ന്യൂദല്‍ഹി : ഇന്ത്യയ്ക്ക് അഞ്ചാം തലമുറ യുദ്ധവിമാനമായ എസ് യു 57 നല്‍കാമെന്ന് റഷ്യ. എസ് 400 എന്ന വ്യോമപ്രതിരോധസംവിധാനം നല്‍കിയ അതേ റഷ്യ തന്നെ ഇക്കുറി സോഴ്സ് കോഡ് ഉള്‍പ്പെടെയാണ് ഇന്ത്യയ്ക്ക് നല്‍കുന്നത്. സോഴ്സ് കോഡ് കിട്ടിയാല്‍ ഈ യുദ്ധജെറ്റില്‍ ഇന്ത്യയുടെ പ്രതിരോധ ഗവേഷണ സ്ഥാപനമായ ഡിആര്‍ഡിഒയ്‌ക്ക് ആവശ്യമായ മാറ്റങ്ങള്‍ വരുത്താം.
റഷ്യയില്‍ നിന്നും കിട്ടിയ ഈ യുദ്ധരാക്ഷസനെ ഇന്ത്യയുടെ ആവശ്യങ്ങള്‍ക്കനുസരിച്ച് സ്വഭാവമാറ്റങ്ങള്‍വരുത്താം. മാത്രമല്ല, പാകിസ്ഥാനില്‍ സംഹാരതാണ്ഡവമാടിയ ബ്രഹ്മോസ് മിസൈല്‍ ഈ യുദ്ധ ജെറ്റില്‍ പിടിപ്പിക്കാനാവും. ബ്രഹ്മോസ് മാത്രമല്ല, ഇന്ത്യ നിര്‍മ്മിക്കുന്ന മറ്റ് മിസൈലുകളും എസ് യു 57ല്‍ പിടിപ്പിക്കാനാവും. അതായത് ഇന്ത്യന്‍ മിസൈലുകളും പേറി ശത്രുപാളയത്തിലെ റഡാറുകള്‍ക്ക് പിടികൊടുക്കാതെ ആകാശത്തില്‍ പതുങ്ങിയിരുന്ന് മിസൈലുകള്‍ അയയ്‌ക്കുന്ന യുദ്ധജെറ്റായി എസ് യു 57 മാറും.
അമേരിക്കയുടെ എഫ്35, ചൈനയുടെ ജെ20 എന്നീ അഞ്ചാം തലമുറ യുദ്ധജെറ്റിന് സമാനമാണ് എസ് യു 57. പക്ഷെവിദേശരാജ്യങ്ങള്‍ ആധുനിക ആയുധങ്ങള്‍ നല്‍കിയാലും ആ ആയുധങ്ങളുടെ സോഴ്സ് കോഡുകള്‍ നല്‍കാന്‍ പലപ്പോഴും തയ്യാറാകാറില്ല. എന്തിന് റഫാല്‍ ജെറ്റിന്റെ സോഴ്സ് കോഡ് ഇന്ത്യയുമായി പങ്കുവെയ്‌ക്കാന്‍ ഇനിയും ഫ്രാന്‍സിലെ ഡസോള്‍ട്ട് കമ്പനി തയ്യാറായിട്ടില്ലെന്ന് ചില സൂചനകള്‍ പുറത്തുവരുന്നുണ്ട്. പക്ഷെ ഇതൊന്നും റഷ്യയ്‌ക്ക് ബാധകമല്ല. റഷ്യ ഇന്ത്യയ്ക്ക് സോഴ്സ് കോഡ് നല്‍കും. ആയുധക്കാര്യത്തില്‍ ഇന്ത്യയുടെ അകമഴിഞ്ഞ ചങ്ങാതിയാണെന്ന് ഒരിയ്‌ക്കല്‍ കൂടി റഷ്യയും പുടിനും തെളിയിക്കുന്നു എന്ന് മാത്രമല്ല, വിപണിയിലെ മതിപ്പ് വിലയേക്കാള്‍ വന്‍ ഡിസ്കൗണ്ടും വാഗ്ദാനം ചെയ്തിട്ടുണ്ട്.
യുദ്ധവിമാനം എന്നത് സങ്കീര്‍ണ്ണമായ സംവിധാനമാണ്. നിര്‍മ്മിച്ച കമ്പനിക്കും രാജ്യത്തിലെ സൈനികര്‍ക്കും മാത്രമേ ഇത് എങ്ങിനെയാണ് സൂക്ഷിക്കേണ്ടത്, മാനേജ് ചെയ്യേണ്ടത് , വിദഗ്ധമായി ശത്രുപാളയത്തില്‍ പ്രയോഗിക്കേണ്ടത് എന്നൊക്കെ അറിയൂ. അതിന് പിന്നില്‍ ആ ജെറ്റിന്റെ സോഫ്റ്റ് വെയറിന് വലിയ പങ്കുണ്ട്. അതാണ് റഷ്യ ഇന്ത്യയുമായി എസ് യു 57നൊപ്പം പങ്കുവെയ്‌ക്കുക.
