്രീയത്തിൽ ഒരു വലിയ ‘സൂനാമി’ വരാനിരിക്കുന്നു എന്നായിരുന്നു പ്രവചിച്ചത്. പാർട്ടിയുടെ പേരായ ‘തമിഴക വെട്രി കഴകം’ വിജയിന്റെ ജന്മവിവരങ്ങളുമായി ചേർന്നുപോകുന്ന രീതിയിലാണ് തെരഞ്ഞെടുത്തതെന്ന് അദ്ദേഹം അവകാശപ്പെട്ടിരുന്നു.
നാല് പതിറ്റാണ്ടിലേറെയായി ജ്യോതിഷ രംഗത്ത് സജീവമായ രാധൻ പണ്ഡിറ്റ് തമിഴ്‌നാട്ടിലെ രാഷ്‌ട്രീയ-ബിസിനസ് പ്രമുഖരുടെ വിശ്വസ്തനായ ആത്മീയ ഉപദേശകനാണ്. മുൻ മുഖ്യമന്ത്രി ജയലളിതയുടെ അടുത്ത അനുയായിയും അവരുടെ നിർണായക തീരുമാനങ്ങളിൽ ഉപദേശം നൽകിയിരുന്ന വ്യക്തിയുമായിരുന്നു അദ്ദേഹം. രാഷ്‌ട്രീയ മാറ്റങ്ങൾ കൃത്യമായി മുൻകൂട്ടി പറയുന്നതിൽ രാധൻ പണ്ഡിറ്റിന് പ്രത്യേക വൈദഗ്ധ്യമുണ്ടെന്നാണ് അനുയായികൾ വിശ്വസിക്കുന്നത്.
