കൊല്‍ക്കത്ത: മമതയെ തൂത്തെറിഞ്ഞ് ബംഗാളിലും ഹിമന്തയുടെ തോളിലേറി ആസാമിലും ബിജെപി കൊയ്തത് വമ്പന്‍ നേട്ടം. വോട്ടുവിഹിതം കുത്തനെയാണ് വര്‍ധിപ്പിച്ചത്. ആസാമില്‍ ബിജെപിക്ക് 37.81% വോട്ടും സഖ്യകക്ഷികളായ എജിപിക്ക് 6.47% വോട്ടും ബിപിഎഫിന് 3.73% വോട്ടും ലഭിച്ചു.
ആസാമില്‍ 2016ലെ നിയമസഭാ തെരഞ്ഞെടുപ്പില്‍ എന്‍ഡിഎയ്‌ക്ക് 29.5% വോട്ടുവിഹിതമാണുണ്ടായിരുന്നത്. 2021ല്‍ ഇത് 33% ആയി. 2026ലെ തെരഞ്ഞെടുപ്പില്‍ വോട്ടുവിഹിതം 5% ത്തിലധികം വര്‍ധിച്ച് 38%ത്തിനടുത്തെത്തി. മൂന്നാം തവണയും എന്‍ഡിഎ ഉജ്ജ്വല വിജയം നേടിയപ്പോള്‍ 126 സീറ്റുകളില്‍ 102 എണ്ണവും നേടി. മത്സരിച്ച 90 സീറ്റുകളില്‍ 82 എണ്ണവും ബിജെപി നേടി. കേവല ഭൂരിപക്ഷമായ 64 സീറ്റിനെക്കാള്‍ 18 കൂടുതല്‍. ആദ്യമായാണ് ഒറ്റയ്‌ക്ക് ഭൂരിപക്ഷം നേടുന്നത്. സഖ്യകക്ഷികളായ ആസാം ഗണ പരിഷത്ത് (എജിപി), ബോഡോലാന്‍ഡ് പീപ്പിള്‍സ് ഫ്രണ്ട് (ബിഒപിഎഫ്) എന്നിവ 10 സീറ്റുകള്‍ വീതം നേടി.
അഞ്ച് പാര്‍ട്ടികളുമായി സഖ്യമുണ്ടാക്കിയ കോണ്‍ഗ്രസിന് 19 സീറ്റുകളേ നേടാനായുള്ളൂ. 29.84% വോട്ടാണ് ലഭിച്ചത്. സഖ്യകക്ഷികളില്‍ ഒന്നായ റൈജോര്‍ ദളിന് മാത്രമാണ് രണ്ട് സീറ്റുകളില്‍ വിജയം നേടാനായത്. സ്വതന്ത്രരായി മത്സരിച്ച ഓള്‍ ഇന്ത്യ യുണൈറ്റഡ് ഡെമോക്രാറ്റിക് ഫ്രണ്ടിന് (എഐയുഡിഎഫ്) രണ്ട് സീറ്റും, തൃണമൂല്‍ കോണ്‍ഗ്രസിന് ഒരു സീറ്റും ലഭിച്ചു.
ബംഗാളില്‍ 207 സീറ്റുകള്‍ നേടിയാണ് അധികാരത്തില്‍ എത്തുന്നത്. ഭരണകക്ഷിയായിരുന്ന തൃണമൂല്‍ കോണ്‍ഗ്രസിന് 80 സീറ്റുകളില്‍ മാത്രമാണ് വിജയം. കഴിഞ്ഞ തവണ 38.4 ശതമാനമായിരുന്ന ബിജെപിയുടെ വോട്ടുവിഹിതം ഇത്തവണ 45.84 ശതമാനമായി. 2021ലെ തെരഞ്ഞെടുപ്പില്‍ 215 സീറ്റ് നേടിയ ടിഎംസി 48.2 ശതമാനം വോട്ട് നേടിയപ്പോള്‍ ബിജെപിയുടേത് 38.4 ശതമാനമായിരുന്നു. 203 സീറ്റുകളില്‍ ബിജെപിയുടെ വോട്ടുവിഹിതം കഴിഞ്ഞ തവണത്തേതിനെക്കാള്‍ അഞ്ച് ശതമാനം ഉയര്‍ന്നു.
സിപിഎം (1 സീറ്റ്) 4.45 ശതമാനവും, കോണ്‍ഗ്രസ് (2 സീറ്റ്) 2.97 ശതമാനവും വോട്ട് നേടി. ബിജെപിയുടെ വോട്ടുവിഹിതം ഉയര്‍ന്നപ്പോള്‍ മൂന്ന് തവണ തുടര്‍ച്ചയായി അധികാരത്തിലിരുന്ന ടിഎംസിക്ക് ഭൂരിഭാഗം മണ്ഡലങ്ങളിലും വോട്ടുവിഹിതം നഷ്ടപ്പെട്ടു. നിരവധി സീറ്റുകളില്‍ 20 ശതമാനത്തിലധികം ഇടിഞ്ഞു.
