ന്യൂദല്ഹി: ദേശീയ ഗീതം വന്ദേ മാതരത്തിന്റെ 150-ാം വാര്ഷികാഘോഷത്തിന് ഇന്നു തുടക്കം. ഒരു വര്ഷ പരിപാടികള്ക്കു തുടക്കം കുറിച്ച് രാജ്യത്തെ 150 കേന്ദ്രങ്ങളില് വന്ദേ മാതര സംഘാലാപനമുണ്ട്. കാര്ഗില് യുദ്ധ സ്മാരകം മുതല് ആന്ഡമാന്-നിക്കോബാര് സെല്ലുലാര് ജയില് വരെ വന്ദേ മാതര ആലാപന വേദിയാകും.
ന്യൂദല്ഹി ഇന്ദിരാ ഗാന്ധി ഇന്ഡോര് സ്റ്റേഡിയത്തില് ഇന്ന് രാവിലെ 10ലെ ചടങ്ങില് പ്രധാനമന്ത്രി നരേന്ദ്ര മോദി ആഘോഷം ഉദ്ഘാടനം ചെയ്യും. ഭാരതാംബ ചിത്രത്തില് പുഷ്പാര്ച്ചന, വന്ദേ മാതര സംഘാലാപനത്തിനു പുറമേ സ്മരണിക സ്റ്റാമ്പ്, നാണയ പ്രകാശനം, ഡോക്യുമെന്ററി പ്രദര്ശനം, വന്ദേ മാതരത്തിന്റെ 150 വര്ഷത്തെ ചരിത്രം അടിസ്ഥാനമാക്കിയുള്ള പ്രദര്ശനം, വയലിന് മാന്ത്രികന് ഡോ. മഞ്ജുനാഥ് മൈസൂര് നയിക്കുന്ന സംഗീത പരിപാടി എന്നിവയുമുണ്ടാകും. ദേശീയതല ഉദ്ഘാടനത്തോടനുബന്ധിച്ച് കേന്ദ്ര-സംസ്ഥാന സര്ക്കാരുകള്ക്കു കീഴിലെ എല്ലാ ഓഫീസുകളിലും വന്ദേ മാതരം സംഘാലാപനമുണ്ട്. പ്രധാനമന്ത്രിയുടെ ഉദ്ഘാടന പ്രസംഗത്തിന്റെ തത്സമയ സംപ്രേഷണം കാണാനുള്ള ക്രമീകരണമൊരുക്കും.
ബ്രിട്ടീഷ് ഭരണത്തില് നിന്നു ഭാരതത്തെ മോചിപ്പിക്കാനുള്ള മന്ത്രമായി ഉയര്ന്നുവന്ന വന്ദേ മാതരം 1875 നവംബര് ഏഴിന് അക്ഷയ നവമി ദിനത്തിലാണ് ബങ്കിംചന്ദ്ര ചാറ്റര്ജി രചിച്ചത്. 2026 നവം. ഏഴു വരെ ഒരു വര്ഷം നീളുന്ന പരിപാടികള് കേന്ദ്ര-സംസ്ഥാന സര്ക്കാരുകള് സംയുക്തമായി സംഘടിപ്പിക്കുന്നു. പരിപാടികളുടെ പ്രചാരണത്തിനു കേന്ദ്ര സാംസ്കാരിക മന്ത്രാലയം വേേു:െ//്മിറലാമമേൃമാ150.ശി/ എന്ന വെബ്സൈറ്റ് ആരംഭിച്ചു. സംഘ ഗാനാലാപനത്തിനായി മുഴുവന് ഗാനത്തിന്റെയും വരികളോടു കൂടിയ ഓഡിയോ, വന്ദേമാതരത്തോടു കൂടിയ കരോക്കെ എന്നിവയും സൈറ്റില് ഉള്പ്പെടുത്തിയിട്ടുണ്ട്.
ബിജെപി നേതൃത്വത്തില് ഇന്നു മുതല് 26 വരെ വന്ദേ മാതരം 150-ാം വാര്ഷികാഘോഷം സംഘടിപ്പിക്കുമെന്നു ദേശീയ ജനറല് സെക്രട്ടറി തരുണ് ചുഗ് അറിയിച്ചു. വന്ദേ മാതര സംഘാലാപനങ്ങള്, ഘോഷ യാത്രകള്, സാംസ്കാരിക പരിപാടികള് എന്നിവയുണ്ടാകും. സ്കൂളുകള്, കോളജുകള്, സ്വാതന്ത്ര്യസമരവുമായി ബന്ധപ്പെട്ട പ്രധാന സ്ഥലങ്ങള് എന്നിവ കേന്ദ്രീകരിച്ചും പരിപാടികളുണ്ട്. സ്വാതന്ത്ര്യസമരവുമായി ബന്ധപ്പെട്ട വിവിധ രചനാ മത്സരങ്ങള് എന്നിവ സംഘടിപ്പിക്കും. എന്നും പ്രചോദനമായ വന്ദേ മാതരത്തിന്റെ 150-ാം വാര്ഷികാഘോഷം അവിസ്മരണീയമാക്കണമെന്ന് മന് കി ബാത്ത് 127-ാം പതിപ്പില് പ്രധാനമന്ത്രി ആഹ്വാനം ചെയ്തിരുന്നു.
