ന്യൂദല്ഹി: സാങ്കേതിക വിദ്യാഭ്യാസവും ഗവേഷണവും പ്രോത്സാഹിപ്പിക്കുന്ന, മെറിറ്റ് (എംഇആര്ഐടിഇ) പദ്ധതി നടപ്പാക്കാന് കേന്ദ്രമന്ത്രിസഭ അംഗീകാരം നല്കി. 175 എന്ജിനീയറിങ് കോളജുകളും 100 പോളിടെക്നിക്കുകളും ഉള്പ്പെടുന്ന 275 സാങ്കേതിക വിദ്യാഭ്യാസ സ്ഥാപനങ്ങളില് ഇതു നടപ്പാക്കും.
ദേശീയ വിദ്യാഭ്യാസ നയം 2020ന് അനുസൃതമായുള്ള പദ്ധതിക്ക് 2025-2030 വരെ 4200 കോടിയാണ് ചെലവിടുക. ഇതില് 2100 കോടി ലോക ബാങ്കില്നിന്നു വായ്പയെടുക്കും. സംസ്ഥാനങ്ങളിലെയും കേന്ദ്ര ഭരണ പ്രദേശങ്ങളിലെയും ഡിജിറ്റല് സംവിധാനം മെച്ചപ്പെടുത്തുക, സാങ്കേതിക വിഷയങ്ങളില് ബഹുമുഖ വിദ്യാഭ്യാസ പരിപാടികള്ക്കുള്ള മാര്ഗ നിര്ദേശങ്ങള് വികസിപ്പിക്കുക, വിദ്യാര്ത്ഥികളുടെ പഠനവും തൊഴില് നൈപുണ്യവും മെച്ചപ്പെടുത്തുക, ഗവേഷണത്തിനും നൂതനാശയങ്ങള് കണ്ടെത്താനും അനുകൂലാന്തരീക്ഷം സൃഷ്ടിക്കുക, തൊഴില് വിപണിയുമായി പൊരുത്തപ്പെടുന്ന പാഠ്യപദ്ധതികളും സംയോജിത കോഴ്സുകളും വികസിപ്പിച്ചു നടപ്പാക്കുക, വനിതാദ്ധ്യാപകരെ വളര്ത്തിയെടുക്കുക തുടങ്ങിയവയാണ് ലക്ഷ്യം.
