ആലപ്പുഴ: ക്രിസ്മസ്, പുതുവത്സര സീസണും നഷ്ടപ്പെട്ടു, കടക്കെണിയിലായ താറാവുകര്‍ഷകര്‍ ആത്മഹത്യാമുനമ്പില്‍. പക്ഷിപ്പനി വ്യാപനം തടയാന്‍ കള്ളിങ്ങിന് വിധേയമാക്കിയ താറാവുകള്‍ക്കുള്ള നഷ്ടപരിഹാരം നല്കാതെ സംസ്ഥാന സര്‍ക്കാര്‍ കര്‍ഷകരെ ദ്രോഹിക്കുകയാണെന്നാണ് വിമര്‍ശനം.
കേന്ദ്രസര്‍ക്കാര്‍ വിഹിതം കൃത്യമായി ലഭിച്ചിട്ടും സംസ്ഥാനം സഹായം വിതരണം ചെയ്യാത്തതില്‍ ദുരൂഹത. ഏപ്രില്‍ മുതല്‍ വിവിധ ഘട്ടങ്ങളിലായി കോഴിയും താറാവും കാടയും ഉള്‍പ്പെടെ ജില്ലയില്‍ 3,52,851ലധികം പക്ഷികളെയാണ് കൊന്നൊടുക്കിയത്. രോഗം ബാധിച്ച് 1,23,640 പക്ഷികള്‍ ചത്തിരുന്നു. ഈ സീസണില്‍ മാത്രം 1,69,504 താറാവുകളും 99,147 കോഴികളും 2,07,840 കാടകളെയുമാണ് കൊന്നൊടുക്കിയത്.
മറ്റ് പക്ഷികളായ 600 എണ്ണം വേറെയും. 60 ദിവസം പ്രായമായ താറാവിന് 100 രൂപയും അതിന് മുകളിലുള്ളവയ്‌ക്ക് 200 രൂപയുമാണ് നഷ്ടപരിഹാരമായി നല്കുന്നത്. വളര്‍ത്തുന്നതിനാവശ്യമായ തീറ്റയ്‌ക്കും വാക്സിനും വില കൂടിയതിനാല്‍ നഷ്ടപരിഹാരത്തുക 60 ദിവസം പ്രായമായ താറാവിന് 150 ഉം അതിന് മുകളിലുള്ളവയ്‌ക്ക് 300ഉം രൂപയാക്കണമെന്നാണ് കര്‍ഷകരുടെ ആവശ്യം. ഇതിനുള്ള നഷ്ടപരിഹാരമായി 780ലധികം കര്‍ഷകര്‍ക്ക് 2,95,840 രൂപയാണ് കിട്ടാനുള്ളത്. ഇതില്‍ കള്ളിങ്ങില്‍ 2.5കോടിയും ചത്തതിന് 45,85,000 രൂപയുമാണ് നല്‌കേണ്ടത്. നശിപ്പിച്ച മുട്ടയുടെ വില വേറെയും.
ഈസ്റ്റര്‍, ക്രിസ്മസ്, പുതുവത്സര വിപണി മുന്നില്‍ക്കണ്ടാണ് താറാവുകളെ വളര്‍ത്തുന്നത്. ഏപ്രില്‍ മുതല്‍ പക്ഷിപ്പനി വ്യാപകമായതോടെ ഡിസംബര്‍ 31 വരെ നിലനില്‍ക്കുന്ന താറാവിന്റെ ഉത്പാദനവും വിപണവും നിരോധിക്കുകയായിരുന്നു. ഇത് വരും വര്‍ഷത്തെ ഈസ്റ്റര്‍ കച്ചവടത്തെയും ബാധിക്കും. നഷ്ടപരിഹാരത്തിന്റെ 50 ശതമാനം വീതം സംസ്ഥാനവും കേന്ദ്രവുമാണ് വഹിക്കേണ്ടത്. കേന്ദ്രസര്‍ക്കാര്‍ വിഹിതമായ മൂന്നുകോടി രൂപ ലഭിച്ചു.
സംസ്ഥാന വിഹിതത്തിനുള്ള ഫണ്ട് അനുവദിച്ചിട്ടില്ല. കോഴി, താറാവ്, മുട്ട എന്നിവയ്‌ക്ക് മാത്രമാണ് നിലവില്‍ നഷ്ടപരിഹാരം നല്കുന്നത്. സര്‍ക്കാരിന്റെ സാമ്പത്തിക പ്രതിസന്ധി കാരണം കാട, ടര്‍ക്കി, ഗിനി, വാത്ത, പ്രാവ് തുടങ്ങിയവയ്‌ക്ക് നഷ്ടപരിഹാരം ലഭിക്കുന്നില്ല. ഇത് കര്‍ഷകരെ സാമ്പത്തിക പ്രതിസന്ധിയിലാക്കി.
