ഹിന്ദു സമൂഹത്തില്‍ വലിയൊരു മാറ്റത്തിന് വഴിയൊരുക്കിയ ക്ഷേത്രപ്രവേശന വിളംബരത്തിന്റെ വാര്‍ഷിക ദിനത്തില്‍ എറണാകുളം ഭാസ്‌കരീയം കണ്‍വെന്‍ഷന്‍ സെന്ററില്‍ നടന്ന ടെമ്പിള്‍ പാര്‍ലമെന്റ് ഹിന്ദുവിരുദ്ധരായ രാഷ്‌ട്രീയ പാര്‍ട്ടികളുടെയും ഭരണാധികാരികളുടെയും പിടിയില്‍ നിന്ന് ക്ഷേത്രങ്ങളെ മോചിപ്പിക്കേണ്ടതിന്റെ അടിയന്തരാവശ്യത്തിന് അടിവരയിടുന്നതായി. ഹിന്ദു ഐക്യവേദിയുടെ ആഭിമുഖ്യത്തില്‍ സംഘടിപ്പിച്ച ഈ പരിപാടിയില്‍ സംസ്ഥാനത്തിന്റെ വിവിധ ഭാഗങ്ങളില്‍ നിന്നുള്ള ആയിരത്തിലേറെ ക്ഷേത്രഭരണ സമിതി പ്രവര്‍ത്തകര്‍ പങ്കെടുത്തു എന്നതുതന്നെ വലിയൊരു വിജയമാണ്. നിയമ വിരുദ്ധമായും ധാര്‍മിക വിരുദ്ധമായും ആയിരക്കണക്കിന് ക്ഷേത്രങ്ങള്‍ കൈയടക്കിവച്ചുകൊണ്ടിരിക്കുന്ന സര്‍ക്കാര്‍ സംവിധാനമായ ദേവസ്വം ബോര്‍ഡുകള്‍ക്ക് ബദലായി ജനകീയവും ആത്മീയവുമായ പുതിയൊരു മുന്നേറ്റത്തിന്റെ ദൃശ്യമാണ് ടെമ്പിള്‍ പാര്‍ലമെന്റ് കാഴ്ച വച്ചത്.
ക്ഷേത്രങ്ങളുടെ ഭരണത്തില്‍ നിന്ന് സര്‍ക്കാര്‍ പിന്മാറണമെന്ന ആവശ്യം ടെമ്പിള്‍ പാര്‍ലമെന്റ് മുന്നോട്ടുവച്ചു. ബ്രിട്ടീഷ് ഭരണത്തിന്റെ അവശിഷ്ടമാണ് ഒരര്‍ത്ഥത്തില്‍ ദേവസ്വം ബോര്‍ഡുകള്‍. തിരുവിതാംകൂര്‍ ദിവാനായിരുന്ന കേണല്‍ മണ്‍റോയുടെ കാലത്ത് ക്ഷേത്ര സ്വത്തുക്കള്‍ ഏകപക്ഷീയമായി പിടിച്ചെടുക്കുകയായിരുന്നു. സ്വാതന്ത്ര്യം ലഭിച്ചതിനു ശേഷവും ഇതിന് മാറ്റം വന്നില്ല എന്നുള്ളത് ഒരു തിന്മയാണ്. മറ്റു മതസ്ഥരുടെ ആരാധനാലയങ്ങള്‍ ഭരിക്കാനുള്ള അവകാശം അവര്‍ക്കുള്ളപ്പോള്‍ ഹിന്ദുക്കള്‍ക്കു മാത്രം ഇതിന് അധികാരമില്ലെന്ന് പറയുന്നത് നിയമവിരുദ്ധവും മതേതര വിരുദ്ധവുമാണ്. ഹിന്ദുക്കളുടെ താല്പര്യങ്ങള്‍ക്ക് വിരുദ്ധമായി ക്ഷേത്ര ഭരണം കൈയടക്കി വയ്‌ക്കുകയും, സാമ്പത്തിക ചൂഷണം നടത്തുകയും ചെയ്യുന്നത് ഒരു കാരണവശാലും അംഗീകരിക്കാന്‍ കഴിയില്ല. നിരീശ്വരവാദികള്‍ ക്ഷേത്രങ്ങള്‍ കൈയടക്കി വിശ്വാസവിരുദ്ധവും ആത്മീയ വിരുദ്ധവുമായ കാര്യങ്ങള്‍ ചെയ്യുന്നത് അവസാനിപ്പിച്ചേ തീരൂ.
ഭക്തജനങ്ങള്‍ കാണിക്കയായും വഴിപാടുകളായും സമര്‍പ്പിക്കുന്ന പണം ഹിന്ദുക്കള്‍ക്ക് മാത്രം അവകാശപ്പെട്ടതാണ്. ദേവസ്വം ബോര്‍ഡുകള്‍ വഴി സര്‍ക്കാര്‍ അത് മുതല്‍ക്കൂട്ടുന്നത് അനുവദിക്കാനാവില്ല. ഇതര മതസ്ഥരുടെ ആരാധനാലയങ്ങളിലെ വരുമാനം സ്വസമുദായത്തിന്റെ ക്ഷേമത്തിന് വിനിയോഗിക്കുമ്പോള്‍ ഹിന്ദുക്കളെ അതിന് അനുവദിക്കാത്തത് വലിയ അവകാശ നിഷേധമാണ്. ക്ഷേത്ര വരുമാനം ക്ഷേത്രവിരുദ്ധവും ഹിന്ദുവിരുദ്ധവുമായ ആവശ്യങ്ങള്‍ക്ക് വിനിയോഗിക്കുന്നതിന്റെ നിരവധി ഉദാഹരണങ്ങള്‍ ചൂണ്ടിക്കാട്ടാന്‍ കഴിയും. ഇതിനെതിരെ പല കാലങ്ങളില്‍ പ്രതിഷേധം ഉയര്‍ന്നിട്ടുണ്ടെങ്കിലും അത് വകവയ്‌ക്കാതെ ഹിന്ദുവിരുദ്ധ സര്‍ക്കാരുകള്‍ ഈ തിന്മകള്‍ തുടരുകയാണ്. ക്ഷേത്രസ്വത്തുക്കള്‍ ഏറ്റെടുത്തതിനെ തുടര്‍ന്ന് പ്രതിവര്‍ഷം സര്‍ക്കാര്‍ ഗ്രാന്റായും മറ്റും നല്‍കാന്‍ ബാധ്യസ്ഥമായ തുക നല്‍കുന്നില്ലെന്നു മാത്രമല്ല, കോടാനുകോടി രൂപയുടെ ക്ഷേത്ര സ്വത്തുക്കള്‍ അന്യാധീനപ്പെടാന്‍ കൂട്ടുനില്‍ക്കുകയും ചെയ്തു. മലബാര്‍ മേഖലയില്‍ ദേവസ്വം ബോര്‍ഡില്‍ നിന്ന് ഏറ്റെടുത്ത സ്വകാര്യ വനഭൂമിയിലെ വരുമാനവും ക്ഷേത്രങ്ങള്‍ക്ക് ലഭിക്കേണ്ടതുണ്ട്. ഇതൊക്കെ ബോധപൂര്‍വ്വം വിസ്മരിക്കുന്ന ഭരണാധികാരികള്‍ ഹിന്ദു സമൂഹത്തെ നിരന്തരം വഞ്ചിക്കുകയാണ്. ക്ഷേത്രഭൂമി സ്വകാര്യ വ്യക്തികളും സര്‍ക്കാര്‍ തന്നെയും കൈയേറിയിട്ടുള്ള നിരവധി സംഭവങ്ങളുണ്ട്. ഈ സാഹചര്യത്തില്‍ അന്യാധീനപ്പെട്ട ക്ഷേത്രസ്വത്തുക്കള്‍ വീണ്ടെടുക്കണമെന്ന ടെമ്പിള്‍ പാര്‍ലമെന്റിന്റെ ആവശ്യം നീതിനിഷ്ഠമാണ്. ക്ഷേത്രപ്രവേശന വിളംബരത്തിന്റെ തുടര്‍ച്ചയായി ക്ഷേത്രഭരണ പ്രവേശന വിളംബരവും ഉണ്ടാകേണ്ടിയിരിക്കുന്നു. പൊതുവായ ഈ ആവശ്യത്തിനു വേണ്ടി സമുദായ സംഘടനകള്‍ സങ്കുചിതമായ താല്‍പ്പര്യങ്ങള്‍ ഉപേക്ഷിക്കണം.
ഹിന്ദു സംഘടനകളുടെ പ്രതിനിധി സംഘം ശബരിമല സന്ദര്‍ശിച്ച് വസ്തുതകള്‍ വിലയിരുത്താനുള്ള ടെമ്പിള്‍ പാര്‍ലമെന്റിന്റെ തീരുമാനം സ്വാഗതാര്‍ഹമാണ്. ഇടതു വലത് മുന്നണികളുടെ ഭരണകാലത്ത് ദേവസ്വം ബോര്‍ഡുകളുടെ ഒത്താശയോടെ ശബരിമലയില്‍ നടന്നിട്ടുള്ള സ്വര്‍ണക്കൊള്ളയുടെയും മറ്റ് തിരിമറികളുടെയും ഞെട്ടിക്കുന്ന വിവരങ്ങളാണ് പുറത്തുവന്നുകൊണ്ടിരിക്കുന്നത്. ഹൈക്കോടതിയുടെ മേല്‍നോട്ടത്തില്‍ ഇതിനെക്കുറിച്ച് പ്രത്യേകസംഘം അന്വേഷിക്കുന്നുണ്ടെങ്കിലും കുറ്റക്കാരെ രക്ഷപ്പെടുത്താനുള്ള ശ്രമം ഭരണാധികാരികളുടെ ഭാഗത്തുനിന്ന് ഉണ്ടാവുമെന്ന് ഉറപ്പാണ്. സ്വര്‍ണ്ണക്കൊള്ള നടത്തിയവരെയും ഗൂഢാലോചനയില്‍ പങ്കെടുത്തവരെയും ഇതുവഴി മറ്റുതരത്തില്‍ നേട്ടമുണ്ടാക്കിയവരെയും നിയമത്തിന്റെ മുന്‍പില്‍ കൊണ്ടുവന്ന് ശിക്ഷിക്കണം. വേണ്ടിവന്നാല്‍ ഇക്കാര്യത്തില്‍ നിയമപരമായ പോരാട്ടത്തിനും ടെമ്പിള്‍ പാര്‍ലമെന്റ് തയാറാവണം
