കറാച്ചി: സ്ത്രീകളെ ജിഹാദിലേക്ക് ആകര്ഷിക്കാനും വനിതാ ചാവേറുകളെ സൃഷ്ടിക്കാനും ഉദ്ദേശിച്ച് പുതിയ പാഠ്യപദ്ധതിയുമായി പാക് ഭീകരസംഘടന ജെയ്ഷെ മുഹമ്മദ്. ജെയ്ഷെയുടെ വനിതാ സംഘടനയായ ജമായത്ത് ഉള് മോമിനാത്ത് ആണ് സ്ത്രീകള്ക്കായി ജിഹാദില് ഓണ്ലൈന് കോഴ്സ് തുടങ്ങുന്നത്. കൂടുതല് സ്ത്രീ ചാവേറുകളെ സൃഷ്ടിക്കുന്നതിനൊപ്പം വലിയ തോതില് ഫണ്ട് ശേഖരണവും മറ്റൊരു ലക്ഷ്യമാണ്.
ജെയ്ഷെ മുഹമ്മദ് മേധാവി മസൂദ് അസറിന്റെ സഹോദരി സാദിയ അസറിന്റെ നേതൃത്വത്തിലാണ്, തുഫാത് അല് മൂമിനാത്ത് കോഴ്സ് നടത്തുന്നത്. സാദിയയുടെ ഭര്ത്താവും കൊടും ഭീകരനുമായ യൂസഫ് അസര്, ഭാരത സൈന്യം ഓപ്പറേഷന് സിന്ദൂറിന്റെ ഭാഗമായി ബഹവല്പൂരിലെ ജെയ്ഷ് ആസ്ഥാനത്തു നടത്തിയ വ്യോമാക്രമണത്തില് കൊല്ലപ്പെട്ടിരുന്നു. സാദിയയും മറ്റൊരു സഹോദരി, സമൈരയും ചേര്ന്ന് ദിവസം 40 മിനിറ്റാണ് ജിഹാദ് പഠിപ്പിക്കുക. നവംബര് എട്ടിന് ഓണ്ലൈന് ക്ലാസുകള് തുടങ്ങുമത്രേ.
പ്രധാന ലക്ഷ്യം സ്ത്രീകള്ക്ക് കൂടുതല് മതാഭിമുഖ്യമുണ്ടാക്കുക, അങ്ങനെ അവരെ ഭീകരപ്രവര്ത്തനങ്ങളിലേക്ക് നയിക്കുക, ചാവേറാക്കുക എന്നിവ തന്നെ. ഐഎസ്, ബോക്കോ ഹറാം, ഹമാസ് എന്നിവയെ പോലെ വലിയ തോതില് വനിതാ ചാവേറുകളെ സൃഷ്ടിക്കുകയാണ് പരമപ്രധാന ലക്ഷ്യം.
ലഷ്ക്കര് ഇ തൊയ്ബയും ജെയ്ഷും ഇതുവരെ കാര്യമായ രീതിയില് ഇത്തരം പ്രവര്ത്തനങ്ങള്ക്ക് വനിതകളെ നിയോഗിച്ചിട്ടില്ല. ഇതു മാറ്റിയെടുക്കാനാണ് ഭീകരസംഘടനകളുടെ പദ്ധതിയെന്ന് ഇന്റലിജന്സ് കരുതുന്നു.
