തിരുവനന്തപുരം: കേരളത്തിലെ ഹിന്ദു സമൂഹത്തിന്റെ സാമൂഹിക, സാമ്പത്തിക പിന്നാക്കാവസ്ഥ പഠിക്കാന് കമ്മിഷനെ നിയമിക്കുക, മതസംവരണം ഭരണഘടനാവിരുദ്ധമായതിനാല് നിര്ത്തല് ചെയ്യുക, ശബരിമല സ്വര്ണക്കൊള്ള അന്വേ
ഷണം സിബിഐക്ക് വിടുക, പട്ടികജാതി സമൂഹത്തിന്റെ ആനുകൂല്യം തട്ടിയെടുക്കുന്ന ഇതര മതസ്ഥര്ക്കെതിരെ നടപടി സ്വീകരിക്കുക, അന്യസംസ്ഥാന തൊഴിലാളികളെന്ന വ്യാജേന നുഴഞ്ഞുകയറിയ ബംഗ്ലാദേശികളെ കണ്ടെത്തി നാടുകടത്തുക തുടങ്ങിയ ആവശ്യങ്ങള് ഉന്നയിച്ച് ഹിന്ദു ഐക്യവേദി സപ്തം. 9ന് സെക്രട്ടേറിയറ്റ് പഠിക്കല് ധര്ണ നടത്തും.
എസ്സി, എസ്ടി സംവരണ ആനുകൂല്യങ്ങള് സംഘടിത മതവിഭാഗങ്ങള് തട്ടിയെടുക്കുന്നതിന് ഇടതുവലത് രാഷ്ട്രീയ ശക്തികളുടെ പിന്തുണ ലഭിക്കുന്നുണ്ട്. എസ്സി എസ്ടി പദ്ധതി വിഹിതം വര്ഷംതോറും വലിയ തോതില് പാഴാക്കുകയാണ്. ഇതിനെതിരെ നിയമനിര്മാണം നടത്താന് സര്ക്കാര് തയ്യാറാകണം. 50 ലക്ഷത്തിലേറെ ജനസംഖ്യയുള്ള മറ്റു പിന്നാക്ക വിഭാഗങ്ങള്ക്ക് 3 ശതമാനം സംവരണം മാത്രം നല്കുമ്പോള് മുസ്ലിം ജനവിഭാഗത്തിന് 12 ശതമാനം സംവരണം ലഭിക്കുന്നത് സാമൂഹ്യ നീതിക്ക് എതിരാണ്. ദേവസ്വം റിക്രൂട്ട്മെന്റ് ബോര്ഡ് രൂപീകരിച്ച ശേഷമുള്ള മുഴുവന് നിയമനങ്ങളും അന്വേഷണത്തിന് വിധേയമാക്കണം. സംസ്കൃത ഭാഷാ പഠനം പ്രോത്സാഹിപ്പിക്കുന്നതിന് എല്ലാ സ്കൂളുകളിലും സംസ്കൃത അദ്ധ്യാപനവും അതിന് അദ്ധ്യാപക തസ്തികകളും ഉണ്ടാക്കണം.
രാവിലെ 11ന് ആരംഭിക്കുന്ന ധര്ണ പന്തിരുകുല ആചാര്യന് ശിവാനന്ദ ശര്മ്മ ഉദ്ഘാടനം ചെയ്യും.
ഹിന്ദുഐക്യവേദി സംസ്ഥാന മുഖ്യരക്ഷാധികാരി കെ.പി. ശശികല ടീച്ചര്, സംസ്ഥാന അദ്ധ്യക്ഷന് ആര്.വി. ബാബു തുടങ്ങി വിവിധ സമുദായ സംഘടനാ നേതാക്കള് പങ്കെടുക്കുമെന്ന് ഹിന്ദു ഐക്യവേദി സംസ്ഥാന ജനറല് സെക്രട്ടറി മഞ്ഞപ്പാറ സുരേഷ്, സംസ്ഥാന സെക്രട്ടറിമാരായ കെ. പ്രഭാകരന്, സന്ദീപ് തമ്പാനൂര്, സംസ്ഥാന സമിതി അംഗം ജഗതി രാജന് എന്നിവര് വാര്ത്താസമ്മേളനത്തില് പറഞ്ഞു.
