കൊച്ചി: ബിജെപി പിന്തുണ സ്വീകരിച്ചുകൊണ്ടുള്ള സ്ഥാനാര്‍ത്ഥിയാകാന്‍ നടി അഞ്ജലി നായര്‍ തീരുമാനിച്ചതിനെ പിന്തുണച്ച് നടി സരയൂ. അഞ്ജലി നായരുടെ സ്ഥാനാര്‍ത്ഥിത്വത്തെ വിമര്‍ശന ബുദ്ധിയോടെ സമീപിച്ച ചില യുട്യൂബര്‍മാര്‍ക്ക് നല്‍കിയ മറുപടിയിലാണ് നടി സരയൂ ഇക്കാര്യം വ്യക്തമാക്കിയത്.
“ഇന്ത്യ ഒരു സ്വതന്ത്രരാജ്യമല്ലേ. ഏത് പാര്‍ട്ടിയ്‌ക്കൊപ്പം നില്‍ക്കണം, ഏത് തെരഞ്ഞെടുക്കണം എന്നതെല്ലാം ഏതൊരാളുടെയും വ്യക്തിപരമായ കാര്യമല്ലേ?”.- സരയൂ ചോദിക്കുന്നു.
“ആ കുട്ടിക്ക് ശരിയെന്ന് തോന്നുന്ന കാര്യം ആ കുട്ടി ചെയ്യുന്നു. ചെയ്യുന്ന കാര്യം നൂറ് ശതമാനം സത്യസന്ധമായി ചെയ്യാന്‍ അവള്‍ക്ക് സാധിക്കട്ടെ എന്ന് ആശംസിക്കുന്നു. അവള്‍ക്കെതിരെ ട്രോളുകള്‍ ക്രിയേറ്റ് ചെയ്യുന്നത് അവളല്ല, ബാക്കിയുള്ളവരാണ്.”- സരയൂ മറുപടി നല്‍കി.
കടുത്ത ത്രികോണമത്സരമാണ് തൃപ്പൂണിത്തുറയില്‍ നടക്കുന്നത്. ട്വന്‍റി ട്വന്‍റി സ്ഥാനാര്‍ത്ഥിയായി എന്‍ഡിഎയെ പ്രതിനിധീകരിച്ച് മത്സരിക്കുന്ന അഞ്ജലി നായര്‍ക്ക് വിജയപ്രതീക്ഷയുണ്ട്. ഇവിടെ 81 ശതമാനത്തില്‍ അധികം പോളിംഗ് നടന്നിരുന്നു. ഉയര്‍ന്ന പോളിംഗ് അട്ടിമറി വിജയത്തിന്റെ സൂചനയാണോ എന്നും വിശ്വസിക്കുന്നു. തൃപ്പൂണിത്തുറ മുനിസിപ്പാലിറ്റി ബിജെപി നേടിയതിന് തൊട്ടുപിന്നാലെയാണ് നിയമസഭാ തെരഞ്ഞെടുപ്പെത്തിയത്. ഇവിടുത്തെ ബിജെപിയുടെ വിജയം തനിക്ക് അനുകൂലമാക്കി മാറ്റുന്നതില്‍ അഞ്ജലി നായര്‍ വിജയിച്ചിട്ടുണ്ട്. ചക്ക ചിഹ്നത്തിലായിരുന്നു അഞ്ജലി നായര്‍ മത്സരിച്ചത്. കോണ്‍ഗ്രസിന് വേണ്ടി ദീപക് ജോയിയും സിപിഎമ്മിന് വേണ്ടി കെ.എന്‍. ഉണ്ണികൃഷ്ണനുമാണ് ഇവിടെ മാറ്റുരയ്‌ക്കുന്നത്. എം.സ്വരാജ് കെ. ബാബുവിനെയും പിന്നീട് കെ. ബാബു എം.സ്വരാജിനേയും അട്ടിമറിച്ച മണ്ഡലമാണ് തൃപ്പൂണിത്തുറ. ഇവിടെ 2016ലും 2021ലും 25000 വോട്ടുകള്‍ മാത്രമേ എന്‍ഡിഎ സ്ഥാനാര്‍ത്ഥിക്ക് പിടിക്കാന്‍ കഴിഞ്ഞിട്ടുള്ളൂ. പക്ഷെ ട്വന്‍റി ട്വന്‍റി നേതാവ് സാബു ജേക്കബ് അഞ്ജലി നായര്‍ക്ക് വന്‍വിജയസാധ്യത കല്‍പിക്കുന്നു.
