ന്യൂഡൽഹി : ഡൽഹി മുൻ മുഖ്യമന്ത്രി അരവിന്ദ് കെജ്‌രിവാൾ ആവർത്തിച്ച് കള്ളം പറയുകയും രാജ്യത്തിന്റെ സ്ഥാപനങ്ങളെ അപമാനിക്കുകയും ചെയ്യുന്നുവെന്ന് ആരോപിച്ച് ബിജെപി ദേശീയ ജനറൽ സെക്രട്ടറി തരുൺ ചുഗ് രംഗത്ത്. വായു മലിനീകരണം, ജല മലിനീകരണം എന്നിവയുൾപ്പെടെ ഡൽഹിയിലെ നിർണായക വിഷയങ്ങൾ കൈകാര്യം ചെയ്യുന്നതിൽ കെജ്‌രിവാൾ പരാജയപ്പെട്ടിരിക്കുകയാണ്.
“കെജ്‌രിവാൾ സർ, ഡൽഹിയിലെ വായു മലിനമാക്കിയത് ആരാണ്? ഡൽഹിയുടെ മുഴുവൻ അന്തരീക്ഷവും നിങ്ങൾ നശിപ്പിച്ചു. യമുനയെ നിങ്ങൾ മലിനമാക്കി.”- തരുൺ ചുഗ് പരിഹാസേന പറഞ്ഞു. വരാനിരിക്കുന്ന തിരഞ്ഞെടുപ്പുകളിൽ ഡൽഹിയിലെ ജനങ്ങൾ കെജ്‌രിവാളിനെ നിരസിക്കുമെന്നതിൽ സംശയമില്ല. ജനങ്ങൾ നിങ്ങൾക്ക് കനത്ത പരാജയം നൽകുമെന്നുറപ്പാണെന്നും ചുഗ് വ്യക്തമാക്കി.
ഫെബ്രുവരി 8ലെ തോൽവിക്ക് ശേഷം കെജ്‌രിവാൾ വീണ്ടും കരയാൻ തുടങ്ങും. എന്നും “ഇവിഎമ്മുകൾ” ഓർത്ത് കരയുന്നതാണ് മുൻ മുഖ്യന്റെ രീതിയെന്നും ചുഗ് പരിഹസിച്ചു. ഫെബ്രുവരി 5 ന് ഒറ്റ ഘട്ടമായി ഡൽഹിയിൽ തെരഞ്ഞെടുപ്പ് നടക്കും, വോട്ടെണ്ണൽ ഫെബ്രുവരി 8 ന് നടക്കും.
