തിരുവനന്തപുരം : കേരള സര്‍വകലാശാലയിലെ പിഎച്ച്ഡി ഗവേഷണ വിദ്യാര്‍ഥി വിപിന്‍ വിജയനെതിരെ ഫാക്കല്‍റ്റി ഡീന്‍ ജാതി അധിക്ഷേപം നടത്തിയെന്ന പരാതിയില്‍ അടിയന്തര അന്വേഷണം നടത്താന്‍ നിര്‍ദേശം നല്‍കി ഉന്നത വിദ്യാഭ്യാസ മന്ത്രി ആര്‍ ബിന്ദു. കുറ്റക്കാര്‍ക്കെതിരെ നിയമപരമായ നടപടികള്‍ സ്വീകരിക്കണമെന്ന് വൈസ് ചാന്‍സലറോടും രജിസ്ട്രാറോടും മന്ത്രി ആവശ്യപ്പെട്ടു.
സംഭവം സര്‍വകലാശാലയ്‌ക്കും ഉന്നതവിദ്യാഭ്യാസ മേഖലയ്‌ക്കും അവമതിപ്പുണ്ടാക്കിയെന്ന് മന്ത്രി പറഞ്ഞു.അനാവശ്യ വിവാദങ്ങളിലേക്ക് സര്‍വകലാശാലയെയും ഉന്നതവിദ്യാഭ്യാസ മേഖലയെയും തള്ളിവിട്ട സംഭവമാണിത്. അടിയന്തരമായി അന്വേഷണം നടത്തി റിപ്പോര്‍ട്ട് നല്‍കാന്‍ ഉന്നതവിദ്യാഭ്യാസ പ്രിന്‍സിപ്പല്‍ സെക്രട്ടറിയോടാണ് മന്ത്രി ആവശ്യപ്പെട്ടത്.
മറ്റ് അധ്യാപകര്‍ക്ക് മുന്നില്‍ വച്ച് അധ്യാപിക ജാതി അധിക്ഷേപം നടത്തിയെന്നാണ് വിപിന്‍ വിജയന്റെ പരാതി. പട്ടികജാതിക്കാര്‍ക്ക് എത്ര ശ്രമിച്ചാലും സംസ്‌കൃതം വഴങ്ങില്ല തുടങ്ങിയ പരാമര്‍ശങ്ങളാണ് ഡോ. സി എന്‍ വിജയകുമാരിയില്‍ നിന്നുണ്ടായതായതെന്നാണ് വിദ്യാര്‍ഥി പൊലീസിന് നല്‍കിയ പരാതിയിലും പറയുന്നത്.
അക്കാദമിക് യോഗ്യതയില്ലാത്തതിനാല്‍ കാര്യവട്ടം ക്യാമ്പസിലെ ഗവേഷക വിദ്യാര്‍ഥിയായ വിപിന്‍ വിജയന് പി എച്ച് ഡി അനുവദിക്കരുതെന്ന് കാട്ടി ഡീനായ ഡോ. സി എന്‍ വിജയകുമാരി വൈസ് ചാന്‍സര്‍ക്ക് കത്ത് നല്‍കിയിരുന്നു. എസ് എഫ് ഐ പ്രവര്‍ത്തകന്‍ കൂടിയായ വിദ്യാര്‍ത്ഥിക്ക് യോഗ്യതയില്ലാതെ പി എച്ച് ഡി നല്‍കാന്‍ നീക്കമുണ്ടെന്ന് വാര്‍ത്തയുണ്ടായിരുന്നു.
