ചെന്നൈ: ഹിന്ദി, ഇംഗ്ലീഷ് വിദ്യാഭ്യാസം സംബന്ധിച്ച് വീണ്ടും ഒരു രാഷ്‌ട്രീയ ചർച്ചയ്‌ക്ക് തുടക്കമിട്ടിരിക്കുകയാണ് ഡിഎംകെ എംപി ദയാനിധി മാരൻ. തമിഴ്നാട്ടിൽ ഒരു പരിപാടിയിൽ സംസാരിക്കവെ വടക്കേ ഇന്ത്യൻ സംസ്ഥാനങ്ങളെ ശക്തമായി വിമർശിച്ചുകൊണ്ട് മാരൻ സംസാരിച്ചത്. വിദ്യാർത്ഥികളെ ഹിന്ദി മാത്രം പഠിക്കാൻ പ്രോത്സാഹിപ്പിക്കുകയും ഇംഗ്ലീഷ് വിദ്യാഭ്യാസത്തിൽ നിന്ന് അവരെ നിരുത്സാഹപ്പെടുത്തുകയും ചെയ്യുന്നുവെന്ന് അദ്ദേഹം ആരോപിച്ചു. അത്തരം ചിന്താഗതി യുവാക്കൾക്ക് തൊഴിലവസരങ്ങൾ പരിമിതപ്പെടുത്തുകയും അവരെ മറ്റ് സംസ്ഥാനങ്ങളിലേക്ക് കുടിയേറാൻ പ്രേരിപ്പിക്കുകയും ചെയ്യുന്നുവെന്നും അദ്ദേഹം പറഞ്ഞു.
ചില സംസ്ഥാനങ്ങളിൽ ഇംഗ്ലീഷ് പഠിച്ചാൽ അവരുടെ ഭാവി നശിപ്പിക്കപ്പെടുമെന്ന് വിദ്യാർത്ഥികളോട് പറയാറുണ്ടെന്ന് മാരൻ ആരോപിച്ചു. “ഇംഗ്ലീഷ് പഠിക്കരുതെന്ന് നിങ്ങളോട് പറയുന്നു, അല്ലെങ്കിൽ നിങ്ങൾ നശിപ്പിക്കപ്പെടും. ഈ രീതിയിൽ, നിങ്ങളെ അടിമകളെപ്പോലെ നിലനിർത്തുന്നു” – അദ്ദേഹം പറഞ്ഞു. ഹിന്ദി അടിച്ചേൽപ്പിക്കുന്നതിനെക്കുറിച്ചുള്ള ചർച്ചയുമായിട്ടായിരുന്നു മാരന്റെ ഈ പ്രസ്താവന.
കൂടാതെ ഇത്തരം വിദ്യാഭ്യാസ നയങ്ങളുടെ ഫലമായാണ് വടക്കേ ഇന്ത്യയിൽ നിന്ന് ദക്ഷിണേന്ത്യയിലേക്കുള്ള ജനങ്ങളുടെ കുടിയേറ്റം ഉണ്ടായതെന്നും ഡിഎംകെ എംപി പറഞ്ഞു. തമിഴ്‌നാട് വിദ്യാഭ്യാസത്തിന് മുൻഗണന നൽകിയെന്നും അതുകൊണ്ടാണ് സംസ്ഥാനം സാമ്പത്തികമായി പുരോഗമിച്ചതെന്നും അദ്ദേഹം വാദിച്ചു. ഇന്ന് ലോകമെമ്പാടുമുള്ള വലിയ കമ്പനികൾ തമിഴ്‌നാട്ടിലേക്ക് വരുന്നത് ഇവിടെ വിദ്യാസമ്പന്നരായ ആളുകളുടെ ലഭ്യത മൂലമാണെന്ന് മാരൻ വാദിച്ചു. ഹിന്ദിയിൽ മാത്രം വിദ്യാഭ്യാസം പരിമിതപ്പെടുത്തുന്നത് മറ്റ് മേഖലകളിൽ തൊഴിലില്ലായ്‌മ വർദ്ധിപ്പിക്കുമെന്ന് അദ്ദേഹം അവകാശപ്പെട്ടു.
അതേസമയം തമിഴ്‌നാടിന്റെ ദ്രാവിഡ മാതൃക പെൺകുട്ടികൾക്കും ആൺകുട്ടികൾക്കും തുല്യ വിദ്യാഭ്യാസ അവസരങ്ങൾ നൽകുന്നു. ഇത് സംസ്ഥാനത്തെ സാക്ഷരതാ നിരക്കും തൊഴിൽ ശക്തിയിൽ സ്ത്രീകളുടെ പങ്കാളിത്തവും വർദ്ധിപ്പിച്ചു. ഇംഗ്ലീഷ് വിദ്യാഭ്യാസം വിദ്യാർത്ഥികളിൽ നിന്ന് അകറ്റി നിർത്തുന്നത് അവരുടെ ഭാവിയിലേക്കും തൊഴിലവസരങ്ങളിലേക്കുമുള്ള വാതിലുകൾ അടയ്‌ക്കുമെന്നും മാരൻ പറഞ്ഞു.
പ്രതിഷേധിച്ച് ബിജെപി
മാരന്റെ പ്രസ്താവനയോട് ബിജെപി രൂക്ഷമായി പ്രതികരിച്ചു. ദയാനിധി മാരന് സാമാന്യബുദ്ധി ഇല്ലെന്നും പ്രത്യേകിച്ച് ഹിന്ദി സംസാരിക്കുന്നവരോട് അദ്ദേഹം മാപ്പ് പറയണമെന്നും ബിജെപി നേതാവ് തിരുപ്പതി നാരായണൻ പറഞ്ഞു. ഹിന്ദി സംസാരിക്കുന്ന ആളുകളെ വിദ്യാഭ്യാസമില്ലാത്തവരും അപരിഷ്കൃതരുമായി ചിത്രീകരിക്കാൻ മാരൻ ശ്രമിച്ചുവെന്ന് അദ്ദേഹം ആരോപിച്ചു.
അതേസമയം തമിഴ്നാട്ടിൽ സ്ത്രീകളുടെ അവകാശങ്ങൾക്കും വിദ്യാഭ്യാസത്തിനുമായി ദീർഘകാലമായി പോരാട്ടം നടക്കുന്നുണ്ടെന്ന് പറഞ്ഞുകൊണ്ട് ഡിഎംകെ നേതാവ് ടികെഎസ് ഇളങ്കോവൻ മാരനെ ന്യായീകരിച്ചു. കോൺഗ്രസ് സർക്കാരുകൾ ഉള്ളിടത്ത് സ്ത്രീ വിദ്യാഭ്യാസത്തിനും ശാക്തീകരണത്തിനുമായി പ്രവർത്തനങ്ങൾ നടക്കുന്നുണ്ടെന്നും അദ്ദേഹം പറഞ്ഞു.
