അമ്മയൂട്ടിയൊരമ്മിഞ്ഞപ്പാലിന്റെ
നന്മധുര വത്സാമൃതമാദ്യമായ്
ചുണ്ടിലൂടത് നാവേറിയുള്ളിലെ,-
ന്നുണ്മയെത്തുടുപ്പിച്ചെന്നു നിശ്ചയം
അന്നുതൊട്ടാവു,മക്ഷരമില്ലാതെ
ശബ്ദമായ് ഞാന്‍ പ്രകാശിച്ചുപോന്നതും
എന്റെയുള്ളറി,ഞ്ഞാവശ്യമൊക്കെയു-
മമ്മ കേട്ടറിഞ്ഞര്‍ത്ഥം ഗണിച്ചതും
മെല്ലെമെല്ലെ,യെന്നാംഗ്യങ്ങള്‍ ഭാഷയായ്-
ക്കണ്ടു വായിച്ച് വ്യാഖ്യാനമാക്കിയും
അമ്മയില്‍നിന്ന് നാക്കിനെ വാക്കിലൂ,-
ടച്ഛനിലേക്ക് പയ്യെ നയിച്ചതും
അന്നമൂട്ടിയെന്‍ ജീവകോശങ്ങളെ
ആര്‍ത്ത് പേര്‍ത്തും വളര്‍ത്തുവാനായെനി,-
ക്കച്ഛനാകണം ചോറൂട്ടി, സ്വാദിന്റെ
മെച്ചമാദ്യമായ് നാവിന്മേല്‍ തേച്ചതും
മുത്തശിക്കൊഞ്ചല്‍ കേട്ടാണറിഞ്ഞു ഞാന്‍,
നാവിലെന്റെ വയമ്പുചാലിച്ചന്നു-
തേന്‍ തൊടുവിച്ചതാദ്യമക്കൈകളാ,-
ണെന്ന വാര്‍ത്ത,യന്നേറെക്കഴിഞ്ഞ നാള്‍
അന്നമല്ലതിന്നപ്പുറം, ജീവിതം-
ധന്യമാക്കുവാനെന്നന്നറിഞ്ഞു ഞാന്‍
‘അ’യെഴുതിയരിയി,ലതിന്‍ മുമ്പ്
ഞാന്‍, ‘ഹരിഃശ്രീ ഗണപതയേ നമഃ,’
‘ശ്രീഗുരുഭ്യോ നമഃ’യാം ഷഡാക്ഷരി
‘വിഘ്‌നമില്ലാതെയാകുവാന്‍’ പ്രാര്‍ത്ഥന
വിദ്യ നാവില്‍, വിരല്‍ത്തുമ്പിലാക്കിയ-
തേത് സദ്ഗുരു? ആരും ഗുരുക്കളാം
വാക്കിലര്‍ത്ഥം, അതിന്‍മൂലമക്ഷരം,
അക്ഷരത്തിന്‍ സ്വരൂപമാകും ലിപി
അര്‍ത്ഥമേറിയൊളിഞ്ഞര്‍ത്ഥ,മപ്പുറം,
ഉക്തിഭേദങ്ങള്‍ കാണാത്തതാം ധ്വനി
വൃത്തമേറെ,യലങ്കാര വൈവിധ്യ,-
മക്ഷരം ചേര്‍ക്കെ വ്യാകരണാദികള്‍
രൂപമെത്രയറിയില്ല ഭാഷതന്‍
വേലയാര്‍ക്കുമളന്നീടുവാന്‍ പണി
വിദ്യയെന്നുവിളിച്ചതിന്നാരംഭ-
മങ്ങനെ തുടങ്ങീടവേ കാണ്‍കയായ്
വിശ്വമെത്ര വലുതതിന്നപ്പുറം-
വിദ്യയുണ്ട,ത് വിജ്ഞാനമെന്ന് പേര്
വിദ്യ വാക്കല്ല, ഭാഷയ,ല്ലെന്തൊക്കെ-
ബുദ്ധി, ചിന്തയെദ്യോതിപ്പിച്ചിടുന്നോ
ഒക്കെയുമറിവാകുമുറവിന്റെ-
വിസ്തൃതമഹാ സാഗരത്തുള്ളികള്‍
ജ്ഞാനമാര്‍ജ്ജിക്ക, വിജ്ഞാനമാളുക
ജ്ഞാനവിജ്ഞാനബോധത്തിലേറുക
‘ഞാനെ,’തെന്നു തിരിച്ചറിഞ്ഞീടുക
‘ഞാന,’തില്ലെന്ന ജ്ഞാനത്തിലാഴുക
വിദ്യയാരംഭമാകുന്നു നിത്യവും
പുത്തനേരോന്നറിയും നിമേഷവും
സത്യമെന്തെന്നു കണ്ടെത്തിടും വരെ
വിദ്യയാരംഭിച്ചീടുകനന്തമായ്.
ജന്മഭൂമി ഓണ്‍ലൈന്‍