ഇസ്ലാമബാദ്: താലിബാന്‍ ആക്രമണത്തിനെതിരെ തിരിച്ചടിക്കാന്‍ സൗദിയെ സഹായത്തിന് വിളിച്ച പാകിസ്ഥാന് നിരാശ. സൈനിക സഹായത്തിന് തയ്യാറല്ലെന്ന് സൗദി തുറന്നു പറഞ്ഞെന്നാണ് പുറത്തുവരുന്ന റിപ്പോര്‍ട്ട്.
സൗദിയുമായി പാകിസ്ഥാന് പ്രതിരോധകരാര്‍ ഉണ്ടാക്കിയിട്ടുണ്ടെന്ന പാക് പ്രധാനമന്ത്രി ഷെഹ്ബാസ് ഷെരീഫിന്‍റേത് വെറും വാചകക്കസര്‍ത്താണെന്ന് വെളിപ്പെട്ടിരിക്കുകയാണ്. പാകിസ്ഥാനെ ആരെങ്കിലും ആക്രമിച്ചാല്‍ അത് തങ്ങള്‍ക്ക് നേരെയുള്ള ആക്രമണമായി കണക്കാക്കി സൗദി ഇടപെടും എന്നായിരുന്നു ഷെഹ്ബാസ് ഷെരീഫ് അവകാശപ്പെട്ടിരുന്നത്.
നേറ്റോ കരാറിന് തുല്ല്യമായ കരാറാണ് പാകിസ്ഥാനും സൗദിയും തമ്മില്‍ ഉണ്ടാക്കിയിരിക്കുന്നത് എന്നായിരുന്നു ഷെഹ്ബാസ് ഷെരീഫിന്റെ അവകാശവാദം. നേറ്റോ പ്രതിരോധ കരാര്‍ പ്രകാരം നേറ്റോയില്‍ അംഗമായ ഒരു രാജ്യത്തെ പുറത്തുനിന്നും മൂന്നാമത് ഒരു രാജ്യം ആക്രമിച്ചാല്‍ മറ്റ് 39 നേറ്റോ രാജ്യങ്ങളും ആ രാജ്യത്തെ ആക്രമിക്കും. അതുപോലെ പാകിസ്ഥാനെ ആക്രമിച്ചാല്‍ സൗദിയും സൗദിയെ ആക്രമിച്ചാല്‍ പാകിസ്ഥാനും പരസ്പരം ഇടപെടുമെന്നായിരുന്നു ഷെഹ്ബാസ് ഷെരീഫ് അവകാശപ്പെട്ടത്. എന്നാല്‍ അങ്ങിനെ ഒരു കരാര്‍ സൗദി ഒപ്പുവെച്ചത് സൗദിക്ക് പാകിസ്ഥാന്റെ സഹായം ലഭിക്കാന്‍ മാത്രമാണെന്നാണ് പുറത്തുവരുന്ന റിപ്പോര്‍ട്ടുകള്‍. അല്ലാതെ പാകിസ്ഥാനെ ആരെങ്കിലും ആക്രമിച്ചാല്‍ സൗദി ഇടപെടില്ല എന്നതാണ് ഇപ്പോള്‍ തെളിഞ്ഞത്. താലിബാന്റെ ആക്രമത്തില്‍ പിടിച്ചുനില്‍ക്കാനാവാതെയാണ് പാകിസ്ഥാന് സൗദിയുടെ സൈനികസഹായം തേടിയത്. എന്നാല്‍ താലിബാനെതിരെ ഇടപെടാന്‍ തങ്ങളില്ലെന്ന് സൗദി അറിയിക്കുകയായിരുന്നു.
എന്നാല്‍ താലിബാന്റെ തിരിച്ചടി ഭയന്ന് സൗദിയെ സഹായത്തിന് വിളിച്ച ഷെഹ്ബാസ് ഷെരീഫിന് നിരാശയായിരുന്നു ഫലം. അഫ്ഗാനിസ്ഥാനെതിരെ ഇടപെടാന്‍ തങ്ങള്‍ ഇല്ലെന്ന് സൗദി അറിയിച്ചുവെന്നാണ് പുറത്തുവരുന്ന റിപ്പോര്‍ട്ടുകള്‍.
