ന്യൂദല്‍ഹി:ചെങ്കോട്ട കാര്‍ ബോംബ് സ്‌ഫോടനവുമായി ബന്ധമുളള ഒരു ഡോക്ടറെക്കൂടി എന്‍ഐഎ അറസ്റ്റ് ചെയ്തു.ഡോ. ബിലാല്‍ നസീര്‍ മല്ലയാണ് അറസ്റ്റിലായത്. ചാവേര്‍ സ്‌ഫോടനം നടത്തിയ ഡോ. ഉമര്‍ ഉന്‍ നബിക്ക് ഒളിത്താവളം ഒരുക്കിയതും തെളിവു നശിപ്പിച്ചതുമാണ് ഇയാള്‍ക്കെതിരെയുള്ള കുറ്റം.
വടക്കന്‍ കാശ്മീരിലെ ബാരാമുള്ള സ്വദേശിയാണ് അറസ്റ്റിലായ ഡാ. ബിലാല്‍.കേസില്‍ അറസ്റ്റിലാകുന്ന എട്ടാമനാണ് ഇയാള്‍.ഡോ. ബിലാലിനെ കോടതിയില്‍ ഹാജരാക്കി ഏഴു ദിവസത്തേക്ക് എന്‍ഐഎ കസ്റ്റഡിയില്‍ വാങ്ങി.
ഭീകരാക്രമണത്തിനുള്ള ഗൂഢാലോചനയില്‍ ഡോ.ബിലാല്‍ പങ്കാളിയായിരുന്നുവെന്ന് എന്‍ഐഎ അറിയിച്ചു. നവംബര്‍ പത്തിനു രാജ്യത്തെ നടുക്കിയ സ്‌ഫോടനത്തില്‍ 15 പേരാണ് കൊല്ലപ്പെട്ടത്. നിരവധി പേര്‍ക്കു പരിക്കേറ്റു.
