തിരുവനന്തപുരം: യുദ്ധവും ദുരന്തവും മത്സര റിപ്പോര്‍ട്ടിങ്ങിനുള്ള വേദിയല്ലെന്നും അത്തരം വാര്‍ത്തകള്‍ നല്‍കുമ്പോള്‍ ധാര്‍മ്മികത പാലിക്കണമെന്നും സെന്‍സേഷണലിസം ഒഴിവാക്കണമെന്നും രാജ്യാന്തര മാധ്യമപ്രവര്‍ത്തക അഞ്ജന ശങ്കര്‍. ഇന്‍ഫര്‍മേഷന്‍ പബ്ലിക് റിലേഷന്‍സ് വകുപ്പ് തിരുവനന്തപുരം സംഘടിപ്പിച്ച സംസ്ഥാന മാധ്യമ ദിനാഘോഷത്തില്‍ പ്രഭാഷണം നടത്തുകയായിരുന്നു അവര്‍.
യുക്രൈന്‍, അഫ്ഗാനിസ്ഥാന്‍, യെമന്‍, സിറിയ, ഇസ്രയേല്‍ തുടങ്ങിയ സംഘര്‍ഷഭരിതമായ സ്ഥലങ്ങളില്‍ റിപ്പോര്‍ട്ട് ചെയ്ത അനുഭവങ്ങള്‍ മലയാളിയായ അഞ്ജന ശങ്കര്‍ മാധ്യമ വിദ്യാര്‍ത്ഥികളുമായി പങ്കുവെച്ചു. യുദ്ധമുഖത്ത് റിപ്പോര്‍ട്ട് ചെയ്യുമ്പോള്‍ മാധ്യമപ്രവര്‍ത്തകര്‍ തങ്ങളുടെ സുരക്ഷയ്‌ക്കാണ് പ്രഥമ പരിഗണന നല്‍കേണ്ടത്. സുരക്ഷാ മാനദണ്ഡങ്ങള്‍ പാലിക്കാതെയുള്ള റിപ്പോര്‍ട്ടിംഗ് രീതികള്‍ ഒഴിവാക്കണം. ബ്രേക്കിംഗ് ന്യൂസുകള്‍ നല്‍കാനുള്ള തിടുക്കത്തില്‍ വാര്‍ത്തകളുടെ വിശ്വാസ്യത നഷ്ടപ്പെടരുത്. റിപ്പോര്‍ട്ട് ചെയ്യുന്ന വിഷയത്തിനും അതിലെ മനുഷ്യര്‍ക്കുമാണ് എപ്പോഴും പ്രാധാന്യം നല്‍കേണ്ടത്. ആക്ടിവിസവും ജേണലിസവും രണ്ടാണെന്ന ബോധ്യമുണ്ടാവണം. സംഘര്‍ഷ മേഖലയിലെ മാധ്യമ പ്രവര്‍ത്തനം സാഹസികതയല്ല മറിച്ച് കൃത്യമായ മുന്‍കരുതലുകളോടെ ചെയ്യേണ്ട ഉത്തരവാദിത്തമാണെന്നും അവര്‍ അഭിപ്രായപ്പെട്ടു.
ഇന്‍ഫര്‍മേഷന്‍ പബ്ലിക് റിലേഷന്‍സ് വകുപ്പ് സ്‌പെഷ്യല്‍ സെക്രട്ടറി ടി വി സുഭാഷ് സംസ്ഥാന മാധ്യമ ദിനാഘോഷം ഉദ്ഘാടനം ചെയ്തു. ഐ പി ആര്‍ ഡി അഡിഷണല്‍ ഡയറക്ടര്‍ കെ ജി സന്തോഷ് സ്വാഗതവും അഡിഷണല്‍ ഡയറക്ടര്‍ വി പി പ്രമോദ് കുമാര്‍ നന്ദിയും അറിയിച്ചു.
