ഹിന്ദുമതവിശ്വാസികൾക്കിടയിൽ ധീരതയുടെയും നിസ്വാർത്ഥ ഭക്തിയുടെയും പ്രതീകമാണ് ഹനുമാൻ സ്വാമി . മഹാവീരനെന്നും , ആഞ്ജനേയനെന്നും , ഭജ്രംഗ്ബലിയെന്നും അറിയപ്പെടുന്ന ഹനുമാൻ സ്വാമിക്ക് ഇന്ത്യയിൽ ധാരാളം ക്ഷേത്രങ്ങളും അത്ര തന്നെ വിഗ്രഹങ്ങൾ അഥവാ പ്രതിമകളും ഉണ്ട് . ഇവയിൽ പലതും മലമുകളിലുള്ള പാറക്കെട്ടുകളിൽ, തന്നെ ആരാധിക്കുകയും വിശ്വസിക്കുകയും പൂജിക്കുകയും ചെയ്യുന്ന ഭക്തരെ സംരക്ഷിക്കുന്ന രീതിയിൽ സ്ഥാപിച്ചിട്ടുള്ളതും , പ്രൗഢിയിലും , ഉയരത്തിലും വളരെയധികം പ്രസിദ്ധിയാർജ്ജിച്ചിട്ടുള്ളതുമാണ് .
വീര അഭയ ആഞ്ജനേയ ഹനുമാൻ സ്വാമി
ആന്ധ്ര പ്രദേശിലുള്ള വിജയവാഡയിലാണ് പരിതല ആഞ്ജനേയ സ്വാമി ക്ഷേത്രം സ്ഥിതി ചെയ്യുന്നത്. ലിംക ബുക്ക്സ് ഓഫ് റെക്കോർഡ്സിൽ ഇടംപിടിച്ചിട്ടുള്ള , 135 അടി ഉയരമുള്ള ഹനുമാൻ സ്വാമിയുടെ പ്രതിഷ്ഠ ഈ ക്ഷേത്രത്തിൽ സ്ഥാപിച്ചത് 2003 ലാണ് .
ദമൻജോഡിയിലുള്ള ഹനുമാൻ പ്രതിഷ്ഠ
ഒഡിഷയിലെ കോരാട്പുട് ജില്ലയിലുള്ള ദമൻജോഡി നൽകോ ടൗൺഷിപ്പിലാണ് 108 അടി ഉയരമുള്ള ഹനുമാൻ പ്രതിഷ്ഠ സ്ഥിതി ചെയ്യുന്നത് .
ഷിംലയിലെ ഹനുമാൻ പ്രതിഷ്ഠ
ഹനുമാൻ സ്വാമിയേ ആരാധിക്കുന്ന പുരാതന ക്ഷേത്രങ്ങളിൽ ഒന്നായ ജഖൂ ക്ഷേത്രം സ്ഥിതി ചെയ്യുന്നത് ഷിംലയിലെ ഏറ്റവും ഉയരം കൂടിയ കൊടുമുടിയായ ജഖൂ മലനിരകളിലാണ് . 2010 ൽ ഇവിടെ പ്രതിഷ്ഠിച്ച ഹനുമാൻ സ്വാമിയുടെ പ്രതിമക്ക് 108 അടി ഉയരമാണുള്ളത് .
ഷാജഹാൻപൂരിലെ ഹനുമാൻ പ്രതിഷ്ഠ
ഹനുമാൻ പ്രഭുവിനായി സമർപ്പിക്കപ്പെട്ട പ്രശസ്തമായ ഹിന്ദു തീർത്ഥാടന കേന്ദ്രങ്ങളിൽ ഒന്നാണ് ഹനുമത് ധാം. ഈ ക്ഷേത്രത്തിൽ കുങ്കുമ നിറത്തിൽ പ്രതിഷ്ഠിച്ചിരിക്കുന്ന ഹനുമാൻ സ്വാമിയുടെ പ്രതിഷ്ഠക്ക് 104 അടി ഉയരമാണുള്ളത് . ഉത്തർപ്രദേശിലെ വിശ്രത് ഘട്ട് ഷാജഹാൻപൂരിൽ സ്ഥിതി ചെയ്യുന്ന ഹനുമാൻ ക്ഷേത്രം പത്തു വർഷങ്ങൾക്ക് മുൻപാണ് സ്ഥാപിതമായത് .
നന്ദുരയിലെ ഹനുമാൻ പ്രതിഷ്ഠ
മഹാരാഷ്ട്രയിലെ ബുൽധന ജില്ലയിലുള്ള നന്ദുര എന്ന നഗരത്തിലെ ശ്രീ ബാലാജിയുടെ ക്ഷേത്രത്തിലാണ് ലിംക ബുക്ക് ഓഫ് റെക്കോർഡ്സിൽ ഇടം പിടിച്ചിട്ടുള്ള 105 അടി ഉയരമുള്ള ഹനുമാൻ സ്വാമിയുടെ പ്രതിഷ്ഠയുള്ളത് .
