ഭുവനേശ്വര്‍:കേന്ദ്ര വാര്‍ത്താ വിതരണ പ്രക്ഷേപണ മന്ത്രാലയത്തിന് കീഴിലുള്ള തിരുവനന്തപുരം പ്രസ് ഇന്‍ഫര്‍മേഷന്‍ ബ്യൂറോ (PIB) സംഘടിപ്പിക്കുന്ന ആറ് ദിവസത്തെ ഒഡിഷ മാധ്യമ പര്യടനത്തിന്റെ ഭാഗമായി കേരളത്തില്‍ നിന്നുള്ള മാധ്യമസംഘം കൊണാര്‍ക്കിലെ പ്രസിദ്ധമായ സൂര്യക്ഷേത്രവും പുരിയിലെ ജഗന്നാഥ ക്ഷേത്രവും സന്ദര്‍ശിച്ചു.
ഒഡിഷയുടെ സമ്പന്നമായ സാംസ്‌കാരിക, ആത്മീയ, കലാ പാരമ്പര്യങ്ങള്‍ നേരിട്ടറിയാന്‍ ഈ സന്ദര്‍ശനം മാധ്യമപ്രവര്‍ത്തകര്‍ക്ക് അവസരമൊരുക്കി.
പതിമൂന്നാം നൂറ്റാണ്ടിലെ വാസ്തുവിദ്യാ വിസ്മയവും യുനെസ്‌കോയുടെ (UNESCO) ലോക പൈതൃക കേന്ദ്രവുമായ കൊണാര്‍ക്ക് സൂര്യക്ഷേത്രത്തിലായിരുന്നു മാധ്യമസംഘത്തിന്റെ ആദ്യ സന്ദര്‍ശനം. സൂര്യഭഗവാന്റെ ദിവ്യരഥത്തിന്റെ മാതൃകയില്‍ നിര്‍മ്മിച്ചിരിക്കുന്ന ഈ സ്മാരകം, അതിസൂക്ഷ്മമായ ശിലാശില്പങ്ങള്‍, ചക്രങ്ങള്‍, കലിംഗ വാസ്തുവിദ്യ എന്നിവയാല്‍ പ്രശസ്തമാണ്. ക്ഷേത്രത്തിന്റെ ചരിത്രപരമായ പ്രാധാന്യത്തെക്കുറിച്ചും ഇന്ത്യയുടെ സാംസ്‌കാരിക പൈതൃകത്തില്‍ ഇതിനുള്ള സ്ഥാനത്തെക്കുറിച്ചും മാധ്യമസംഘം മനmിലാക്കി.
തുടര്‍ന്ന് സംഘം ചാര്‍ ധാം തീര്‍ത്ഥാടന കേന്ദ്രങ്ങളിലൊന്നായ പുരിയിലെ ജഗന്നാഥ ക്ഷേത്രം സന്ദര്‍ശിച്ചു. ജഗന്നാഥ ഭഗവാന്‍, ബലഭദ്രന്‍, സുഭദ്രാദേവി എന്നിവര്‍ക്കായി സമര്‍പ്പിച്ചിരിക്കുന്ന ഈ നൂറ്റാണ്ടുകള്‍ പഴക്കമുള്ള ക്ഷേത്രം ഒഡിഷയുടെ ആത്മീയ സാംസ്‌കാരിക ജീവിതത്തിന്റെ കേന്ദ്രബിന്ദുവാണ്. ക്ഷേത്രത്തിന്റെ ചരിത്രം, ആചാരങ്ങള്‍, മേഖലയിലെ പ്രാധാന്യം എന്നിവയെക്കുറിച്ച് സംഘത്തിന് അറിവ് ലഭിച്ചു.
ഒഡിഷയുടെ പൈതൃകം, ആത്മീയത, ജീവസുറ്റ കലാപാരമ്പര്യങ്ങള്‍ എന്നിവയെക്കുറിച്ച് ആഴത്തിലുള്ള ധാരണ ലഭിക്കാന്‍ ഈ സന്ദര്‍ശനം സഹായിച്ചു. ഇരു സംസ്ഥാനങ്ങളും തമ്മിലുള്ള വിവരങ്ങളുടെയും അനുഭവങ്ങളുടെയും കൈമാറ്റം വര്‍ദ്ധിപ്പിക്കുന്നതിനൊപ്പം ഒഡിഷയുടെ വികസന, സാംസ്‌കാരിക, ടൂറിസം മേഖലകളെക്കുറിച്ച് കേരളത്തിലെ മാധ്യമപ്രവര്‍ത്തകര്‍ക്ക് നേരിട്ടുള്ള അനുഭവം നല്‍കുകയാണ് മാധ്യമ പര്യടനത്തിലൂടെ ലക്ഷ്യമിടുന്നത്.
വരും ദിവസങ്ങളില്‍ ഒഡിഷയിലെ മറ്റ് പ്രധാന കേന്ദ്രങ്ങളിലേക്കും മാധ്യമസംഘത്തിന്റെ സന്ദര്‍ശനം തുടരും.
