കോഴിക്കോട്: തേങ്ങ മോഷ്ടിക്കാന് എത്തിയ യുവാക്കളെ നാട്ടുകാര് പിടികൂടി പൊലീസില് ഏല്പ്പിച്ചു. താമരശേരിയില് ആണ് സംഭവം.കോരങ്ങാട് തെങ്ങിന് തോപ്പില് കൂട്ടിയിട്ട 25 ഓളം തേങ്ങകള് മോഷ്ടിക്കാന് ശ്രമിച്ച ചുങ്കം അമ്പായത്തോട് സ്വദേശികളാണ് പിടിയിലായത്.
മോഷണം നടത്തവെ പിടിക്കപ്പെട്ടതിനെ തുടര്ന്ന് രക്ഷപ്പെടാന് ശ്രമിക്കവെ ഇവര് സഞ്ചരിച്ച സ്കൂട്ടര് തകരാറിലായി. ഇതോടെ നാട്ടുകാര് തടഞ്ഞുവെച്ച് പൊലീസില് വിവരമറിയിച്ചു. രേഖാമൂലം പരാതി ലഭിക്കാത്തതിനാല് പൊലീസ് ഇവരെ താക്കീത് നല്കി വിട്ടയച്ചു.
കോരങ്ങാട് സ്വദേശി കൊടോളി സലാമിന്റെ തെങ്ങിന് തോപ്പിലായിരുന്നു വെളളിയാഴ്ച രാവിലെ 7.30 ഓടെ മോഷണ ശ്രമം നടന്നത്. തെങ്ങില് കയറാനായി തളപ്പ്, കൊടുവാള് എന്നിവ സഹിതമാണ് മോഷ്ടാക്കള് എത്തിയിരുന്നത്. എന്നാല് കൂട്ടിയിട്ട തേങ്ങ ശ്രദ്ധയില് പെട്ടതോടെ ഇവിടെയുണ്ടായിരുന്ന രണ്ട് ചാക്കുകളിലായി അവ നിറയ്ക്കുകയായിരുന്നു. ഈ സമയം അവിടെയെത്തിയ തെങ്ങിന് തോപ്പ് ഉടമ സലാം മോഷണ ശ്രമം കാണുകയും ബഹളം വെച്ച് ആളെ കൂട്ടുകയും ചെയ്തു. സ്കൂട്ടറില് രക്ഷപ്പെടാന് ശ്രമിച്ച മോഷ്ടാക്കളെ സലാമും നാട്ടുകാരും പിന്തുടരുന്നതിനിടെ ഇവരുടെ വാഹനം തകരാറിലായി. ഇതോടെ നാട്ടുകാര് മോഷ്ടാക്കളെ യുവാക്കളെ പിടികൂടി.
