തിരുവനന്തപുരം: തദ്ദേശ തിരഞ്ഞെടുപ്പില്‍ എല്‍ഡിഎഫിന്റെ തോല്‍വിക്ക് കാരണം ഭരണവിരുദ്ധ വികാരവും ശബരിമല വിവാദവുമാണെന്ന് സിപിഐ. ക്ഷേമാനുല്യങ്ങള്‍ നല്‍കിയിട്ടും ഫലം അനുകൂലമായില്ല. ഇത് ഭരണ വിരുദ്ധ വികാരത്തിന്റെ തെളിവാണെന്നും സിപിഐ സംസ്ഥാന നേതൃയോഗങ്ങളില്‍ വിമര്‍ശനം.
മുഖ്യമന്ത്രിയുടെ ചില കാര്യങ്ങളിലെ നിലപാടുകളില്‍ ജനങ്ങള്‍ക്ക് സംശയമുണ്ട്. എസ് എന്‍ ഡി പി യോഗം ജനറല്‍ സെക്രട്ടറി വെള്ളാപ്പള്ളി നടേശനെ വീണ്ടും ന്യായീകരിക്കുന്ന മുഖ്യമന്ത്രിയുടെ നിലപാട് ശരിയല്ലെന്നും വിമര്‍ശനമുണ്ടായി.
സ്വര്‍ണക്കൊള്ളയില്‍ അറസ്റ്റിലായ സി പി എം പത്തനംതിട്ട ജില്ലാ കമ്മിറ്റി അംഗം പത്മകുമാറിനെതിരെ നടപടി എടുക്കാത്തത് ജനങ്ങളില്‍ സംശയമുണ്ടാക്കി. ശബരിമല വിഷയത്തില്‍ ജനങ്ങളുടെ സംശയം ദൂരീകരിക്കാനായില്ല.പിഎം ശ്രീയില്‍ ഒപ്പിട്ടത് വിനയായി. തോല്‍വിയില്‍ നിന്ന് പാഠം ഉള്‍ക്കൊള്ളാതെ പോയിട്ട് കാര്യമില്ല. ഫലപ്രദമായ തിരുത്തല്‍ നടപടി വേണമെന്നും സിപിഐ ആവശ്യപ്പെട്ടു.
അതിനിടെ, തദ്ദേശ തിരഞ്ഞെടുപ്പില്‍ ശബരിമല സ്വര്‍ണക്കൊള്ള തിരിച്ചടിയായെന്ന് സിപിഎം ഇതു വരെ തുറന്ന് സമ്മതിച്ചിട്ടില്ല. പ്രതിപക്ഷം ജനങ്ങളെ തെറ്റിദ്ധരിപ്പിച്ചെന്നാണ് പാര്‍ട്ടിയുടെ വിലയിരുത്തല്‍.ജനുവരി 15 മുതല്‍ 22 വരെ ഗൃഹസന്ദര്‍ശനം നടത്തും. കേന്ദ്രസര്‍ക്കാരിന് എതിരെ മുഖ്യമന്ത്രിയുടെ നേതൃത്വത്തില്‍ സത്യഗ്രഹം സംഘടിപ്പിക്കും.എ പത്മകുമാറിന് എതിരെ കുറ്റപത്രം വന്നതിന് ശേഷമേ നടപടി ഉണ്ടാകൂ.
തദ്ദേശ തെരഞ്ഞടുപ്പ് തോല്‍വി വിലയിരുത്താന്‍ ചേര്‍ന്ന നേതൃയോഗങ്ങള്‍ക്ക് ശേഷമാണ്, പാര്‍ട്ടിയുടെ വിലയിരുത്തല്‍.വിജയിക്കുമെന്ന അമിതമായ ആത്മവിശ്വാസം,നഗരമേഖലയില്‍ ഉണ്ടായ സംഘടനാ ദൗര്‍ബല്യം, പ്രാദേശിക തലത്തില്‍ ഉണ്ടായ സംഘടനാ വീഴ്ചകള്‍ എന്നിവ തിരിച്ചടിയായെന്ന് സി പി എം വിലയിരുത്തി.
Main
