തിരുവനന്തപുരം : സിപിഎം തിരുവനന്തപുരം ജില്ലാ സമ്മേളനത്തില് മേയര് ആര്യാ രാജേന്ദ്രനെതിരെ രൂക്ഷ വിമര്ശനം. മേയര്ക്ക് ധിക്കാരവും ധാര്ഷ്ട്യവുമെന്ന് പ്രതിനിധികള് വിമര്ശിച്ചു. ദേശീയ- അന്തര്ദേശിയ പുരസ്കാരങ്ങളില് കാര്യമില്ലെന്നും ജനങ്ങളുടെ അവാര്ഡാണ് വേണ്ടതെന്നും കുറ്റപ്പെടുത്തലുണ്ട്. അതില് മേയര് തികഞ്ഞ പരാജയമാണ്. ഈ നിലയ്ക്ക് പോയാല് നഗരസഭ ഭരണം ബിജെപി കൊണ്ടു പോകുമെന്ന് പ്രതിനിധികള് പറഞ്ഞു.
മുല്ലശേരി മധു വിഷയത്തില് സംസ്ഥാന- ജില്ലാ നേതൃത്വത്തിനെതിരെയും വിമര്ശനമുണ്ട്. മുല്ലശേരി മധു കഴക്കൂട്ടം വഴിപോയപ്പോള് വെറുതെ കസേരയില് കയറി ഇരുന്നതല്ല. ജില്ലാ-സംസ്ഥാന നേതൃത്വമാണ് ഏരിയാ സെക്രട്ടറിയാക്കിയത്. ഈ ഉത്തരവാദിത്തത്തില് നിന്ന് നേതൃത്വത്തിന് ഒഴിഞ്ഞു മാറാനാവില്ല.
യൂണിവേഴ്സിറ്റി കോളേജിലെ അക്രമങ്ങളില് എസ്എഫ്ഐക്കെതിരെയും രൂക്ഷവിമര്ശനമുണ്ട്.എസ്എഫ്ഐ അക്രമികളുടെ സംഘടനയായി മാറി. സമരസംഘടനയായിരുന്ന ഡി വൈ എഫ് ഐ ചാരിറ്റി സംഘടനയായെന്നും നിര്ജ്ജീവമെന്നും പ്രതിനിധികള് അഭിപ്രായപ്പെട്ടു.
കരമന ഹരി, എസ്.എ.സുന്ദര്, എം.എം ബഷീര്, മടവൂര് അനില് എന്നീ ജില്ലാ കമ്മിറ്റി നേതാക്കള്ക്കെതിരെയും വിമര്ശനം ഉയര്ന്നു.കരമന ഹരിക്ക് നാക്കിന് നിയന്ത്രണമില്ല. ജില്ലാ കമ്മിറ്റിയില് മുഖ്യമന്ത്രിക്ക് എതിരെ രൂക്ഷ വിമര്ശനം നടത്തിയ നേതാവാണ് കരമന ഹരി. എസ്.എ. സുന്ദര് വിഭാഗീയത ഉണ്ടാക്കാന് ശ്രമിക്കുന്നു എന്നാണ് ആരോപണം. വിഭാഗിയ പ്രശ്നങ്ങള് പരിഹരിക്കാന് എം എം ബഷീര് ഇടപെടുന്നില്ലെന്നും വിമര്ശനം ഉയര്ന്നു.
