ചപ്പാത്തിക്ക് കുഴച്ച മാവ് പിന്നത്തേക്ക് എടുത്ത് വയ്ക്കാറുണ്ടോ? എന്നാല് ഇങ്ങനെ ഒരിക്കല് കുഴച്ച മാവ് പിന്നീട് ഉപയോഗിക്കുന്നതില് പലവിധ അപകടങ്ങള് ഉണ്ടാകാം എന്നാണ് വിദഗ്ധര് പറയുന്നത്.
സാധാരണയായി ഫ്രിജിലാണ് മാവ് നമ്മള് സൂക്ഷിക്കുന്നത്. ഫ്രിജില് വയ്ക്കാതെ 12 മണിക്കൂറിൽ കൂടുതൽ നേരം പുറത്തുവെച്ച മാവില്, ഇ കോളി, സാല്മോണല്ല തുടങ്ങിയ ദോഷകരമായ ബാക്ടീരിയകൾ വളരാനുള്ള സാധ്യത കൂടുതലാണ്. കൂടാതെ, മാവ് രാത്രി മുഴുവൻ ഇരിക്കുമ്പോൾ സ്വാഭാവികമായും അത് പുളിച്ചുപോകും. ഇത് മാവിലെ ഗ്ലൂട്ടൻ കൂട്ടും. ഈ മാവ് കൊണ്ട് ചപ്പാത്തി ഉണ്ടാക്കുമ്പോൾ അത് ദഹിക്കാൻ കൂടുതൽ പ്രയാസമാകും
എന്നാല്, ഫ്രിജിനുള്ളില് വെച്ച മാവ്, സമയപരിധിക്കുള്ളിൽ ഉപയോഗിച്ചാൽ ഇത് വളരെയേറെ ഗുണകരമാകും എന്നാണ് പഠനങ്ങള് പറയുന്നത്. ഈ മാവ് കൊണ്ട് ഉണ്ടാക്കുന്ന ചപ്പാത്തിയിൽ റെസിസ്റ്റന്റ് സ്റ്റാർച്ച് രൂപപ്പെടാം. ഈ റെസിസ്റ്റന്റ് സ്റ്റാർച്ച് ഒരു പ്രീബയോട്ടിക് ആയി പ്രവർത്തിക്കുന്നു. ഇത് കുടലിലെ നല്ല ബാക്ടീരിയകളെ പരിപോഷിപ്പിക്കുകയും പ്രതിരോധശേഷി വർദ്ധിപ്പിക്കുകയും ചെയ്യുന്നു.
റെസിസ്റ്റന്റ് സ്റ്റാർച്ച് കാരണം ഇതിന് ഗ്ലൈസെമിക് ഇൻഡെക്സ് കുറവായിരിക്കും. ഇത് രക്തത്തിലെ പഞ്ചസാരയുടെ അളവ് നിയന്ത്രിക്കുകയും പ്രമേഹമുള്ളവർക്കും ഭാരം കുറയ്ക്കാൻ ശ്രമിക്കുന്നവർക്കും സഹായകമാവുകയും ചെയ്യുന്നു.
അപകടസാധ്യതകൾ ഇവയാണ്
ഫ്രിജിൽ വക്കാത്തതോ 24 മണിക്കൂറിൽ കൂടുതൽ പഴക്കമുള്ളതോ ആയ മാവിൽ പൂപ്പലും രോഗകാരികളും വളരും. ഇത് കഴിക്കുന്നത് വയറുവേദന, ദഹന സംബന്ധമായ അണുബാധകൾ എന്നിവയ്ക്ക് കാരണമാവാം. അമിതമായി പുളിച്ച് പോയ മാവ്, വയറ്റിലെ അസിഡിറ്റി വർദ്ധിപ്പിക്കും. ഗ്ലൂട്ടൻ അലര്ജി ഉള്ളവര്ക്ക് ഈ പഴകിയ മാവിലെ പ്രോട്ടീനുകൾ വീക്കത്തിനും മറ്റ് ബുദ്ധിമുട്ടുകൾക്കും കാരണമാവാം.
മാവ് എയർടൈറ്റ് കണ്ടെയ്നറിലാക്കി, പരമാവധി 12 മണിക്കൂർ വരെ മാത്രം ഫ്രിഡ്ജിൽ സൂക്ഷിക്കുക. ഇനി, 48 മണിക്കൂർ വരെ മാവ് സുരക്ഷിതമായി സൂക്ഷിക്കാനായി, ചെറിയ ഭാഗങ്ങളാക്കി ഫ്രീസറിൽ വെക്കാവുന്നതാണ്. ഉപയോഗിക്കുന്നതിന് തലേദിവസം രാത്രി ഇത് ഫ്രിജിലേക്ക് മാറ്റി ഡീഫ്രോസ്റ്റ് ചെയ്യാം. മാവിന്റെ നിറം മാറുകയോ, ദുർഗന്ധം ഉണ്ടാവുകയോ, വഴുവഴുപ്പ് തോന്നുകയോ ചെയ്താൽ അത് ഉടൻ തന്നെ ഉപേക്ഷിക്കണം.
