എല്ലാവർക്കും അറിയാവുന്നതുപോലെ സമീകൃതാഹാരമാണ് പാൽ. പോഷക സമൃദ്ധമായ പാൽ കുടിക്കുന്നവരാണ് ഭൂരിഭാഗം ആളുകളും. ശരീരത്തിന് ഏറ്റവുമധികം ഊർജ്ജമേകുന്ന പാനീയവുമാണ് പാൽ. 100 മില്ലി ലീറ്റർ പശുവിൻ പാലിൽ 87.8 ഗ്രാം വെള്ളമാണ്. 4.8 ഗ്രാം അന്നജം, 3.9 ഗ്രാം കൊഴുപ്പ്, 3.2 ഗ്രാം പ്രൊട്ടീൻ. ഇതുകൂടാതെ 120 മില്ലിഗ്രാം കാൽസ്യം, 14 മില്ലിഗ്രാം കൊളസ്‌ട്രോൾ തുടങ്ങിയ വസ്തുക്കളും അടങ്ങിയിട്ടുണ്ട്. അതായത് 100 മില്ലി ലിറ്റർ പശുവിൻ പാലിൽ 66 കലോറിയാണുള്ളത്.
എന്നാൽ എല്ലാ ഗുണമേന്മയോടും കൂടി തന്നെയാണോ നമുക്ക് പാൽ ലഭിക്കുന്നതെന്ന് ചിന്തിക്കേണ്ടിയിരിക്കുന്നു. പാലിൽ മായം ചേർക്കുന്നത് സ്ഥിരം സംഭവമായി മാറിയിരിക്കുകയാണ്. കുട്ടികളും പ്രായമായവരും കുടിക്കുന്ന പാലിന്റെ ശുദ്ധി പരിശോധിക്കേണ്ടതാണ്. നല്ല പാലും മായം ചേർത്ത പാലും തമ്മിൽ തിരിച്ചറിയാൻ വഴിയുണ്ട്്. ഒരു ഉപകരണങ്ങളുടെയും സഹായമില്ലാതെ ഗുണമേന്മ തിരച്ചറിയാനുള്ള പൊടിക്കൈകൾ ഇതാ
പ്രകൃതിദത്ത പാലിൽ സോപ്പിന്റെ അംശം പോലുള്ള രാസവസ്തുക്കൾ അടങ്ങിയതിനെയാണ് സിന്തറ്റിക്ക് പാൽ എന്ന് അറിയപ്പെടുന്നത്. ഇത് ആരോഗ്യത്തിനു ദോഷം ചെയ്യും. ദുർഗന്ധവും രുചിയും കൊണ്ട് സിന്തറ്റിക് പാൽ തിരിച്ചറിയാനാകും. സോപ്പിന്റെ മണം അനുഭവപ്പെടുകയും വിരലുകൾ കൊണ്ട് തടവുമ്പോൾ സോപ്പിന്റേത് പോലെ വഴുവഴുപ്പ് അനുഭവപ്പെടുകയാണെങ്കിൽ പാലിൽ രാസവസ്തുക്കൾ അടങ്ങിയിട്ടുണ്ട്. ചൂടാക്കുമ്പോൾ പാലിന് മഞ്ഞനിറമാകുന്നുണ്ടെങ്കിൽ അതും രാസവസ്തുക്കൾ അടങ്ങിയതിന്റെ ലക്ഷണമാണ്. ശുദ്ധമായ പാലിന് സ്വാഭാവികമായും മധുരമാണ്.എന്നാൽ കയ്‌പ്പുള്ളതോ പുളിരസമുള്ളതോ ആയ പാൽ ആണെങ്കിൽ മായം ചേർന്നതിന്റെ സൂചനയാണ്. ഇത്തരം പാൽ തിളപ്പിക്കുകയോ കുടിക്കുകയോ ചെയ്യരുത്.
പാലിൽ വെള്ളം ചേർത്തിട്ടുണ്ടോ എന്ന് അറിയാനും എളുപ്പവഴിയുണ്ട്. കൈകളിലോ കാലുകളിലോ അല്ലെങ്കിൽ ചരിഞ്ഞ ഏതെങ്കിലും പ്രതലത്തിലോ ഒരു തുള്ളി പാൽ ഒഴിക്കുക. ആ പാൽ അതിവേഗം ഒഴുകി പോകുകയാണെങ്കിൽ അതിൽ വെള്ളത്തിന്റെ അംശമുണ്ട് എന്ന് മനസിലാക്കാം. പാലിന്റെ കൊഴുപ്പ് വർദ്ധിപ്പിക്കുന്നതിനായി അന്നജം ചേർക്കുന്നതും പതിവായിട്ടുണ്ട്. ഇതിനെ മറികടക്കാനും വഴിയുണ്ട്. 5 മില്ലി പാലിൽ 2 ടേബിൾസ്പൂൺ ഉപ്പ് ചേർക്കുക. മിശ്രിതം നീലയായി മാറിയാൽ പാലിൽ മായം കലർന്നതാണ്.
