ന്യൂദല്‍ഹി: പ്രധാനമന്ത്രി നരേന്ദ്ര മോദിയുമായി ആകമാന സുറിയാനി ഓര്‍ത്തഡോക്സ് സഭയുടെ പരമാദ്ധ്യക്ഷന്‍ പരിശുദ്ധ അന്ത്യോഖ്യ പാത്രിയര്‍ക്കീസ് ഇഗ്നാത്തിയോസ് അപ്രേം ദ്വിതീയന്‍ ബാവാ കൂടിക്കാഴ്ച നടത്തി. പ്രധാനമന്ത്രിയുടെ ഔദ്യോഗിക വസതിയിലായിരുന്നു കൂടിക്കാഴ്ച.
കൂടിക്കാഴ്ചയില്‍ ഏറെ അഭിമാനിക്കുന്നതായും വിവിധ വിഷയങ്ങളില്‍ സമഗ്ര ചര്‍ച്ച നടത്തിയതായും പ്രധാനമന്ത്രി എക്സില്‍ കുറിച്ചു. വളരെ അര്‍ത്ഥവത്തായതും പ്രചോദനാത്മകവുമായ ഒരു കൂടിക്കാഴ്ചയ്‌ക്ക് പ്രധാനമന്ത്രിക്ക് നന്ദി അറിയിക്കുന്നതായി പാത്രിയര്‍ക്കീസ് ബാവാ അഭിപ്രായപ്പെട്ടു. ന്യൂനപക്ഷങ്ങള്‍ ഉള്‍പ്പെടെ എല്ലാവര്‍ക്കും നീതി ഉറപ്പാക്കുക എന്നത് ഭാരതം പോലുള്ള ഒരു മഹത്തായ രാജ്യത്തിന്റെ ആത്മാവിന്റെ ഭാഗമാണെന്നും അദ്ദേഹം കുറിച്ചു.
മലങ്കര യാക്കോബായ സുറിയാനി സഭയുടെ ശ്രേഷ്ഠ കാതോലിക്കയും മലങ്കര മെത്രാപ്പൊലീത്തയും കേരളത്തിലെ എപ്പിസ്‌കോപ്പല്‍ സുന്നഹദോസ് അധ്യക്ഷനുമായ ആബൂന്‍ മോര്‍ ബസേലിയോസ് ജോസഫ് ബാവാ, ദല്‍ഹി ഭദ്രാസനാധിപന്‍ യൗസെബിയോസ് കുര്യാക്കോസ് മെത്രാപ്പൊലീത്ത, ബിജെപി സംസ്ഥാന അധ്യക്ഷന്‍ രാജീവ് ചന്ദ്രശേഖര്‍, ട്വന്റി ട്വന്റി അധ്യക്ഷന്‍ സാബു എം. ജേക്കബ് എന്നിവരും കൂടിക്കാഴ്ചയില്‍ പങ്കെടുത്തു.
ഇരുവിഭാഗങ്ങള്‍ തമ്മിലുള്ള പ്രശ്നങ്ങളെക്കുറിച്ച് പറഞ്ഞപ്പോള്‍ അത് പരിഹരിക്കണമെന്നും ആവശ്യമെങ്കില്‍ ഇടപെടല്‍ നടത്താമെന്നും പ്രധാനമന്ത്രി അറിയിച്ചതായി രാജീവ് ചന്ദ്രശേഖര്‍ പറഞ്ഞു. എല്ലാത്തിനെയും രാഷ്‌ട്രീയപരമായി കാണേണ്ടതില്ലെന്നും അദ്ദേഹം കൂട്ടിച്ചേര്‍ത്തു.
