ന്യൂദല്‍ഹി: ദിവസങ്ങള്‍ നീണ്ട ചൂടുപിടിച്ച പ്രചാരണത്തിന് ഒടുവില്‍ തമിഴ്നാട്ടിലെ മുഴുവന്‍ മണ്ഡലങ്ങളിലും പശ്ചിമബംഗാളിലെ 152 മണ്ഡലങ്ങളിലും ഇന്ന് വിധിയെഴുത്ത്. തമിഴ്നാട്ടിലെ 234 മണ്ഡലങ്ങളിലും ഒറ്റഘട്ടമായാണ് വോട്ടെടുപ്പ്. പശ്ചിമബംഗാളിലെ 142 മണ്ഡലങ്ങളില്‍ 29നാണ് വോട്ടെടുപ്പ്. പ്രശ്നബാധിത ബൂത്തുകളില്‍ സിസിടിവി ഉള്‍പ്പെടെ പ്രത്യേക ക്രമീകരണങ്ങള്‍ ഒരുക്കുമെന്നും സുതാര്യവും ഭയരഹിതവുമായ വോട്ടെടുപ്പ് ഉറപ്പാക്കുമെന്നും തെര. കമ്മിഷന്‍ അറിയിച്ചു.
തമിഴ്നാട്ടില്‍ മുഖ്യമന്ത്രി എം.കെ. സ്റ്റാലിന്റെ നേതൃത്വത്തിലുള്ള ഡിഎംകെ സര്‍ക്കാരിനെതിരെ ബിജെപിയും എഐഎഡിഎംകെയും നേതൃത്വം നല്‍കുന്ന എന്‍ഡിഎ സഖ്യം കനത്ത പോരാട്ടാത്തിലാണ്. ഇത്തവണ ഭരണത്തില്‍ എത്തുമെന്ന ശുഭപ്രതീക്ഷയിലാണ് എന്‍ഡിഎ സഖ്യം. കേന്ദ്രസേനയുടെ അടക്കമുള്ള കനത്ത സുരക്ഷാവലയത്തിലാണ് പശ്ചിമബംഗാള്‍. അക്രമികള്‍ക്കെതിരെ കര്‍ശന നടപടിയുണ്ടാകുമെന്ന് തെരഞ്ഞെടുപ്പ് കമ്മിഷനും അറിയിച്ചിട്ടുണ്ട്.
നേപ്പാള്‍, ബംഗ്ലാദേശ് അന്താരാഷ്‌ട്ര അതിര്‍ത്തികള്‍ പൂര്‍ണമായും അടച്ചു. എസ്ഐആര്‍ മുതല്‍ വനിതാ സംവരണം വരെയുള്ള വിഷയങ്ങളുയര്‍ത്തി ശക്തമായ പ്രചാരണമാണ് ബിജെപി സംസ്ഥാനത്ത് നടത്തിയത്. ബിജെപിക്ക് കൂടുതല്‍ സ്വാധീനമുള്ള വടക്കന്‍ ബംഗാളിലെ മണ്ഡലങ്ങളും ഇന്ന് ജനവിധി രേഖപ്പെടുത്തും. കഴിഞ്ഞ തെഞ്ഞെടുപ്പില്‍ 77 സീറ്റുകള്‍ നേടി കരുത്ത് തെളിയിച്ച ബിജെപി ഇത്തവണ ബംഗാള്‍ പിടിച്ചെടുക്കുമെന്ന പ്രഖ്യാപനമാണ് നടത്തിയിരിക്കുന്നത്.
